Read west central oromo MACAAFA FAARFANNAA 105 Bible Online

MACAAFA FAARFANNAA 105 - west central oromo bible

MACAAFA FAARFANNAA 105

¹Waaqayyoon galateeffadhaa, maqaa isaa waammadhaa, gocha isaas saba hundumaa keessatti beeksisaa*!

²Isa faarfadhaa, sagalee mi'a faarfannaatiin isa jajadhaa, waa'ee hojii isaa isa dinqisiisaa hundumaas himaa!

³Maqaa isaa isa qulqulluudhaan of jajaa, garaan warra Waaqayyoon barbaadanii haa gammadu!

⁴Waaqayyoon, aangoo isaas qoradhaa, yeroo hundumaa fuula isaa barbaaddadhaa*!

⁵Hojii dinqisiisaa inni hojjete, milikkita inni argisiises, firdii inni kennes yaadadhaa!

⁶Isin sanyiin hojjetaa isaa Abrahaam, isin ilmaan Yaaqoob warri isaaf fo'amtan kana yaadadhaa![363]

⁷Inni Waaqayyo gooftaa keenya, firdiin isaa lafa hundumaa in qaqqaba.

⁸Inni kakuu isaa bara baraan, dubbii abboommii isaas hamma dhaloota kumaatti in yaadata*;

⁹kakuu Abrahaamiif kakate, isa Yisihaqiif wareeges in yaadata*;

¹⁰kun Yaaqoobiif seerrata, Israa'eliif kakuu bara baraa akka ta'uuf cimsee in dhaabe;

¹¹Waaqayyo, ?Ga'aa dhaala sanyii keetii akka ta'uuf, biyya Kana'aan siif nan kenna? jedhe*.[364]

¹²Yeroo sana lakkoobsi namoota isaanii hin baay'anne, isaan muraasa, orma biyya sanatti galanii dhas.

¹³Saba tokko keessaa gara saba kaaniitti, mootummaa tokko keessaas gara warra kaaniitti in daddarbu turan.

¹⁴Waaqayyo, namni tokko illee akka isaan cunqursu hin goone, inni isaaniif jedhee mootota iyyuu ifatee*,

¹⁵?Warra ani dibee moosise hin tuqinaa, raajota koo irrattis hamaa hin hojjetinaa!? jedhe.[365]

¹⁶Inni biyyicha irratti beela buuse, qodaa isaaniis hundumaa cabse, buddeena isaan dhabsiise.

¹⁷Garuu fuula isaanii dura nama tokko ergeera, innis Yoseef isa garbicha ta'ee gurguramee dha*;

¹⁸miilla isaa funyoo sibiilaatiin miidhaniiru, ofii isaatiis hidhaa sibiilaatti gale;

¹⁹hidhamuun isaas wanti inni jedhe hamma raawwatamutti, dubbiin Waaqayyoos hamma dhugaa baasuufitti ture.

²⁰Mootichi ergee gad isa in dhiisise, inni saba baay'ee irratti mo'es akka inni hiikamu in godhe;

²¹mana isaa irratti gooftaa, qabeenya isaa hundumaa irrattis abboomaa isa godhate;

²²gurguddoota biyya isaa akkuma yaadetti haa gorsuuf, maanguddoota biyya isaas ogummaa haa barsiisuuf isa dhaabe.[366]

²³Israa'el biyya Gibxi dhaqe, Yaaqoob biyya Kaamitti galaa ta'e*.

²⁴Waaqayyo immoo sabni isaa baay'isee akka wal horu, diinota isaa caalaas akka jabaatu in godhe*.

²⁵Warri Gibxi saba isaa akka jibbaniif, hojjetoota isaas haxxummaadhaan akka qabaniif, inni yaada isaanii in geddare.[367]

²⁶Yommus Waaqayyo, Musee hojjetaa isaa, Aaron isa fo'ates in erge*;

²⁷isaan namoota keessatti milikkita isaa, biyya Kaamittis dinqii isaa in argisiisan.

²⁸Inni dukkana itti ergee, lafa dukkaneesse, isaan garuu dubbii isaatiin in morman.

²⁹Bishaan laga isaanii hundumaa dhiigatti diddiiree, qurxummiin isaanii hundinuus akka du'an godhe;

³⁰fatteen lakkoobsa hin qabne biyya isaanii irra yaa'e, lafa bultii mootii isaanii iyyuu in ga'e.

³¹Inni dubbannaan gurmuun qarxaasaa, bookeenis lafa isaanii irratti in dhufe;

³²inni qooda bokkaa cabbii kenne, ibidda boba'aas biyya isaaniitti in bobeesse.

³³Waynii isaaniitii fi harbuu isaanii in balleesse, muka biyya isaaniis in caccabse;

³⁴inni dubbannaan hawaannisi, korophisi lakkoobsa hin qabnes in ba'an;

³⁵biqiltuu lafa isaanii hundumaa in nyaatan, wanta qotiisa isaanii irraa argamus in fixan.

³⁶Biyya isaanii keessaa angafa hundumaa, humna isaanii isa jalqabaa hundumaas in rukute*.[368]

³⁷Warri Israa'el immoo meettiidhaa fi warqee fudhatanii akka ba'an godhe; gosa isaanii keessaas namni tokko illee laafee hin kufne*.

³⁸Warri Gibxi baay'isanii waan isaan sodaataniif, ba'anii adeemuu warra Israa'elitti in gammadan.

³⁹Waaqayyo isaan golguuf duumessa, halkan isaaniif ibsuufis ibidda in kaa'eef*.

⁴⁰Gaafachuu isaanii irratti inni dimbiriqqee isaaniif fide, buddeena waaqa irraatiinis isaan in quufse*.

⁴¹Inni kattaa bane, bishaanis keessaa in ba'e, akkuma lagaatti lafa gogaa keessa yaa'e*.

⁴²Innoo dubbii isaa isa qulqulluu, isa Abrahaam hojjetaa isaatti dubbate yaadateera*.[369]

⁴³Sabni isaa gammachuudhaan, warri isaaf fo'amanis sagalee gammachuu dhageessisuudhaan akka ba'an godhe.

⁴⁴Biyya saba lafa irraa isaaniif kenne, wanta sabni warri kaan itti dadhabanii argatanis akka of harka galfatan in godhe*;

⁴⁵kunis isaan seerrata isaa akka fudhataniif abboommii isaas akka eeganiif ta'e; Waaqayyoon jajadhaa![370]