Read west central oromo MACAAFA FAARFANNAA 107 Bible Online

MACAAFA FAARFANNAA 107 - west central oromo bible

MACAAFA FAARFANNAA 107

¹Waaqayyo gaarii waan ta'eef, gaarummaan isaa bara baraan waan jiraatuuf, isaaf galata galchaa*!

²Warri Waaqayyo fure, warri inni harka diinaa keessaa fure,

³warri inni biyya garaa garaatii ba'a-biiftuutii, lixa-biiftuutii, gara bitaattii, gara mirgaattiis walitti sassaabe, galata isaa haa himan*![381]

⁴Warri lafa duwwaa homtuu keessa hin jirretti karaa irraa badanii jooran, mandara namni keessa jiraatutti karaa isaan geessu argachuu hin dandeenye;

⁵in beela'an, in dheebotanis, jireenya isaaniif iyyuu abdii kutatan.

⁶Rakkina isaanii keessatti gara Waaqayyootti iyyatan, yommus inni muddama isaanii keessaa isaan in baase;

⁷gara mandara namni keessa jiraatuu akka dhaqaniif, inni karaa qajeelaa irra isaan buuse;

⁸egaa gaarummaa isaa fi wanta dinqisiisaa inni ilmaan namootaaf godheefis, isaan kun Waaqayyoof galata haa galchan!

⁹Innoo isa dheebotaa dheebuu in baasa, isa beela'aas waan gaariidhaan in quufsa*.[382]

¹⁰Warri gadadamoonni sibiilaan hidhaman, guyyaan itti dukkanaa'ee dukkana keessa in jiraatan;

¹¹isaanoo abboommii Waaqayyootiin in morman, gorsa aabbaas in tuffatan.

¹²Yaadni isaanii hojii dadhabsiisaadhaan gad qabame, isaan gufatanii in kufan, kan gargaarus hin argamne.

¹³Rakkina isaanii keessatti gara Waaqayyootti iyyatan, yommus inni muddama isaanii keessatti isaan in gargaare;

¹⁴isa guyyaan itti dukkanaa'e, dukkanatti jiraatan keessaa isaan baase, hidhaa isaaniis in caccabse.

¹⁵Egaa gaarummaa isaa fi wanta dinqisiisaa inni ilmaan namootaaf godheefis, isaan kun Waaqayyoof galata haa galchan.

¹⁶Innoo balbaloota sibiila boorrajii in caccabse, danqaraa sibiilaas in qirixe.

¹⁷Isaan karaa cubbuu irra waan goraniif gowwooman, sababii yakka isaaniifis in dhiphatan;

¹⁸nyaata hundumaa ciigga'anii, afaan boollaa irras ga'an.

¹⁹Rakkina isaanii keessatti gara Waaqayyootti iyyatan, yommus inni muddama isaanii keessatti isaan in gargaare.

²⁰Dubbii isaa ergee isaan fayyise, boolla du'aa keessaas isaan baase.

²¹Egaa gaarummaa isaa fi wanta dinqisiisaa inni ilmaan namootaaf godheefis, isaan kun Waaqayyoof galata haa galchan!

²²Aarsaa galataa haa dhi'eessan, ililleedhaanis gocha isaa hundumaa haa himan*![383]

²³Warri markabootaan galaana guddaa irra adeemanii, bishaan bal'aa irratti bitanii gurguran,

²⁴isaan kun gocha Waaqayyoo fi hojii isaa isa dinqisiisaa tuujjuba keessatti argan.

²⁵Inni in abboome, qilleensa jabaa dha'aa galaanaa ol fuudhus in kaase*.

²⁶Kana irratti jarri [markaba isaanii wajjin] gara bantii waaqaatti ol ka'an, tuujjubatti gad deebi'an; rakkina keessattis abdii in kutatan;

²⁷akka nama machaa'ee daddarbatamanii in gatantaran, malli isaanii harkaa in dhume.

²⁸Rakkina isaanii keessatti gara Waaqayyootti iyyatan, yommus inni muddama isaanii keessaa isaan in baase.

²⁹Qilleensa jabaa sanas gab godhe, dha'aan galaanaas calluma jedhe*.

³⁰Waan inni gab jedheef in gammadan, gooftichis gara buufata markabaa isa isaan bira ga'uuf hawwanitti isaan in geesse.

³¹Egaa gaarummaa isaa fi wanta dinqisiisaa inni ilmaan namootaaf godheefis, isaan kun Waaqayyoof galata haa galchan!

³²Waldaa sabaa keessatti ulfinaan ol isa haa kaasan! Yaa'ii maanguddootaa keessattis isa haa jajatan*![384]

³³Inni laga bishaan yaa'u, lafa duwwaa, burqituu bishaaniis lafa gogaa godhe*;

³⁴jal'ina warra biyyicha keessa jiraatan irraa kan ka'e, lafa midhaan baasu akka bakkee soogiddaa isa midhaan hin baafnee godhe*.

³⁵Inni lafa duwwaa, lafa kuufama bishaanii, lafa gogaas iddoo bishaan keessaa burqu godhe*.

³⁶Warra beela'an achi jiraachise, isaan immoo mandara keessa jiraatan in ijaarratan.

³⁷Maasii isaaniitti midhaan in facaafatan, wayniis in dhaabbatan, ija isaas baay'ee in sassaabbatan.

³⁸Inni isaan in eebbise, isaanis guddaa in baay'atan, lakkoobsi horii isaanii yarachaa hin adeemne.[385]

³⁹Garuu wanti hamaan, gaddis, gara booddeetti isaan deebisuu irraa kan ka'e gad qabamanii gad deebi'an.

⁴⁰Inni gurguddootatti salphina baay'ee in fide; lafa onaa karaa hin qabne keessas akka jooran godhe*.

⁴¹Nama wanta barbaachisaa dhabe garuu gad-deebii keessaa ol fuudhee, maatiin isaas akka karra hoolotaa akka baay'atu godhe.

⁴²Warri yaada qajeelaa qaban kana arganii in gammadu, warri dubbii jal'aa dubbatan hundinuu garuu afaan in qabatu*!

⁴³Egaa ogeessi eenyu ree? Inni kana haa eegu, gaarummaa Waaqayyoos yaadaan haa qabu![386]