Read west central oromo MACAAFA FAARFANNAA 59 Bible Online

MACAAFA FAARFANNAA 59 - west central oromo bible

MACAAFA FAARFANNAA 59

¹Diinota koo jalaa na baasi, yaa Waaqayyoo ko! Iddoo warri ana irratti ka'an ana hin qaqqabnettis na eegi;

²warra jal'ina hojjetan jalaa na baasi, warra dhiiga namaa dhangalaasanis na oolchi!

³Ilaa isaan lubbuu koo baasuudhaaf riphanii ana eeggatu, ani immoo namatti hin darbine yookiis hin yakkine, yaa Waaqayyo! Warri humna namatti argisiisan garuu ana irratti wal ga'an.

⁴Ani balleessaa hin qabu, isaan immoo anatti fiiganii dhaabannaa in tolfatu; ka'i, anatti adeemii ana ilaalis!

⁵Ati yaa Waaqayyo gooftaa maccaa, Waaqayyo isa kan Israa'el, saba lafa irraa hundumaatti ilaaluudhaaf ka'i! Warra amanamuu didanii jal'ina hojjetan hundumaatti araara hin argisiisin!

⁶Isaan galgala galgala deebi'anii, akka saree gururi'aa mandaricha keessa in naanna'u.

⁷Kunoo, afaan isaanii keessaa dubbii hin taane in baasu, arrabni isaaniis immoo akka billaa ti; ?Silaa kan nu dhaga'u hin jiru? jechuun yaada isaanii keessa ture.

⁸Ati garuu yaa Waaqayyo, isaanitti in kolfita, saba lafa irraattis in ga'ifta.

⁹Yaa Waaqayyo aangoo ko, ati da'oo koo waan taateef, ani sin eeggadha*,

¹⁰Waaqayyo koo gaarummaa isaatiin gara koo in dhufa; Waaqayyo warra na gaadan asii gad ilaale, akka ani gammadu in godha.[202]

¹¹Namoonni koo akka hin irraanfannetti, tokkichumaan isaan hin ajjeesin! Humna keetiin isaan joorsi, lafatti gad isaan deebisi, yaa gooftaa, yaa gaachana keenyaa!

¹²Warri sun in abaaru, sobas in dubbatu; dubbiin arraba isaanii, cubbuu afaan isaanii keessaa ba'u waan ta'eef, of gurguddisuu isaaniitiin haa qabaman;

¹³dheekkamsa keetiin badduu isaan baasi, badduu baasi, akka isaan hin argamnes godhi! Waaqayyo, ijoollee Yaaqoob irratti hamma andaara lafaattis mootii ta'uu isaa haa beekan!

¹⁴Isaan galgala galgala deebi'anii, akka saree gururi'aa mandaricha keessa in naanna'u.

¹⁵Nyaataaf asii fi achi in jooru, yoo quufuu dadhaban immoo of in nyaatu.

¹⁶Ani garuu waa'ee aangoo kee nan faarfadha, gaarummaa keetiifis ganama ganama sagalee gammachuu nan dhageessisa. ati anaaf da'oo taateetta, guyyaa rakkinni ana irra ga'ettis iddoo baqannaa anaaf taateetta.

¹⁷Yaa Waaqayyo aangoo ko, mi'a garaa garaatiin sin faarfadha, ati da'oo koo ti, Waaqayyo koo isa gaarummaa anatti argisiisuu dhas!