Read west central oromo MACAAFA FAARFANNAA 33 Bible Online

MACAAFA FAARFANNAA 33 - west central oromo bible

MACAAFA FAARFANNAA 33

¹Isin qajeelota nana, Waaqayyotti gammaduu keessan guddisaa dhageessisaa! Waaqayyoon jajachuun warra qajeelotaaf in ta'a.

²Kiraaraan Waaqayyoon galateeffadhaa, mi'a ribuu kudhan qabuun isa faarfadhaa!

³Faarfannaa haaraadhaan isa faarfadhaa! Ribuu mi'ichaa ba'eessa godhaa bubbutaa, gammaduu keessan guddisaa dhageessisaa*![109]

⁴Dubbiin Waaqayyoo qajeelaa dha, hojiin isaa hundinuu immoo amanamaa dha.

⁵Inni qajeelummaa fi wanta seeraan eegame in jaallata, laftis gaarummaa Waaqayyootiin guutuu dha.

⁶Bantiiwwan waaqaa dubbii Waaqayyootiin, wanti bantiiwwan waaqaa keessatti argamanis hafuura afaan isaa keessaa ba'uun hojjetaman*;

⁷galaana akka tuullaa midhaaniitti walitti in sassaaba, bishaan baay'ees wanta akka gombisaatti in galcha*.[110]

⁸Biyyi lafaa guutummaatti Waaqayyoon haa sodaatu, namoonni lafa irra jiraatan hundinuu isaaf safuu haa buufatan!

⁹Inni in dubbate, wanti inni dubbates in ta'e; inni in abboome, wanti inni abboomes ka'ee dhaabate*.[111]

¹⁰Waaqayyo maree saba lafa irraa in diiga, yaadni namoonni qopheessanis hojii irra akka hin oolle in godha*;

¹¹mareen Waaqayyoo garuu bara baraan in dhaabata, yaadni garaa isaas dhalootaa hamma dhalootaatti in hojjeta.

¹²Sabni gooftaan kun Waaqayyo isaa ta'eef, warri Waaqayyo ofiif isaan fo'ates haa gammadan*![112]

¹³Waaqayyo bantii waaqaa keessaa gad in ilaala, ilmaan namootaa hundumaas in arga.

¹⁴Inni iddoo ofii taa'u sanaa, warra lafa irra jiraatan hundumaa in ilaala.

¹⁵Inni guutummaa garaa namootaa tolche, wanta isaan hojjetan hundumaas gargar baasee in beeka*.[113]

¹⁶Mootiin humna baay'inaan mo'icha hin argatu, jagnis humna-jabinaan hin hoofkalu.

¹⁷?Fardi mo'ichaaf nama in gargaara? jechuun gowwummaa dha, humna isaa isa jabaadhaanis nama hin oolchu*.

¹⁸Kunoo! Iji Waaqayyoo warra isa safeeffatan, warra gaarummaa isaa abdiidhaan eeggatanis in to'ata.

¹⁹Inni lubbuu isaanii du'a in oolcha, beela keessattis jireenyatti isaan in eega*.[114]

²⁰Lubbuun keenya abdiidhaan Waaqayyoon in eeggatti, inni gargaarsa keenyaa fi gaachana keenya.

²¹Eyyee, garaan keenya isatti in gammada, maqaa isaa isa qulqulluus in amananna.

²²Abdiidhaan akkuma si eegganne, yaa Waaqayyo, gaarummaan kee nuuf haa ta'u!