Read west central oromo MACAAFA FAARFANNAA 34 Bible Online

MACAAFA FAARFANNAA 34 - west central oromo bible

MACAAFA FAARFANNAA 34

¹Ani yeroo hundumaa maqaa Waaqayyoo nan eebbisa, jajuun isaas takkaa afaan koo keessaa hin bu'u.

²Lubbuun koo Waaqayyoon of in jajji, warri gadadamanis kana dhaga'anii haa gammadan!

³Anaa wajjin guddina Waaqayyoo odeessaa, kottaa walii wajjinis maqaa isaa ol in kaafnaa!

⁴Ani Waaqayyoon barbaaddadhe, innis ana jalaa owwaate, sodaa koo hundumaa keessaas na baase.

⁵Gara isaa ilaalaa, fuulli keessanis haa ifu! Deebitaniis qaaniidhaan lafa hin ilaaltan.

⁶Namichi gadadamaan kun yommuu iyyate, Waaqayyo isaaf dhaga'ee, rakkina isaa hundumaa keessaas isa in oolche.

⁷Ergamaan Waaqayyoo naannoo warra Waaqayyoon sodaatanii in buufata, inni isaan in oolchas*.[115]

⁸Gaarummaan Waaqayyoo attam akka ta'e, isin miyeeffadhaa ilaalaa! Namni isatti kooluu gale haa gammadu*!

⁹Warri Waaqayyoon sodaatan homaa hin dhaban. kanaaf isin warri isaaf qulqullooftan isa safeeffadhaa!

¹⁰Leenci saafelli iyyuu in dhaba, in beela'as, warri Waaqayyoon barbaaddatan garuu waan gaarii tokko illee hin dhaban*.[116]

¹¹Kottaa, yaa ijoollee na dhaggeeffadhaa, ani immoo Waaqayyoon sodaachuu isin nan barsiisa.

¹²Nama nana, ati jireenya in hawwitaa? Waan gaariitti gammaduufis bara dheeraa jiraachuu in jaallattaa?

¹³Yoos arraba kee hamaattii, afaan kees sossoba dubbachuuttii eegi!

¹⁴Wanta hamaattii fagaadhuu gaariis godhi! Nagaa barbaadii duukaas bu'i!

¹⁵Iji Waaqayyoo gara warra qajeelotaa in ilaala, gurri isaas gara iyya isaanii in dhaggeeffata.

¹⁶Warra hamaa hojjetan garuu seenaa isaanii lafa irraa balleessuudhaaf, Waaqayyo nyaara isaanitti in guura*;

¹⁷yeroo warri qajeelonni gara isaatti iyyan, Waaqayyo in dhaga'a; inni rakkina isaanii hundumaa keessaas isaan in baasa.

¹⁸Waaqayyo warra garaan isaanii cabetti dhi'oo dha, warra yaadni isaanii caccabee bullaa'es in fayyisa*.[117]

¹⁹Wanti hamaan nama qajeelaatti in baay'ata, Waaqayyo garuu kana hundumaa keessaa isa in baasa*.

²⁰Lafee dhagna isaa hundumaa inni in eega, isaan keessaas tokko illee hin cabu.

²¹Hamminni nama jal'aa in ajjeesa; warra nama qajeelaa jibbanittis yakki in murama*.

²²Waaqayyo lubbuu hojjetoota isaa in fura, warra isatti kooluu galan keessaas tokkotti illee yakki hin muramu.[118]