Read west central oromo MACAAFA FAARFANNAA 57 Bible Online

MACAAFA FAARFANNAA 57 - west central oromo bible

MACAAFA FAARFANNAA 57

¹Araara anatti argisiisi, yaa Waaqayyo! Lubbuun koo kooluu waan sitti galteef, araara anatti argisiisi! Badiisi jabaan hamma darbutti, ani gaaddisa bobaa kee jalatti kooluu nan gala*.

²Waaqayyo isa hundumaa gara irraatti, Waaqayyo isa dubbii koo anaaf raawwatutti nan iyyadha.

³Nama arrabsee na ari'u jalaa na oolchuudhaaf, inni waaqa irraa in erga; Waaqayyo gaarummaa isaa fi amanamummaa isaa in erga.[197]

⁴Warra akka leencaa nama nyaachuu kajeelanii ija isaanii bobeessan gidduu nan ciisa; ilkaan isaanii akka eeboo fi akka xiyyaa ti, arrabni isaaniis akka billaa qaramaa ti.

⁵Bantiiwwan waaqaa gara irraatti ol ka'i, yaa Waaqayyo! Ulfinni kees lafa hundumaa irratti ol haa jedhu*!

⁶Warri sun miilla koo dura futtaasaa dhaaban, lubbuun koos gadditee gad deebite; boolla anaaf qotan, ofuma isaaniitii immoo walakkaa isaatti kufan*.[198]

⁷Garaan koo hin shakku, yaa Waaqayyo! Garaan koo hin shakku; sin faarfadha, sagalee mi'a garaa garaas nan dhageessisa.

⁸Yaa lubbuu ko dammaqi, yaa kiraaraa, yaa maseenqoo, dammaqaa! Ani barii lafaa nan dammaqsa.

⁹Ani namoota keessatti sin galateeffadha, yaa gooftaa, saba lafa irraa keessattis faarfannaadhaan sin jajadha;

¹⁰gaarummaan kee hamma bantii waaqaatti in guddata, amanamummaan kees hamma duumessaa in ga'a*.

¹¹Bantiiwwan waaqaa gara irraatti ol ka'i, yaa Waaqayyo! Ulfinni kees lafa hundumaa irratti ol haa jedhu![199]