Read west central oromo MACAAFA FAARFANNAA 132 Bible Online

MACAAFA FAARFANNAA 132 - west central oromo bible

MACAAFA FAARFANNAA 132

¹Yaa Waaqayyo, Daawitin, wanta inni itti dadhabe hundumaas yaadadhu!

²Waaqayyoof attam akka kakate, aango-qabeessa isa kan Yaaqoobiif attam akka wareege,

³?Ani matumaa godoo isa ani keessa jiraadhutti hin galu, siree ani irra ciisuttis ol hin ba'u;

⁴ani hirriba ija kootti hin fidu, mugaatiifis baallee ija koo wal irra hin buusu.

⁵Hamma ani Waaqayyoof iddoo, aango-qabeessa isa kan Yaaqoobiif buufata arguutti hin boqodhu? jedhe*.[460]

⁶Efraataatti waa'ee sanduuqa kakuu dhageenye, bakkee Yaa'arittis isa argine*;

⁷kottaa gara iddoo buufata isaa in dhaqnaa, ejjeta miilla isaa jalattis isaaf in sagannaa!

⁸Yaa Waaqayyo, ati gara iddoo boqonnaa keetti ka'i! Sanduuqi kakuu inni aangoo kee mul'isus sii wajjin haa dhaqu*!

⁹Luboonni kee qajeelummaa haa uffatan, warri siif of kennanis sagalee gammachuu haa dhageessisan![461]

¹⁰Sababii garbicha kee Daawitiif jedhii, fuula isa dibdee moosiftee of irraa hin deebisin!

¹¹Waaqayyo dhugaadhaan Daawitiif kakateera, kakaa isaa irraas hin gara galu; ?Warra si irraa dhalatan keessaa nama tokko, teessoo kee irra nan kaa'a*.

¹²Ilmaan kee kakuu koo yoo eegan, abboommii dhugaa anaaf ba'u isa ani isaan barsiisus yoo eegan, ilmaan isaaniis immoo bara hundumaaf, teessoo kee irra in taa'u? jedheera.[462]

¹³Waaqayyo Xiyoonin fo'ateera, lafa taa'umsa isaa ishee godhachuuf fedheera*.

¹⁴?Kun bara hundumaaf iddoo boqonnaa koo ti; kanas waanan fedheef, ani addana nan buufadha*.

¹⁵Waan namoonni ishee nyaataaf argatan baay'ee nan eebbisa, hiyyeessota ishees buddeena nan quufsa.

¹⁶Luboota isheetti fayyina nan uffisa, ishee keessaa warri Waaqayyoof of kennanis sagalee gammachuu guddisanii in dhageessisu.

¹⁷Achitti Daawitiif gaanfi humna argisiisu akka biqiluuf nan godha, isan ofii dibee moosiseef ani ibsaa qopheesseera*.

¹⁸Diinota isaatti yeelloo nan uffisa, isa irraa garuu gonfoon isaa tal-tal in jedha? jedheera.[463]