Read west central oromo MACAAFA FAARFANNAA 74 Bible Online

MACAAFA FAARFANNAA 74 - west central oromo bible

MACAAFA FAARFANNAA 74

¹Yaa Waaqayyo, ati maaliif raawwattee nu gatta? Hoolota tika kee jala jiran irrattis, dheekkamsi kee maaliif boba'a*?

²Waldaa kee isa durii durii jalqabdee kan kee godhatte, isa gosa dhuunfaa kee godhachuudhaaf furte, tulluu Xiyoon isa iddoo buufata kee godhattes yaadadhu*!

³Diinni waanuma mana qulqullummaa keessa jiru balleesseera, faana kee gara isa diigamee akkasitti hafe kanaatti qajeelfadhu*![255]

⁴Warri si irratti ka'an iddoo walga'ii isa kan keetii keessa lixanii bookkisaniiru, milikkita ofii ittiin beekamanis dhaabbataniiru;

⁵akka namoota qottoowwan isaanii mukeetii gobbuu irratti ol fudhatanii, isaanis ofii isaaniitii kanaan in beekaman.

⁶Achumaanis muka isaa isa bifa qiqqirixamaa argisiisu, walitti qabaa isaa qottoodhaaf burruusaan kukkutanii in caccabsan.

⁷Iddoo kee isa qulqullaa'aatti ibidda naqan, iddoo buufata maqaa kees lafatti dabalanii xureessan*.

⁸Garaa isaaniittis, ?Walitti qabaa isaanii lafa irraa in balleessina? jedhan; biyya sana keessaa iddoo itti wal ga'an isa kan Waaqayyoo hundumaa in guban.[256]

⁹Nuyi milikkitoota garaa garaa achi nuuf kaa'aman hin arginu, raajiin tokko illees hin jiru, kun hamma yoomiitti akka turu immoo, nu keessaa namni beeku hin jiru.

¹⁰Hamajaajiin hamma yoomiitti arrabsa, yaa Waaqayyo, diinni hamma bara baraatti maqaa kee haa tuffatuu ree?

¹¹Ati maaliif harka kee deebifatta? Harka kee mirgaa hiikkadhuu lafa irraa isaan balleessi!

¹²Haa ta'u iyyuu malee, Waaqayyo mootiin koo kan durii durii ti, irra lafaa keessattis gocha fayyisuu isaa hundumaa in raawwata.

¹³Ati aangoo keetiin galaana gargar hirtee, mataa bineensota akka jawwee galaanatti galaniis bishaan irratti in caccabsite*.

¹⁴Ati mataa baay'ee isa kan lewaataan bineensicha guddichaa in hurreessite, isas bineensota lafa onaa keessa jiraataniif nyaata gootee in laatteef.

¹⁵Ati burqituu fi yaatuun akka bubbisan in goote, laga takkaa hin gognes in gogsite.

¹⁶Guyyaan kan kee ti, halkanis immoo kan kee ti, biiftuu fi ibsaa warra kaanis situ cimsee dhaabe*.

¹⁷Daarii lafaa hundumaa situ dhaabe, bonaa fi gannas situ uume.[257]

¹⁸Yaa Waaqayyo, diinni attam akka si arrabsu, sabni gowwaanis maqaa kee attam akka tuffatu yaadadhu!

¹⁹Lubbuu warra kan keetii warra akka gugee, bineensa caakkaatti hin kennin; jireenya warra gadadamoo kan keetiis, bara baraan hin irraanfatin!

²⁰Biyyicha keessaa iddoowwan dhokannaa warri dukkanaa'on, humnaan nama irratti ka'uudhaan waan guutaniif, ati immoo kakuu kee yaadadhu!

²¹Warri gadadamoonni qaana'anii akka deebi'an hin godhin! Warri gad deebi'anii fi warri dhaban maqaa kee haa jajatan!

²²Ka'i, yaa Waaqayyo dubbii kee falmadhu, warri gowwaan guyyaa guutuu akka si arrabsan yaadadhu!

²³Ati iyyuu hamajaajii keetii, caraanuu warra si irratti ka'anii isa yeroo hundumaa gara keetti ol ka'u hin irraanfatin!