Read west central oromo MACAAFA FAARFANNAA 71 Bible Online

MACAAFA FAARFANNAA 71 - west central oromo bible

MACAAFA FAARFANNAA 71

¹Yaa Waaqayyo, ani kooluu sitti galeera, ati yoom iyyuu akka ani hin yeellaasifamne godhi!

²Ati qajeelummaa keetiin kana jalaa na baasi, na oolchis! Gurra kee gara kootti qabi, na gargaaris!

³Yeroo hundumaa akkan itti deddeebi'utti, ati kattaa ani itti galee jiraadhu anaaf ta'i! Ati kattaa koo fi masaraa koo waan anaaf taateef, ana fayyisuudhaaf abboomteetta*.[242]

⁴Yaa Waaqayyoo ko, harka nama jal'aa keessaa, qabaa nama dalgifamaa, nama humnaan nama irratti hojjetu keessaas ana baasi!

⁵Yaa Waaqayyo gooftaa ko, ati abdii koo ti, ati mucummaa kootii jalqabdee amanannaa koo ti!

⁶Garaa haadha koo keessaa situ na baase, dhalachuu kootii jalqabee sitti irkadheera; yeroo hundumaas sin jajadha*.

⁷Ani namoota baay'eedhaaf nama dinqiin kee irratti mul'atun ta'e; ati immoo isa humna-qabeessa ani kooluu itti galuu dha.

⁸Ani afaan guutee sin jaja, guyyaa guutuus ulfina kee nan hima.[243]

⁹Bara dullumaatti ana hin gatin, yeroo humni koo dhumus ana hin dhiisin*!

¹⁰Diinonni koo waa'ee koo in dubbatu, warri riphanii jireenya koo balleessuu barbaadanis, walii wajjin anatti in koratu;

¹¹isaan, ?Waaqayyo isa dhiiseera, kan isa oolchu hin jiru, duukaa bu'aa qabaa? in jedhu*.[244]

¹²Yaa Waaqayyo, ana irraa hin fagaatin, yaa Waaqayyoo ko, ana gargaaruudhaaf ariifadhu!

¹³Warri diina anatti ta'an haa yeellaasifaman, haa dhumanis, warri miidhama koo barbaadanis arrabsoodhaaf salphina haa uffatan!

¹⁴Ani garuu ittuma fufeen si eeggadha, isa ani ittiin si jajadhu hundumaas ittan caalchisa.

¹⁵Afaan koo qajeelummaa kee in dubbata, lakkoobsa gochaa kee yoon hubachuu dhabaadhe iyyuu, fayyisuu kee guyyaa guutuu nan hima.

¹⁶Yaa Waaqayyo gooftaa, hojii aangoo kee ol fuudhuudhaaf nan dhufa; qajeelummaa isa kan keetii duwwaas jajuudhaan nan yaadadha.

¹⁷Yaa Waaqayyo, mucummaa kootii jalqabdee ati ana barsiifteetta; ani immoo amma iyyuu gocha kee isa dinqisiisaa nan labsa;

¹⁸irree kee dhaloota amma jirutti, aangoo kees dhaloota dhufu hundumaatti hamman himutti, dulloomee mataan koo harrii yoo ta'e illee, ati ana hin dhiisin, yaa Waaqayyo*!

¹⁹Qajeelummaan kee baay'isee ol ka'aadha, yaa Waaqayyo! Ati wanta gurguddaa hojjetteetta, yaa Waaqayyo, kan akka keetii eenyu ree?

²⁰Ati dhiphina baay'ee fi hammina anatti argisiifteetta, deebitees ana in jiraachifta; boolla lafaa isa gad fagoo keessaas deebiftee ol na fidda*.

²¹Ati baay'ee ana in guddifta, deebiftees ana in jabeessita.[245]

²²Anis immoo amanamummaa keef kiraaraan sin galateeffadha, yaa Waaqayyoo ko! Maseenqoodhaanis sin faarfadha, yaa qulqulluu isa kan Israa'el!

²³Yeroo ani faarfannaadhaan si jajadhu, afaan koo, lubbuun koo isheen ati furtes, sagalee gammachuu haa dhageessisan!

²⁴Warri miidhama koo barbaadan yeella'anii waan qaana'aniif, arrabni koos immoo guyyaa guutuu waa'ee qajeelummaa kee haa dubbatu!