Read west central oromo MACAAFA FAARFANNAA 112 Bible Online

MACAAFA FAARFANNAA 112 - west central oromo bible

MACAAFA FAARFANNAA 112

¹Waaqayyoon jajadhaa! Namni Waaqayyoon sodaatu, inni abboommiin isaa guddaa itti tolus haa gammadu!

²Sanyiin isaa biyyicha keessatti guddaa in ta'a, dhaloonni warra gara-qajeelotaa in eebbifama.

³Badhaadhummaa fi soorumni mana isaa keessa jira, qajeelummaan isaas yeroo hundumaaf jabaatee in dhaabata.

⁴Inni araara-qabeessa, oo'a-qabeessa, qajeelaas waan ta'eef, warra gara-qajeelotaaf ifni dukkana keessatti in ba'aaf*.[398]

⁵Namni araara argisiisuu fi namni liqeessu gaarii dha, inni jiruu isaa qajeeltootti in geggeeffata*!

⁶Inni yoom iyyuu hin mittiqu, namni qajeelaanoo bara baraan in yaadatama.

⁷Oduu hamaa dhaga'uu hin sodaatu, Waaqayyoon waan amanatuuf garaan isaa hin shakku.

⁸Hamma warra isa cunqursan irratti wanta dhufu argee gammadutti, garaan isaa cimsee amanateera, hin sodaatu*.

⁹Inni arjummaadhaan warra dhabaniif in kenna, qajeelummaan isaa yeroo hundumaaf jabaatee in dhaabata; gaanfi mataa isaa ulfinaan ol in qabama*.[399]

¹⁰Namni jal'aan kana argee in aara, ilkaan isaa walitti in qara, ofii isaatiis gad in dhuma; fedhi warra jal'ootaa waan tokkotti kan hin galle in ta'a.