Read west central oromo MACAAFA FAARFANNAA 147 Bible Online

MACAAFA FAARFANNAA 147 - west central oromo bible

MACAAFA FAARFANNAA 147

¹Waaqayyoon jajadhaa! Waaqayyo keenya jajatanii faarfachuun attam gaarii dha! Isa jajachuun namatti in tola, in ta'as*.

²Waaqayyo, Yerusaalemin deebisee in ijaara; namoota Israa'el warra bittimfaman walitti in qaba*.

³Inni warra garaan isaanii cabee in fayyisa, madaa isaaniis walitti qabee in hidhaaf*.[514]

⁴Urjoota isatu lakkaa'ee kaa'e, hunduma isaaniis maqaa maqaadhaan in waama*.

⁵Gooftaan keenya guddaa dha, aangoo guddaas qaba; hubannaan isaa hammana hin jedhamu.

⁶Waaqayyo, warra gad deebi'an ol in qaba; warra jal'oota garuu lafatti in dabala*.[515]

⁷Faarfachuudhaan Waaqayyoof galata galchaa, kiraara rukutuudhaan Waaqayyo keenya faarfadhaa!

⁸Inni waaqatti duumessoota in uffisa, lafa bokkaa in argachiisa, tulloota irratti marga in biqilcha.

⁹Inni horiidhaaf nyaata isaanii in kenna ilmaan qurruus yeroo iyyanitti isaan in soora*.

¹⁰Inni jabina fardaatti hin gammadu, miillaan fiiguun namaas isatti hin tolu.

¹¹Warri Waaqayyoon sodaatanii gaarummaa isaas abdiidhaan eeggatan garuu isatti in tolu*.[516]

¹²Yaa Yerusaalem, jajuu Waaqayyoo faarfadhu! Waaqayyo kee jajadhu, yaa Xiyoon!

¹³Innoo danqaraa balbala kelloota keetii in jabeessa, ilmaan kee kellaa kee keessatti in eebbisa.

¹⁴Daarii kee nagaa in godha, qamadii isa caaluunis sin quufsa.

¹⁵Abboommii isaa gara lafaatti in erga, dubbiin isaa ariifatee waliin in ga'a*.

¹⁶Cabbii akka jirbii in diriirsa, qorra akka hurrii addaatus akka daaraa in facaasa.

¹⁷Inni cabbii akka dhagaatti gad in daddarbata, qorra sanas eenyutu obsee dhaabachuu danda'a?

¹⁸Inni dubbii isaa in erga, cabbii sanas in baqsa; qilleensi akka qilleensa'u in godha, cabbiin sunis bishaan ta'ee in yaa'a*.[517]

¹⁹Waaqayyo dubbii isaa Yaaqoobitti, seerrata isaa, wanta qajeelaa ta'ee isa duratti fudhatames Israa'elitti in hima.

²⁰Inni saba biraatiif akkas hin goone; wanta qajeelaa ta'ee isa duratti fudhatame sana isaan immoo hin beekan! Waaqayyoon jajadhaa*![518]