Read west central oromo MACAAFA FAARFANNAA 109 Bible Online

MACAAFA FAARFANNAA 109 - west central oromo bible

MACAAFA FAARFANNAA 109

¹Yaa Waaqayyo isa ani jajadhuu, ati calluma hin jedhin!

²Namni jal'aan, gowwoomsaanis afaan ana irratti banatan, arraba sobduudhaan anatti dubbatan*;

³ana naanna'anii dubbii jibbaa dubbatan, sababii malees na lolan.

⁴Isa ani isaan jaalladheef, diina anatti ta'an; ani garuu isaaniif nan kadhadha*.

⁵Qooda gaarii, hamaa, qooda jaalalaas jibba anaaf in deebisan.[388]

⁶Nama jal'aa isa irratti kaasi, mirga isaas hamajaajiin haa dhaabatu*!

⁷Yaa'ii firdii keessaas yakkaa ta'ee gad haa ba'u, kadhanni isaa illee cubbuu isatti haa ta'u!

⁸Barri isaa haa gabaabbatu, hojii inni irra dhaabames kan biraa haa fudhatu!

⁹Ijoolleen isaa abbaan kan irra hin jirre haa ta'an, haati manaa isaas haadha hiyyeessaa haa taatu;

¹⁰ijoolleen isaa asii fi achi labanii haa kadhatan, mana isaanii isa diigamaa keessaa ba'anii waa haa barbaaddatan!

¹¹Abbaan gatii wanta inni qabu hundumaa haa qabatu, wanta inni itti dadhabee argates warri ormaa haa saaman!

¹²Namni tokko illee gaarummaa isatti hin argisiisin, ijoollee isaa warra inni irraa du'eefis namni garaa hin laafin!

¹³Ijoolleen ijoollee isaatii lafa irraa haa dhuman, maqaan isaanii dhaloota itti aanu keessaa haxaa'amee haa balleeffamu!

¹⁴Yakki abboota isaatii Waaqayyo duratti haa yaadatamu! Cubbuun haadha isaas haxaa'amee hin balleeffamin!

¹⁵Wanta kana keessaa tokko illee yeroo hundumaa Waaqayyo duraa hin dhabamin; seenaan namichaa garuu lafa irraa haa balleeffamu![389]

¹⁶Namichoo isa gadadamaa, isa dhabaa ari'ee, isa garaan isaa na'ee abdii kutates ajjeesuu barbaade malee, gaarummaa itti argisiisuu hin yaanne.

¹⁷Inni abaaruu jaallate, abaarsi isa irra haa ga'u! Eebbatti hin gammanne, innis isattii haa fagaatu!

¹⁸Inni abaarsa akka wayyaatti uffate, abaarsichi akka bishaanii namummaa isaatti, akka dibataas lafee isaatti haa galu*!

¹⁹Abaarsichi akka uffata inni ofitti maruu, akka sabbata inni yeroo hundumaa ittiin hidhatuu isatti haa ta'u![390]

²⁰Kun hundinuu gatii Waaqayyo biraa warra hamajaajii koo ta'aniif, warra jireenya koo irratti hamaa dubbataniifis kennamu haa ta'u!

²¹Ati garuu yaa Waaqayyo gooftaa ko, maqaa keetiif akka ta'utti anaaf godhi, arjummaa kee isa gaariidhaan ana oolchi*!

²²Anoo gadadamaa dha, dhabaa dhas, quuqaan keessa garaa kootii na madeesse;

²³akka gaadidduu gabaabbachaa adeemutti darbuuttan jira, akka hawaannisaatti of irraa ana hurgufan;

²⁴soomuu irraa kan ka'e jilbi koo in hollate, foon ana irraa dhumee nan huqqadhe;

²⁵namootaaf muka ga'oo nan ta'e, yeroo ana arganis mataa anatti raasu.[391]

²⁶Yaa Waaqayyo gooftaa ko, ana gargaari, akka gaarummaa keetti ana oolchi!

²⁷Kun hojii harka kee ta'uu isaa, yaa Waaqayyo, ati kana gochuu kees haa beekan!

²⁸Isaan haa abaaran, ati garuu in eebbifta; warri ana irratti ka'an in yeellaasifamu; garbichi kee immoo in gammada*!

²⁹Warri hamajaajii koo ta'an salphina haa uffatan, yeelloo isaaniis akka wayyaatti ofitti haa maran![392]

³⁰Afaan kootiin guddisee Waaqayyoof galata nan galcha, namoota baay'ee keessatti isa nan jajadha.

³¹Innoo harka warra lubbuu isaatti faradanii isa oolchuudhaaf, mirga nama dhabaa in dhaabata.