Read west central oromo MACAAFA FAARFANNAA 78 Bible Online

MACAAFA FAARFANNAA 78 - west central oromo bible

MACAAFA FAARFANNAA 78

¹Yaa saba ko, gurra keetiin barsiisa koo dhaggeeffadhu, gurra kee gara dubbii afaan koo keessaa ba'uutti qabi!

²Ani jecha ogummaatiin afaan koo nan saaqadha, jecha dhokataa durii duriis bakkeetti nan baasa*.[267]

³Dubbii nuyi dhageenyee, beekuu bira geenyes, isa abboonni keenya nutti himan,

⁴gocha gooftichaa isa jajamaa fi aangoo isaa, dinqii inni hojjetes, nuyi dhaloota dhufutti in himna malee, ijoollee isaanii jalaa hin dhoksinu*!

⁵Inni abboommii isaaf dhugaa ba'u Yaaqoob keessatti jabeesse, seera isaas Israa'el keessatti dhaabateera; isaan kanas ijoollee isaanii akka barsiisaniif, inni abboota keenya in ajaje.

⁶Egaa, dhaloonni itti aanu isaan kana akka beekutti, warri amma illee hin dhalatin ka'anii, dabarsanii ijoollee isaaniitti haa himan!

⁷Isaanis immoo amanannaa isaanii Waaqayyo irra akka kaa'ataniif, abboommota isaas haa eegan malee, hojii Waaqayyoo hin irraanfatin,

⁸akkasumas akka abaabilii isaanii, warra boqu-jabeeyyii, warra isa irratti ka'anis, warra yaadni isaanii waan tokkotti jabaatee hin dhaabanne, hafuurri isaaniis Waaqayyo isaaniif kan hin amanamne hin ta'in*![268]

⁹Ilmaan Efreem warri iddaa fi xiyya baatan, guyyaa lolaatti gara booddee isaanii deebi'an;

¹⁰isaan kakuu Waaqayyoo hin eegne, akka seera isaattis deddeebi'uu in didan.

¹¹Isaan wanta inni hojjete, dinqii inni isaan argisiises in irraanfatan.

¹²Biyya Gibxitti, bakkee Zo'aanitti, fuula abboota isaanii duratti Waaqayyo hojii dinqisiisaa in hojjete;

¹³inni galaana gargar hiree, gidduu isaan dabarse, bishaanis akka tuullaatti akka dhaabatu godhe*.

¹⁴Guyyaa duumessaan, halkan guutuu immoo ibsaa ibiddaatiin isaan in geggeesse*.

¹⁵Inni lafa onaa keessatti kattaa dhoosee, bishaan baay'ee akka galaanaa kenneefii isaan obaase;

¹⁶kattaa keessaa bishaan in yaase, akka lagaatti isa keessaa akka lola'u in godhe*.[269]

¹⁷Isaan garuu ittuma dabalanii isa in yakkan, lafa onaattis aabba guddicha irratti in ka'an;

¹⁸nyaata dharra'an sana ?Fidi? jechuu isaaniitiin, Waaqayyoon garaa isaaniitti in qoran.

¹⁹Isaan Waaqayyo irratti in dubbatan, ?Waaqayyo lafa duwwaatti maaddii dhi'eessuu danda'aa ree?

²⁰Eyyee, inni akka bishaan keessaa futta'utti kattaa rukuteera; lagoonni bishaan keessaa yaa'anis argamaniiru; amma immoo inni buddeena kennuu in danda'aa ree? Saba isaatiifis foon in argaafii ree?? jedhan*.[270]

²¹Kanaafis Waaqayyo kana dhaga'ee dheekkamsi isaa in boba'e, ibiddi Yaaqoobitti in qabate, aariin isaas Israa'el iratti in jabaate*.

²²Isaan Waaqayyotti hin amanne, gargaarsa isaas hin amananne.

²³Utuma ta'uu iyyuu inni ol gara irraadhaa duumessoota ajajee, balbaloota waaqaas in bane;

²⁴Maannaa akka nyaataniif gad isaaniif in roobse, midhaan waaqa irraas isaaniif in kenne*.

²⁵Inni nyaata isaan quufsu isaaniif in erge; namnis buddeena ergamoota warra waaqa irraa in nyaate.

²⁶Inni qilleensi ba'a-biiftuu waaqa keessa akka qilleensa'u godhe, humna isaatiinis qilleensa gara mirgaa gad in baase.

²⁷Inni foon akka biyyoo lafaa, simbirrootas akka cirracha galaanaa isaan irratti gad roobse.

²⁸Isaan kun safara isaanii keessatti, naannoo lafa buufata isaaniittis akka bu'an godhe.

²⁹Inni wanta isaan dharra'an waan isaaniif kenneef, isaanis nyaatanii ba'eessa godhanii in quufan*.

³⁰Garuu sassanni isaanii utuu irraa hin galin, nyaatichis amma iyyuu afaan isaanii keessa utuu jiruu,

³¹dheekkamsi Waaqayyoo isaan irratti ka'ee, isaan keessaa warra jajjaboo in ajjeese; Israa'el keessaas dargaggoota in kukkufise*.[271]

³²Kana hundumaa keessaa immoo isaan ammas cubbuu hojjetan, dinqii inni argisiises hin amananne.

³³Kanaaf guyyoonni isaanii akka qilleensa shuf jedhuu ti, waggoonni isaaniis wanta itti hin yaadaminiin akka dhuman in godhe.

³⁴Yeroo inni isaan keessaa ajjeesetti isa in iyyaafatan, gara isaatti deebi'anii dhimmanii isa in barbaadan.

³⁵Isaan kattaan isaanii Waaqayyo akka ta'e, Waaqayyo inni hundumaa gara irraa jirus furee isaanii akka ta'e in yaadatan.

³⁶Isaan garuu afaan isaaniitiin isatti kuulan, arraba isaaniitiinis soba itti dubbatan.

³⁷Garaa isaaniitiin garuu isaaf cimoo hin turre, kakuu isaafis hin amanamne.

³⁸Inni garuu oo'a-qabeessa waan ta'eef, yakka isaanii isaaniif in dhiise, lafa irraas isaan hin balleessine; inni yeroo baay'ee aarii isaa gad ittise, dheekkamsa isaa hundumaas ol hin kaafne.

³⁹Inni namoota foonii duwwaa ta'uu isaanii, yookiis akka qilleensa darbuu malee deebi'ee hin dhufne ta'uu isaanii in yaadate*.[272]

⁴⁰Isaan lafa duwwaa keessatti si'a meeqa isa irratti ka'an, si'a meeqas lafa onaa keessatti isa gaddisiisan!

⁴¹Isaan deddeebi'anii isa in qoran, isa qulqulluu kan Israa'elis in aarsan.

⁴²Isaan jabina irree isaa, isa gaafa inni qabaa hamajaajii keessaa isaan fure yaadatti hin qabanne.

⁴³Yeroo inni Gibxitti milikkitoota argisiisee, dinqii isaas bakkee Zo'aanitti hojjete,

⁴⁴inni bishaan laga isaanii dhiigatti diddiire, isaan yaatuu keessaas dhuguu hin dandeenye*;

⁴⁵inni gurmuu qarxaasaa isa isaan nyaate, fattees isa biyya isaanii balleesse isaanitti erge*.

⁴⁶Inni midhaan isaanii korophisaaf, ija waan itti dadhabaniis hawaannisaaf kenne*;

⁴⁷muka waynii isaanii cabbiidhaan, harbuu isaaniis qorra itti buusee in balleesse*;

⁴⁸saawwan isaanii cabbiitti, karra horii isaaniis bakakkaatti in kenne;

⁴⁹inni garee ergamoota balleessanii, aarii isaa isa finiinaa, dheekkamsa, komee, rakkinas hiikee isaanitti gad dhiise.

⁵⁰Aarii isaatiif karaa banee gad dhiise, jireenya isaanii dha'icha sanatti kenne malee, inni lubbuu isaanii du'a hin oolchine*.

⁵¹Inni biyya Gibxi keessatti, angafa ta'ee kan dhalate hundumaa, humna isaanii isa jalqabaas godoo ijoollee Kaam sana keessatti rukute*.

⁵²Saba isaa immoo akka hoolotaatti achi keessaa baase; akka karra horiittis lafa onaa keessa karaa isaan argisiise*.

⁵³Inni nagaadhaan isaan in geesse, isaanis hin sodaanne, diinota isaanii garuu galaanatu irra gara gale*;

⁵⁴gara biyya isaa isa qulqullaa'aatti, gara tulluu harki isaa mirgaa qabateettis isaan in fide*.

⁵⁵Inni saba warra kaan fuula isaanii duraa oofee baase, lafas dhaala isaanii godhee muka buusuudhaan isaaniif in hire; gosa Israa'elis godoo isaanii keessa buufachiise*.[273]

⁵⁶Isaan garuu Waaqayyo isa hundumaa gara irraa jiru qoranii isa irrattis in ka'an; abboommii isa isaaf dhugaa ba'us hin eegne*.

⁵⁷Isaan irraa gara galanii akka abboota isaanii haxxumaa hojjetan, akka iddaa qajeeltootti xiyya hin darbannee, isaanis dalga in goran.

⁵⁸Iddoowwan ol ka'oo irratti sagadaniin tuttuqanii isa in aarsan, waaqayyolii tolfamoo isaaniitiinis isa in hinaafsisan*.

⁵⁹Waaqayyo kana dhaga'ee dheekkamsi isaa in boba'e, Israa'elinis raawwatee in tuffate.

⁶⁰Iddoo taa'umsa isaa isa Shiiloo, godoo isa namoota gidduutti keessa buufates in dhiise*.

⁶¹Inni sanduuqa kakuu isa humna isaa argisiisu boojuutti, isa guddina isaa argisiisus harka diinaatti in kenne*.

⁶²Inni saba isaa billaatti dabarsee kenne, warra dhunfaa isaa irratti dheekkamsa isaa in bobeesse.

⁶³Dargaggoota isaanii ibiddatu fixe, durboota isaaniifis weedduun gaa'elaa hin weeddifamneef.

⁶⁴Luboonni isaanii billaadhaan in dhuman, haadhonni hiyyeessaa isaaniis isaaniif boo'uu hin dandeenye*.[274]

⁶⁵Yommus gooftichi akka waan hirribaa dammaquutti, akka loltuu jabaa daadhii waynii quufee dhaadatuuttis in ka'e.

⁶⁶Inni hamajaajii isaa rukutee gara booddeetti isaan deebise, hamma bara baraattis yeellootti isaan kenne*.

⁶⁷Inni godoo Yoseef in tuffate, qomoo Efreemis hin fo'anne;

⁶⁸qomoo Yihudaa garuu, tulluu Xiyoon isa jaallate sanas in fo'ate.

⁶⁹Mana qulqullummaa isaa akka iddoowwan ol ka'ootti in ijaare, akka lafaattis bara baraan hundee isaa jabeessee in dhaabe.

⁷⁰Inni Daawitin hojjetaa isaa in fo'ate, karra hoolotaa keessaas isa in baafate.

⁷¹Haadhotii hoolaa ilmoolee qaban tiksu biraas, Yaaqoobin saba isaa, Israa'elinis dhuunfaa isaa akka tiksuuf isa fide*.

⁷²Kanaaf Daawit garaa qajeelaadhaan isaan tiksee, harka-tolinaanis isaan in geggeesse.[275]