Read west central oromo MACAAFA FAARFANNAA 42 Bible Online

MACAAFA FAARFANNAA 42 - west central oromo bible

MACAAFA FAARFANNAA 42

¹Borofni akkuma bishaan yaa'u argachuu yaadu, lubbuun koos akkasuma si yaaddi, yaa Waaqayyo!

²Lubbuun koo Waaqayyoon immoo, Waaqayyoon isa jiraataa akka bishaanii in dheebotti; yooman dhufa, Waaqayyo koo durattis yooman argama*!

³Namoonni guyyuma guutuu, ?Waaqayyo kee eessa jira?? anaan in jedhu; kanaafis guyyaa fi halkan imimmaan soora anaaf in ta'e*.[152]

⁴Ani tuuta sanaa wajjin, saba ayyaaneffachaa ture wajjinis, sagalee gammachuu guddaa fi faarfannaa galataatiin, tooraan gara mana Waaqayyootti attamitti akkan adeeme, nan yaadadha; yeroon kana yaadadhus lubbuun koo na keessaa in sokka*.

⁵Yaa lubbuu ko, maaliif akkas gadditee dhiphatta? Maaliifis akkas ana keessatti gabii dhabda? Ati Waaqayyoon abdiidhaan eeggadhu! Anoo deebi'ee gargaarsa isa biraa anaaf dhufuuf, Waaqayyo koo ta'uu isaatiifis isa jajachuufan jira*!

⁶Lubbuun koo ana keessatti gadditee dhiphatteetti, kanaafis ani biyya Yordaanosii fi Hermoonii, tulluu Mizaar gubbaadhaas sin yaadadha.

⁷Yeroo bishaan kee huursutti, tuujjubni tuujjuba akka isaatii in waama; dha'aan kee fi tuulamee darbatamuun bishaan kee ana irra yaa'an*.

⁸Waaqayyo gaarummaa isaa guyyaa akka abboomutti, halkan isa nan faarfadha, kadhatas gara Waaqayyoo jireenya kootiitti nan dhi'eessa.[153]

⁹Anis kattaa koo Waaqayyoon, ?Ati maaliif na irraanfatte? Sababii cunqursaa diina koofis, maaliifan boo'aa adeema?? nan jedha*.

¹⁰Warri na cunqursan guyyuma guutuu, ?Waaqayyo kee eessa jira?? anaan jechuudhaan, anatti ga'isanii lafee koo na cabsan.

¹¹Yaa lubbuu ko, maaliif akkas gadditee dhiphatta? Maaliifis akkas ana keessatti gabii dhabda? Ati Waaqayyoon abdiidhaan eeggadhu! Anoo deebi'ee gargaarsa isa duraa anaaf dhufuuf, Waaqayyo koo ta'uu isaatiifis isa jajachuufan jira![154]