Read west central oromo MACAAFA FAARFANNAA 119 Bible Online

MACAAFA FAARFANNAA 119 - west central oromo bible

MACAAFA FAARFANNAA 119

¹Warri balleessaa malee deddeebi'an, warri akka seera Waaqayyootti jiraatan haa gammadan!

²Warri abboommii isaaf dhugaa ba'u eegan, warri garaa guutuudhaan Waaqayyoon barbaadan,

³warri jal'ina hin hojjenne, warri karaa isaa irra deddeebi'an haa gammadan*!

⁴Ajaji kee ba'eessa ta'ee akka eegamu ati abboomteetta.

⁵Karaa ani seerrata kee eegu irratti, jabaadhee utuun dhaabadhee attaman jaalladha!

⁶Ija koo abboommii kee hundumaa irraa yoon buqqifachuu dhiise, ani hin yeellaasifamu.

⁷Firdii ati qajeelummaadhaan laattu yommuun baru, ani yaada qajeelaadhaan galata siif nan galcha.

⁸Ani seerrata kee nan eega, ati raawwattee ana hin dhiisin![421]

⁹Dargaggeessi maaliin adeemsa isaa qullaa'ummaatti eeguu danda'a? Akka dubbii keetti adeemsa isaa qajeelfachuudhaan eeggachuu in danda'a.

¹⁰Garaa koo guutuu sin barbaaddadha, abboommii kee irraa akkan kaadhu hin godhin!

¹¹Akkan si hin yakkineef waan ati jette garaa koo keessa kaa'adheera.

¹²Yaa Waaqayyo, ati jajamaa dha, seerrata kee na barsiisi!

¹³Wanta qajeelaa ta'ee afaan keetiin dubbatame, ani arraba kootiin tokko tokkoon nan hima.

¹⁴Akkuma ani sooruma hundumaatti gammadu, wanta abboommiin kee dhugaa ba'u duukaa bu'uutti nan gammada.

¹⁵Ajaja kee irra-deddeebi'ee itti nan yaada, karaa kee irraas ija hin buqqifadhu.

¹⁶Seerranni kee garaa na ciibsa, dubbii kees hin irraanfadhu.

¹⁷Garbicha keef wanta gaarii godhi! Ani nan jiraadha, dubbii kees nan eega.

¹⁸Wanta dinqisiisaa seera kee keessaa akkan argutti, ati ija koo anaaf bani!

¹⁹Ani biyya lafaa irratti orma, abboommii kee ana duraa hin dhoksin*!

²⁰Wanta qajeelaa ta'ee si duratti fudhatame, yeroo hundumaa yaaduu irraa kan ka'e lubbuun koo in bututti.

²¹Warra gad-dhiisatti jiraatan ati in ifatta, warri abboommii kee irraa kaatanis abaaramoo dha*!

²²Ani abboommii siif dhugaa ba'u eegeera; ati ga'oo fi tuffii ana irraa fuudhi!

²³Gurguddoonni taa'anii ana irratti yoo dubbatan iyyuu, garbichi kee seerrata kee irra-deddeebi'ee itti in yaada.

²⁴Abboommonni siif dhugaa ba'an garaa na ciibsu, isaan gorsituu koo ti.[422]

²⁵Ani lafatti nan maxxanfame, ati akka dubbii keetti lubbuu anatti deebisi!

²⁶Ani jireenya koo keessatti waanan ta'e sitti himadheera atis deebii anaaf kenniteetta; seerrata kee immoo na barsiisi!

²⁷Karaa ati ajajje na hubachiisi, yommus ani hojii kee isa dinqisiisaa irra-deddeebi'ee itti nan yaada.

²⁸Ani gadda irraa kan ka'e taa'ee nan boo'a, ati akka dubbii keetti ol na kaasi!

²⁹Karaa sobaa irra akka ani hin adeemneef na eegi, seera keetiinis araara na argachiisi!

³⁰Ani karaa dhugaa fo'adheera, wanta qajeelaa ta'ee si duratti fudhatames of dura kaa'adheera.

³¹Wanta abboommiin kee dhugaa ba'utti maxanee nan jiraadha, yaa Waaqayyo, akka ani yeellaasifamu hin godhin!

³²Ati garaan koo gammadee akka hubatu goote, anis karaa ati abboomte irra nan kaadha*![423]

³³Karaa seerranni kee irra nama buusu na barsiisi yaa Waaqayyo! Inni bu'aa waan qabuuf, hamma dhumaatti isa nan eega.

³⁴Seera kee akkan yaadaan qabuuf, garaa koo guutuudhaanis akkan isa eeguuf, hubannaa anaaf kenni!

³⁵Daandii ati abboomte irra akkan adeemu godhi, innoo anatti in tola.

³⁶Bu'aa dalgaa fi sassatuu irraa, garaa koo gara wanta abboommiin kee dhugaa ba'uufitti qabi!

³⁷Ija koo wanta waa'ee hin baafne ilaaluu irraa jal'isi, karaa kee irrattis lubbuu anatti deebisi!

³⁸Garbichi kee akka si sodaatuuf, wanta abdachiifte isaaf raawwadhu!

³⁹Wanti qajeelaa ta'ee si duratti fudhatame gaarii waan ta'eef, ga'oo isa ani sodaadhu ana irraa deebisi!

⁴⁰Kunoo, ani ajaja kee hawwaan nan eeggadha, qajeelummaa keetiin lubbuu anatti deebisi!

⁴¹Yaa Waaqayyo, akka ati jettetti, gaarummaan kee, gargaarsi kee inni fayyisus anaaf haa dhufu,

⁴²yoos isa anatti ga'isuuf deebii ga'u nan kenna, anoo dubbii kee nan amanadha.

⁴³Dubbii dhugaa matumaa ana duraa hin fudhatin! Anoo wanta qajeelaa ta'e si duratti fudhatame abdiidhaan nan eeggadha.

⁴⁴Ani itti fufee, yeroo hundumaaf bara baraan seera kee nan eega.

⁴⁵Ani ajaja kee argachuudhaaf waanan barbaaddadheef, iddoo bal'aa keessa nan deddeebi'a.

⁴⁶Abboommii isa siif dhugaa ba'us, mootota duratti nan dubbadha, hin yeella'us*.

⁴⁷Abboommiin kee inni ani jaalladhu, garaa na ciibsa.

⁴⁸Abboommii kee isa ani jaalladhutti harka koo nan hiixadha, seerrata kees irra-deddeebi'ee itti nan yaada*.[424]

⁴⁹Dubbii kee isa abdiidhaan akka ani eeggadhu goote, ana garbicha keetiif yaadadhu.

⁵⁰Wanti ati jette lubbuu anatti in deebisa, kunis yeroon gad deebi'utti jajjabina koo ti.

⁵¹Warri gad-dhiisatti jiraatan baay'isanii anatti in qoosu, ani garuu seera kee irraa hin jal'anne.

⁵²Wanta durii durii jalqabee si duratti qajeelaa ta'ee fudhatame yommuun yaadadhu, jajjabina nan argadha, yaa Waaqayyo!

⁵³Jal'oonni seera kee waan dhiisaniif, aarii guddaatu na qabe.

⁵⁴Mana isa ani akka kara-adeemaatti itti galu keessatti, seerranni kee faarfannaa anaaf ta'e.

⁵⁵Halkan maqaa kee nan yaadadha, yaa Waaqayyo; seera kees nan eega*.

⁵⁶Ani ajaja kee akkan eeguuf, carraan anaaf kennameera.[425]

⁵⁷Ani dubbii kee eeguudhaaf, ?Waaqayyo qooda koo ti? jedheera.

⁵⁸Fuula ifaadhaan akka na ilaaltuuf, garaa guutuudhaan sin kadhadha; akka dubbii keetti araara anatti argisiisi!

⁵⁹Waa'ee karaa isa ani irra adeemuu nan yaade, miilla koos gara abboommii isa siif dhugaa ba'utti nan qajeelfadhe.

⁶⁰Ani abboommii kee irraa hin seesu, isa eeguuf nan ariifadha.

⁶¹Jal'oonni funyoo yoo anatti xaxan iyyuu, ani seera kee hin irraanfadhu.

⁶²Waa'ee firdii kee isa qajeelaa sanaaf, galata siif galchuudhaaf, ani halkan walakkaa nan ka'a*.

⁶³Ani warra si sodaatan hundumaaf, warra ajaja kee eeganiifis hidhata.

⁶⁴Gaarummaan kee lafa in guuta, yaa Waaqayyo, seerrata kee na barsiisi*![426]

⁶⁵Yaa Waaqayyo, akkuma ofii keetii dubbatte, ati garbicha keetiif gaarii gooteetta.

⁶⁶Anoo abboommii kee amanadheera, hubannaa gaarii anaaf kenni, waa beekuus na barsiisi!

⁶⁷Utuu ani hin rakkifamin dura karaa irraa goreen ture, amma garuu wanta ati jette nan eega.

⁶⁸Ati gaarii dha, wanta gaariis in hojjetta, seerrata kee na barsiisi!

⁶⁹Warri gad-dhiisatti jiraatan, sobanii waa ana irra in kaa'an; ani garuu garaa koo guutuudhaan ajaja kee nan eega.

⁷⁰Coomni garaa isaanii hadoodcheera, ana garuu seerri kee garaa in ciibsa.

⁷¹Seerrata kee akkan barutti, rakkifamuun anaaf gaarii dha.

⁷²Seerri inni afaan kee keessaa ba'e, warqee fi meettii guroo kumaatama irra anaaf wayya.

⁷³Harki kee na tolcheera, cimsees na dhaabeera, abboommota kee akkan barutti hubannaa anaaf kenni!

⁷⁴Dubbii kee abdiidhaan waanan eeggadhuuf, warri si sodaatan na arganii in gammadu.

⁷⁵Firdiin kee qajeelaa akka ta'e ani beeka, yaa Waaqayyo, amanamaa waan taateef gad na deebifte.

⁷⁶Akkuma ofii keetii garbicha keetti dubbattetti, gaarummaan kee ana haa jajjabeessu!

⁷⁷Seerri kee waan garaa na ciibsuuf, lubbuun akka anatti deebi'uuf, araarri kee anaaf haa dhufu*!

⁷⁸Warri gad-dhiisatti jiraatan sobanii dhugaa koo waan balleessaniif, haa yeellaasifaman! Ani garuu ajaja kee irra-deddeebi'ee itti nan yaada.

⁷⁹Warri si sodaatan, warri abboommii siif dhugaa ba'u beekan gara koo haa goran!

⁸⁰Akka ani hin yeellaasifamnetti, garaan koo balleessaa malee seerrata keetti qabamee haa jiraatu![427]

⁸¹Lubbuun koo fayyisuu kee yaaddee in gaggabdi, dubbii kees abdiidhaan nan eeggadha.

⁸²Iji koo isa ati abdachiifte eeggachuu irraa kan ka'e in dadhabe; ?Yoom na jajjabeessita?? jedhee nan gaafadha.

⁸³Ani akka qalqalloo aara jalatti shuntuuree ta'u illee, seerrata kee hin irraanfadhu.

⁸⁴Garbichi kee si'achi bara hammamii jiraata? Warra na ari'atanittis ati yoom faradda*?

⁸⁵Warri gad-dhiisatti jiraatan, warri seera kee wajjin walii hin galle boolla anaaf qotaniiru.

⁸⁶Abboommiin kee hundinuu dhugaa dha; yeroo namoonni dubbii sobaatiin na ari'atan, ati na gargaari!

⁸⁷Isaan hamma xinnoof malee lafa irraa na balleessanii oolan, ani garuu wanta ati ajajje hin dhiifne.

⁸⁸Akka gaarummaa keetti lubbuu anatti deebisi! Yommus ani abboommii siif dhugaa ba'u isa afaan kee dubbatte nan eega.[428]

⁸⁹Dubbiin kee yaa Waaqayyo, bara baraan, bantiiwwan waaqaa keessatti jabaatee dhaabateera*.

⁹⁰Amanamummaan kee dhalootaa hamma dhalootaatti hafee in jiraata, lafa cimsitee dhaabdeetta, innis jabaatee in dhaabata.

⁹¹Wanti hundinuu siif waan hojjetuuf, inni akka seera ati dhaabdeefitti, hamma har'aatti iyyuu jabaatee in dhaabata.

⁹²Seerri kee utuu garaa ana hin ciibsine ta'ee, ani rakkifamuu kootiin nan balleeffaman ture*.

⁹³Isaaniin lubbuu waan anatti deebifteef, ani bara baraan ajaja kee hin irraanfadhu.

⁹⁴Anoo ajaja kee argachuudhaaf barbaaddadheera, ani kan kee ti, ati na oolchi!

⁹⁵Jal'oonni na balleessuudhaaf riphanii na eeggatu, ani garuu abboommii isa siif dhugaa ba'u yaadaan nan qaba.

⁹⁶Wanti fiixaan ba'e hundinuu dhuma akka qabu argeera, bal'inni abboommii keetii garuu daarii hin qabu.[429]

⁹⁷Ani seera kee attam nan jaalladha! Ani guyyaa guutuu irra-deddeebi'ee itti nan yaada*.

⁹⁸Abboommiin kee bara baraan ana bira jira, diinota koo caalaas ogeessa na godha.

⁹⁹Wanti ani irra-deddeebi'ee itti yaadu abboommii siif dhugaa ba'u waan ta'eef, ani barsiisota koo hundumaa caalaa nan qalbifadha.

¹⁰⁰Ani ajaja kee waanan eegeef, maanguddoota caalaa nan hubadha.

¹⁰¹Ani dubbii kee eeguudhaaf, miilla koo karaa hamaa hundumaa irraa nan ittise.

¹⁰²Wanta qajeelaa ta'ee si duratti fudhatame irraa hin jal'anne, ati ofii keetii ana barsiifteetta.

¹⁰³Wanti ati jette attam anatti miyaa'aa! Isa dammi afaan kootti miyaa'u caalaa anatti in miyaa'a.

¹⁰⁴Ajaja kee keessaa hubannaa nan argadha; kanaafis karaa sobaa hundumaa nan jibba.[430]

¹⁰⁵Dubbiin kee miilla kootiif ibsaa dha, daandii koo irrattis in ifa*.

¹⁰⁶Seera kee isa qajeelaa eeguudhaaf nan kakadhe, isattis nan jabaadha.

¹⁰⁷Ani baay'ee dhiphadheera, yaa Waaqayyo, akka dubbii keetti lubbuu anatti deebisi!

¹⁰⁸Yaa Waaqayyo, galata ani akka aarsaatti afaan kootiin jaalladhee siif dhi'eessu fudhachuun sitti haa tolu! Wanta qajeelaa ta'ee si duratti fudhatames na barsiisi*!

¹⁰⁹Lubbuun koo yeroo hundumaa fittee irra jirti, haa ta'u iyyuu malee, ani seera kee hin irraanfadhu.

¹¹⁰Jal'oonni futtaasaa ana dura kaa'an, ani garuu ajaja kee irraa hin jal'anne.

¹¹¹Abboommonni siif dhugaa ba'an gammachuu garaa kootii waan ta'aniif, isaan bara baraan ga'aa koo ta'aniiru.

¹¹²Seerranni kee bara baraan bu'aa waan qabuuf, hojii irra isa oolchuudhaaf garaan koo isa duukaa jal'ateera.[431]

¹¹³Nama yaada walaallammii nan jibbe, seera kee immoo nan jaalladhe*.

¹¹⁴Ati anaaf golgaa koo ti, gaachana koo tis, ani dubbii kee abdiidhaan nan eeggadha.

¹¹⁵Ani abboommii Waaqayyo koo akkan eegutti, isin warri hamaa gootan, ana irraa fagaadhaa!

¹¹⁶Ati akka abdachiiftetti qabii na oolchi, lubbuunis anatti in deebiti; abdii koo dhabee akkan yeella'u hin godhin!

¹¹⁷Akkan oolutti ati na qabi, ani yeroo hundumaa ija gammachuutiin seerrata kee nan ilaala.

¹¹⁸Ati warra seerrata kee irraa jal'atan hundumaa in tuffatta, isaan in sobu, in gowwoomsus.

¹¹⁹Jal'oota lafa irraa hundumaa ati akka udaan sibiilaatti in gatte, kanaafis ani abboommii siif dhugaa ba'u nan jaalladhe*.

¹²⁰Na naasisuu kee irraa kan ka'e namummaan koo in rifata, firdii kees nan sodaadha.[432]

¹²¹Ani wanta dhugaa, wanta qajeelaas hojjedheera; ati immoo warra na cunqursanitti ana hin dhiisin!

¹²²Garbichi kee wanta gaarii akka argatuuf, amansiisa kenniif; namoonni gad-dhiisatti jiraatan ana hin cunqursin!

¹²³Iji koo fayyisuu kee, wanta ati qajeelummaa keetiin abdachiiftes utuma eeggatuu in dadhabe.

¹²⁴Akka gaarummaa keetiitti garbicha kee qabaa gaariidhaan qabi, seerrata kees na barsiisi!

¹²⁵Ani garbicha kee ti; abboommii siif dhugaa ba'u akkan beekuuf, hubannaa anaaf kenni!

¹²⁶Namoonni seera kee cabsaniiru, waa gochuun yowwana kaa, yaa Waaqayyo!

¹²⁷Ani garuu abboommii kee warqee irra, warqee baqfamee qullaa'e irra caalaa nan jaalladha.

¹²⁸Kanaafis ajaji kee hundinuu qajeelaa ta'uu isaa ani nan fudhadha, karaa sobaa hundumaas nan jibba.

¹²⁹Abboommiin siif dhugaa ba'u dinqisiisaa dha, kanaafis ani lubbuudhumaaf isa nan eega.

¹³⁰Saaqamuun dubbii keetii ifa in kenna, wallaalota iyyuu in hubachiisa.

¹³¹Ani abboommii kee waanan yaaduuf, afaan banee hawwaan nan eeggadha.

¹³²Akka isa warra maqaa kee jaallataniif ta'u sanaatti, as anatti gara gali, araaras anatti argisiisi!

¹³³Ejjennaa koo dubbii keetiin jabeessi, yakki tokko illee humna ana irratti hin godhatin!

¹³⁴Ajaja kee hundumaa akkan eegutti, cunqursaa namaa jalaa na furi!

¹³⁵Garbicha kee fuula ifaadhaan ilaali, seerrata kee immoo na barsiisi*!

¹³⁶Namoonni seera kee waan dhiisaniif, imimmaan ija koo keessaa baay'isee in lola'a.[433]

¹³⁷Yaa Waaqayyo, ati qajeelaa dha, firdiin ati kennitus hin jal'atu.

¹³⁸Ati qajeelummaadhaan, amanamummaa guutuudhaanis, abboommii siif dhugaa ba'u baafteetta.

¹³⁹Hamajaajiiwwan koo dubbii kee waan irraanfataniif, hinaafuun koo badduu na baase*.

¹⁴⁰Dubbiin kee dhugaa ta'uun isaa baay'ee amansiisaa dha, garbichi kees isa in jaallata*.

¹⁴¹Ani nama xinnaa dha, tuffatamaa dhas; ajaja kee garuu hin irraanfadhu.

¹⁴²Qajeelummaan kee qajeelummaa bara baraa ti, seerri kees dhugaa dha.

¹⁴³Rakkinnii fi dhiphinni na argatan, abboommiin kee garuu garaa na ciibsa.

¹⁴⁴Abboommiin siif dhugaa ba'u bara baraan qajeelaa dha, ati hubannaa anaaf kenni, lubbuunis anatti in deebiti.[434]

¹⁴⁵Ani garaa guutuudhaan nan waammadha, ati ana jalaa owwaadhu, yaa Waaqayyo! Ani seerrata kee nan eega.

¹⁴⁶Ani sin waammadha, ati ana oolchi! Ani immoo abboommii siif dhugaa ba'u nan eega.

¹⁴⁷Utuu lafti hin bari'in dhufee, gargaarsaaf gara keetti nan iyyadha; ani dubbii kee abdiidhaan nan eeggadha.

¹⁴⁸Wanta ati jette irra-deddeebi'ee itti yaaduudhaaf, yeroon itti dammaqa halkaniif ka'an utuu hin ga'in hirribni ija koo irraa bade*.

¹⁴⁹Akka gaarummaa keetti sagalee koo dhaga'i, yaa Waaqayyo! Araara keetiin lubbuu anatti deebisi!

¹⁵⁰Warri akeeka hamaa baafatanii na ari'atan anatti dhi'aataniiru, isaan seera keettii immoo fagaataniiru.

¹⁵¹Ati garuu dhi'oo dha, yaa Waaqayyo, abboommonni kee hundinuus dhugaa dha.

¹⁵²Isaan bara baraan akka jiraataniif dhaabuu kee, ani duraan dursee seera siif dhugaa ba'u sanaan beekeera.[435]

¹⁵³Ani seera kee hin irraanfanne, ati dhiphina koo ilaalii na oolchi!

¹⁵⁴Dubbii koo anaaf falmi, na furis, akka abdii keetiitti ati lubbuu anatti deebisi!

¹⁵⁵Jal'oonni seerrata kee waan hin barbaaddanneef, fayyinni isaan irraa fagoo dha.

¹⁵⁶Oo'i kee guddaa dha, yaa Waaqayyo, araara keetiin lubbuu anatti deebisi!

¹⁵⁷Warri na ari'atan, warri diina anatti ta'anis baay'ee dha, ani garuu wanta seerri kee dhugaa ba'u irraa hin jal'anne.

¹⁵⁸Warra gara-gaggalan arguun ana in jibbisiise, isaan wanta ati jette hin eegan.

¹⁵⁹Ajaja kee attam akkan jaalladhu ilaali! Akka gaarummaa keetti lubbuu anatti deebisi, yaa Waaqayyo!

¹⁶⁰Dubbiin kee walumattiin isaa dhugaa dha, firdiin kee inni qajeelaan hundinuu, bara baraan in jiraata*.[436]

¹⁶¹Gurguddoonni sababii malee na ari'atu, ani garuu garaadhuma guutuun dubbii kee sodaadha.

¹⁶²Akka nama boojuu guddaa argatee, ani wanta ati jettutti nan gammada.

¹⁶³Soba nan jibba, nan ciigga'as; seera kee garuu nan jaalladha.

¹⁶⁴Firdii kee isa qajeelaa sanaaf, guyyaatti si'a torba sin jajadha.

¹⁶⁵Warri seera kee jaallatan sun nagaa guddaa qabu, wanti isaan gufachiisus hin jiru.

¹⁶⁶Fayyisuu kee abdiidhaan nan eeggadha, yaa Waaqayyo! Abboommii kees nan raawwadha.

¹⁶⁷Ani abboommii siif dhugaa ba'u lubbuudhumaaf nan eega, baay'ises isa nan jaalladha.

¹⁶⁸Karaan koo hundinuu si dura waan jiruuf, ajaja kee, wanta seerri kee siif dhugaa ba'us nan eega.

¹⁶⁹Iyyati koo si bira anaaf haa ga'u, yaa Waaqayyo, akka dubbii keetti hubannaa anaaf kenni!

¹⁷⁰Himati koo si bira anaaf haa dhufu, akka abdachiiftetti na oolchi!

¹⁷¹Ati seerrata kee waan na barsiiftuuf, afaan koo jajata gad jijjigsa.

¹⁷²Abboommiin kee hundinuu qajeelaa waan ta'eef, arraba kootiin waa'ee dubbii kee nan faarfadha.

¹⁷³Harki kee na gargaaruudhaaf qophaa'aa haa ta'u! Anoo ajaja kee fo'adheera.

¹⁷⁴Yaa Waaqayyo, gargaarsa kee isa fayyisu hawwaan nan eeggadha, seerri kee immoo garaa na ciibsa.

¹⁷⁵Lubbuun koo akka jiraattu godhi, isheenis si haa jajattu! Wanti qajeelaa ta'ee si duratti fudhatames ana haa gargaaru!

¹⁷⁶Ani akka hoolaa badee karaa irraa nan kaadhe, abboommii kee garuu hin irraanfanne; kanaafis ati garbicha kee barbaadi*.[437]