Read west central oromo MACAAFA FAARFANNAA 47 Bible Online

MACAAFA FAARFANNAA 47 - west central oromo bible

MACAAFA FAARFANNAA 47

¹Yaa saba garaa garaa hundumti keessan, harka keessan walitti rurrukutaa! Sagalee keessan ol fuudhaa Waaqayyotti gammaduu keessan dhageessisaa!

²Waaqayyo inni hundumaa gara irraa jiru sodaachisaa dha, inni guutummaa biyya lafaa irratti mootii guddaa dha;

³inni saba garaa garaa harka keenya jala in galche, namoota hundumaas miilla keenya jala kaa'e*.

⁴inni biyya dhaala keenyaa nuuf in fo'a, Yaaqoob inni Waaqayyo jaallatu biyyichaan in koora*.[166]

⁵Waaqayyo gooftaan sagalee gammachuutiin, sagalee fiinootiinis ol ba'eera;

⁶Waaqayyoon faarfannaadhaan jajadhaa! Isa faarfadhaa! Mootii keenya faarfannaadhaan jajadhaa! Isa faarfadhaa!

⁷Waaqayyo mootii guutummaa biyya lafaa waan ta'eef, isa faarfadhaa, mararoodhaan jajadhaa*![167]

⁸Waaqayyo saba warra kaan irratti in mo'a, Waaqayyo teessoo isaa isa qulqulluu irra in taa'a;

⁹gurguddoonni saba garaa garaa, saba Waaqayyoo isa kan Abrahaamitti dabalamanii, walitti sassaabamanii jiru, warri biyyaaf gaachana ta'an kan Waaqayyoo waan ta'aniif, inni guddaa ol kaafameera.