Read west central oromo MACAAFA FAARFANNAA 36 Bible Online

MACAAFA FAARFANNAA 36 - west central oromo bible

MACAAFA FAARFANNAA 36

¹Cubbuun keessa garaa nama jal'aa isa gad fagootti in dubbata; kanaafis Waaqayyoon sodaachuun yaada namichaa keessa hin jiru*.

²Namichi yakka isaa argee akka hin jibbinetti, akka yaada isaatiitti of gowwoomsuu isaa ti.

³Dubbiin afaan namichaa keessaa ba'u haxxumaa fi gowwoomsaa dha, inni ogummaadhaan hojjechuu, waan gaariis gochuu dhiiseera.

⁴Yeroo siree isaa irra jiru illee haxxumaa isaatiif mala in qopheessa, karaa gadhee irra bu'eera, hamaa kan ta'e immoo waan tokko hin tuffatu*.[123]

⁵Yaa Waaqayyo, gaarummaan kee hamma bantiiwwan waaqaa, amanamummaan kees hamma duumessootaa in ga'a*;

⁶qajeelummaan kee akka tulloota kee jabaatee in dhaabata, firdiin ati kennitus, akka lolaa guddaa ittisa hin qabnee ti; nama, horii, bineensas situ gargaaree oolcha, yaa Waaqayyo*![124]

⁷Yaa Waaqayyo, gaarummaan kee attam guddaa dha, dinqisiisaa dhas, ijoolleen namootaa gaaddisa bobaa kee jalatti kooluu in galu*;

⁸isaan wanta mana kee keessa guuteen cidha in godhatu, bishaan laga gammachuu keetiis akka dhugan in goota;

⁹burqaan jireenya kennu si bira waan jiruuf, ifa keetiin ificha in argina*.[125]

¹⁰Gaarummaa kee warra si beekaniif, qajeelummaa kees warra gara-qajeelotaaf ittuma fufi!

¹¹Miilli warra of bokoksanii ana irra hin ejjetin, harki warra jal'ootaas oofee biyyaa ana hin baasin!

¹²Ilaa! Warri hamaa godhan gad darbatamanii kufan; deebi'aniis ka'uu hin dandeenye.