Read west central oromo MACAAFA FAARFANNAA 135 Bible Online

MACAAFA FAARFANNAA 135 - west central oromo bible

MACAAFA FAARFANNAA 135

¹Waaqayyoon jajadhaa, maqaa Waaqayyoo jajadhaa! Isin yaa hojjetoota Waaqayyoo, jajadhaa!

²Mana Waaqayyoo keessa, oobdii mana Waaqayyo keenyaa keessas warri dhaabattan, jajadhaa!

³Waaqayyo gaarii waan ta'eef, isa jajadhaa! Maqaa isaa isa namatti tolu faarfadhaa!

⁴Waaqayyo Yaaqoobin fo'ateera, Israa'elin dhuunfaa isaa godhateera*.[466]

⁵Waaqayyo guddaa akka ta'e, gooftaan keenyas waaqayyolii hundumaa akka caalu anoo beeka*.

⁶Bantii waaqaa irratti, lafa irrattis, galaanotaa fi tuujjuba hundumaa keessatti, Waaqayyo waanuma isatti tole in hojjeta.

⁷Inni duumessoota andaara lafaatii ol in kaasa, bokkaa duukaa balaqqeessa in fida, qilleensas gombisaa isaa keessaa in baasa*.[467]

⁸Inni nama yookiis horii angafa ta'ee warra Gibxiif dhalate in dha'e*.

⁹Yaa biyya Gibxi, inni si keessatti Fara'oonii fi hojjetoota isaa hundumaa irratti milikkita argisiisee dinqii hojjeteera*.

¹⁰Inni saba baay'ee rukute, mootota jajjaboo ajjeese;

¹¹Sihoonin mootii Amoorotaa, Oogin mootii biyya Baashaan, mootummoota Kana'aan hundumaas isatu balleesse;

¹²inni biyya isaanii akka dhaalaatti, saba isaa Israa'eliif dhuunfaa godhee kenneef*.[468]

¹³Yaa Waaqayyo, maqaan kee kan bara baraatti; seenaan kees yaa Waaqayyo, dhalootaa hamma dhalootaatti in yaadatama*.

¹⁴Waaqayyo saba isaatiif dhugaa in baasa, hojjetoota isaatiifis in oo'a*.[469]

¹⁵Waaqayyoliin saba lafa irraa meettii dha, warqee dha, harka namaatiin hojjetamanis;

¹⁶afaan itti jira, garuu dubbachuu hin danda'an, iji itti jira, garuu arguu hin danda'an;

¹⁷gurri itti jira, garuu ittiin hin dhaga'an, afaan itti jira, garuu hafuurri isaan keessa hin jiru.

¹⁸Warri isaan tolchan, warri isaan amanatanis hundinuu akuma isaanii ti*.[470]

¹⁹Yaa mana Israa'el, Waaqayyoon ulfinaan jajadhaa! Yaa mana Aaron, Waaqayyoon ulfinaan jajadhaa!

²⁰Yaa mana Lewwii, Waaqayyoon ulfinaan jajadhaa! Isin warri Waaqayyoon sodaattan, Waaqayyoon ulfinaan jajadhaa!

²¹Waaqayyo inni Yerusaalem jiraatu, Xiyoon keessatti ulfinaan haa jajamu! Waaqayyoon jajadhaa*![471]