Read west central oromo MACAAFA FAARFANNAA 79 Bible Online

MACAAFA FAARFANNAA 79 - west central oromo bible

MACAAFA FAARFANNAA 79

¹Yaa Waaqayyo, warri saba kee hin ta'in, isa ati dhuunfaa kee godhattetti galaniiru; mana qulqullummaa kee xureessaniiru; Yerusaaleminis lafatti dabalaniiru*;

²isaan, allaattiin qilleensa keessa balali'an reeffa hojjetoota kee, bineensi lafaas foon warra siif of kennanii, akka nyaataniif kennaniiruuf*.

³Naannoo mandara Yerusaalemitti, dhiiga isaanii akkuma bishaanii dhangalaasan, namni awwaalus hin argamne;

⁴nuyi saba ollaa keenya jiraniif muka ga'oo, warra biyya naannoo keenyaafis ceephoo fi tuffiidhaaf taaneerra*.[276]

⁵Yaa Waaqayyo, kun hamma yoomiitti akkas ta'a? Baruma hundumaa in aartaa ree? Hinaaftee dheekkamuun kees ittuma fufee akka ibiddaa in gubaa ree*?

⁶Saba lafa irraa warra si hin beekne irratti, mootummoota maqaa kee hin waammanne irrattis dheekkamsa kee dhangalaasi*!

⁷Isaanoo ijoollee Yaaqoob fixaniiru; qe'ee isaas onsaniiru*.

⁸Yakka abboota keenya warra durii nutti hin yaadatin! Nuyi mataa buufneerra, oo'a keetiin dafii nutti adeemi*![277]

⁹Yaa Waaqayyo isa fayyina nuuf laattuu, ulfina maqaa keetiif jedhii nu gargaari, maqaa keetiif jedhii nu oolchi, cubbuu keenyas nuuf dhiisi!

¹⁰Sabni lafa irraa, ?Waaqayyo isaanii eessa jira?? jechuudhaaf maaliif karaa argatu? Dhiiga hojjetoota kee isa dhangalaafameef, ija keenya duratti gumaa baasuun kee, warra saba kee hin ta'in irratti haa beekamu*!

¹¹Aadnaan warra hidhamanii si bira haa ga'u, irree kee isa cimaadhaan warra du'i itti faradame ati hambisi![278]

¹²Yaa gooftaa, arrabsoo sabni ollaa keenyaa ittiin si arrabsan, harka torba godhii mataa isaaniitti deebisi*!

¹³Nuyi namoonni kee, warri tika kee jala jirru garuu, bara baraan si galateeffanna, dhalootaa hamma dhalootaattis jajuu kee in himna*![279]