Read west central oromo MACAAFA FAARFANNAA 145 Bible Online

MACAAFA FAARFANNAA 145 - west central oromo bible

MACAAFA FAARFANNAA 145

¹Yaa Waaqayyo mootii ko, guddina kee nan beeksisa, yeroo hundumaa baruma baraan maqaa kee nan eebbisa.

²Guyyuma guyyaan ulfinaan sin jajadha, yeroo hundumaas baruma baraan maqaa kee nan jajadha.

³Waaqayyo guddaa dha, guddisee kan jajamuu dha; guddinni isaas qoramee bira hin ga'amu.

⁴Dhaloonni tokko hojii kee dhaloota isa kaanitti in jaja, hojii aangoo kees in labsa*.

⁵Isaan waa'ee simboo ulfina kee, waa'ee surraa kee, waa'ee hojii kee isa dinqisiisaas itti yaadanii in dubbatu*.

⁶Isaan waa'ee aangoo hojii kee isa guddaa sodaachisaa in dubbatu; anis guddina kee nan hima.

⁷Isaan seenaa baay'ina arjummaa kee gad in jijjigsu, qajeelummaa kees sagalee gammachuutiin in dhageessisu.[507]

⁸Waaqayyo araara-qabeessaa fi oo'a-qabeessa; aariitti suuta in jedha, gaarummaan isaas guddaa dha*.

⁹Waaqayyo nama hundumaaf gaarii dha; hojii harka isaa hundumaafis in oo'a.

¹⁰Hojiin harka kee hundinuu galata siif in galchu, yaa Waaqayyo, warri siif of kennan hundinuus ulfinaan si jaju!

¹¹Isaan waa'ee ulfina mootummaa kee in dubbatu, waa'ee hojii aangoo kees in himu.

¹²Hojii kee isa aango-qabeessa, ulfina mootummaa kee isa simbo-qabeessas, ilmaan namootaatti beeksisuudhaaf kana in godhu.

¹³Mootummaan kee mootummaa baraaf bara hundumaa ti, mo'uun kee dhalootaa hamma dhaloota hundumaatti; [Waaqayyo dubbii isaa hundumaatti amanamaa dha, hojii isaa hundumaattis gaarummaa in argisiisa.][508]

¹⁴Waaqayyo warra kufuuf jedhan hundumaa qabee in oolcha, warra gad deebi'an hundumaas ol in kaasa*.

¹⁵Iji hundinuu abdiidhaan si eeggata, atis soora isaanii yeroo ta'utti isaaniif in laatta.

¹⁶Ati harka kee in diriirsita, fedha warra lubbuu qaban hundumaas in quufsita*.[509]

¹⁷Waaqayyo karaa hojjetu hundumaatti qajeelaa dha, hojii isaa hundumaattis gaarummaa in argisiisa.

¹⁸Waaqayyo warra isa waammatan hundumaatti, warra dhugaadhaan isa waammatan hundumaatti dhi'oo dha*.

¹⁹Inni fedha warra isa sodaatanii fiixaan in baasa; iyya isaaniis immoo in dhaga'a, isaan in oolchas*.

²⁰Waaqayyo warra isa jaallatan hundumaa in eega, warra jal'oota hundumaa garuu in balleessa*.[510]

²¹Afaan koo jajannaa Waaqayyoo haa dubbatu! Foon kan uffate hundinuus yeroo hundumaa, baruma baraan maqaa isaa isa qulqulluu haa eebbisu!