Read west central oromo MACAAFA FAARFANNAA 73 Bible Online

MACAAFA FAARFANNAA 73 - west central oromo bible

MACAAFA FAARFANNAA 73

¹Waaqayyo saba Israa'eliif, warra garaan isaanii qullaa'aa ta'eef dhuguma gaarii dha!

²Waa'ee kootiif yoo ta'e garuu, miilli koo bitintiree kufuu ga'eera, ejjennaan koos mucucaachuuf xinnootu hafe.

³Warri jal'oonni nagaatti jiraachuu isaanii yeroon arge, warra of jajan kanatti weenna'een ture*.[251]

⁴Isaan dhiphina hin qaban, dhagni isaanii fayyaa dha, gabbataa dhas;

⁵rakkinni nama irra ga'u isaan irra hin geenye, akka namoota biraas dha'ichi isaanitti hin buune.

⁶Kanaaf of koorsuu akka naqata mormaatti in kaa'atu, humnaan nama irratti ka'uus akka wayyaatti in uffatu;

⁷ija isaanii coomatu bobbokokse, inni isaan garaatti yaadan guutee irra dhangala'e;

⁸isaan in gai'su humnaan waa'ee nama cunqursuu in dubbatu, nama gara irraa goraniis achii gad in dubbatu*.

⁹Afaaniin bantii waaqaa bira in ga'u, arrabni isaaniis biyya lafaa waliin in ga'a;

¹⁰kanaaf sabni Waaqayyo illee isaanitti in gora, waanuma isaan jedhanis safara malee akka bishaanii in dhuga.

¹¹Isaan immoo, ?Waaqayyo attamitti beekuu danda'a ree? Isa hundumaa gara irraa biras waa beekuun jiraa ree?? in jedhu*.[252]

¹²Ilaa! Jal'oonni warra akkasiiti, yeroo hundumaa of irraa bu'anii in jiraatu, jabaachaas in adeemu.

¹³Yoos immoo ani ofumaan garaa koo qulqullinatti eeggachuuf dhama'ee ree? Yakka akkan hin qabne argisiisuufis ofumaan harka koo dhiqadhee ree*?

¹⁴Guyyaa guyyaatti dha'ichi anatti bu'eera, ganama ganamas adabamuun na eeggata ture.

¹⁵Utuun, ?Akkuma isaanii nan dubbadha? jedheera ta'ee, dhaloota ijoolleen kee keessa jiran biratti amanamuu dhabee, isaanis akka gara gaggalan nan godhan ture.

¹⁶Yeroo ani kana hubachuuf jedhee itti yaade immoo, rakkisaa ta'ee anatti argame.

¹⁷Hamma ani mana qulqullummaa Waaqayyootti galee, jarri sun gara dhumaatti maal akka ta'an hubachuu bira ga'etti, na rakkise.[253]

¹⁸Dhuguma iyyuu ati lafa mucucaatu irra isaan in dhaabachiifta, kukkufanii akka caccabanis in goota.

¹⁹Attamitti batalatti badiisi sodaachisaan isaan irra ga'e, attamittis dhidhimanii naasuu guddaadhaan xaph jedhan!

²⁰Akka wanti abjuudhaan argan yeroo dammaqan dhabamu, akkasumas yaa gooftaa, ati yommuu kaatu, bifa isaanii akka waan hin jirreetti in ilaalta.

²¹Yommuu jireenyi anatti hadhaa'e, yeroo onnee na tumates,

²²ani nama gowwaa, nama waa hubachuu hin dandeenye ta'e, si duratti akkuma horii marga dheeduun ture.

²³Haa ta'u iyyuu malee, ani yeroo hundumaa si biratti nan hafa, atis harka koo mirgaa in qabda*;

²⁴ati gorsa keetiin ana in geggeessita, kana booddees ulfinatti ana in fudhatta*.

²⁵Waaqa irratti si malee eenyuun nan qabaadha ree? Lafa irrattis si malee maalan eeggadha ree?

²⁶Foon koo, keessi namummaa koos yoo gad dhuman iyyuu, Waaqayyo garaa koo in jajjabeessa, bara baraanis qooda anaaf in ta'a*.[254]

²⁷Kunoo, warri si irraa fagaatan in balleeffamu, warra amanamuu dhiisanii kan biraatti goranis ati in fixa.

²⁸Waa'ee koof yoo ta'e garuu, Waaqayyotti dhi'aachuun anaaf gaarii dha; yaa Waaqayyo gooftaa, hojii kee hundumaa himuudhaaf, ani da'oo si godhadheera.