Read west central oromo MACAAFA FAARFANNAA 45 Bible Online

MACAAFA FAARFANNAA 45 - west central oromo bible

MACAAFA FAARFANNAA 45

¹Dubbiin gaariin garaa koo guutee irraa in hafa, wanti ani qopheessu kunis mootiidhaaf in ta'a; arrabni koo akka birii nama waa caafuutti beekamee ti.

²Ilmaan namaa keessaa ati miidhaginaan hundumaa irra in caalta; afaan kees namatti in tola; kanaan Waaqayyo bara baraan si eebbiseera.

³Ati yaa jagnaa, billaa kee mudhii keetti hidhadhu; ulfina kee fi guddina kee argisiisi!

⁴Guddina keetiin ba'i, dubbii dhugaa fi garraamummaaf, qajeelinaaf fe'adhu ka'i! Harki kee mirgaas gocha sodaachisaa sitti in argisiisa!

⁵Xiyyooliin kee qara-qabeeyyii dha, onnee diinota mootichaas in waraanu, sabni warri kaan immoo si jalatti in kufu.

⁶Teessoon kee inni Waaqayyo siif kenne, yeroo hundumaaf kan bara baraa ti, uleen mootummaa kees ulee qajeelummaa ti;

⁷ati qajeelina jaallattee jal'ina jibbite, kanaaf Waaqayyo gooftaan kee dibata gammachuutiin si dibee, hiriyoota kee akka caaltu in godhe*.

⁸Uffanni kee hundinuu qumbiidhaan, sabiriidhaan, solloqqee muka urgooftuutiin in gilimbisa; mana mootummaa isa ilka arbaatiin miidhagfame keessaas, sagaleen mi'a ribuu qabuun dhageessifamu si gammachiisa;

⁹intaloonni moototaa warra si biratti ulfina argatan keessa jiru; misirroon warqee biyya Ofiir naqattes gara mirga kee in dhaabatti.[162]

¹⁰Dhaga'i yaa intalo, as ilaali, gurra kees as qabi, namoota kee, mana abbaa kees irraanfadhu!

¹¹Mootichi miidhagummaa keetiif si hawwa, inni gooftaa kee waan ta'eef, ati ulfina isaaf kenni!

¹²Namoonni Xiiroosii fi sooressonni biyyaa, harka-fudhaa isaanii fidanii sitti dhi'aachuu in barbaadu.

¹³Intalli mootii uffata warqeedhaan kuulame uffattee, ulfinaan diinqa ishee jirti;

¹⁴uffata ishee isa kuula baay'ee qabuun gara mootichaatti in geeffamti, durboonni ishee geggeessanis ishee wajjin gara isaa in dhaqu;

¹⁵yommus isaan gammachuu fi ililleedhaan geggeeffamanii, mana mootichaatti ol in galu.

¹⁶Ilmaan kee iddoo abboota kee in bu'u, ati lafa hundumaatti akka isaan biyya mo'an in goota;

¹⁷dhalootaa hamma dhaloota hundumaatti, maqaan kee galataan akka yaadatamu nan godha; kanaafis namoonni lafa irraa yeroo hundumaa bara baraan si jajatu.