Read west central oromo MACAAFA FAARFANNAA 85 Bible Online

MACAAFA FAARFANNAA 85 - west central oromo bible

MACAAFA FAARFANNAA 85

¹Takka biyya keetti faara tolteetta, yaa Waaqayyo! Yaaqoobiif adda kenniteetta;

²saba keef yakka isaa dhiifteettaaf, cubbuun isaanii hundinuus deebi'ee akka hin mul'anne gooteetta.

³Finiina dheekkamsa kee hundumaa irraa deebifteetta, aarii kee isa boba'us dhiifteetta.

⁴Yaa Waaqayyo isa fayyina nuuf laattuu, iddootti nu deebisi; nutti gadduun kee haa hafu!

⁵Ati bara baraan nutti dheekkamtaa ree? Aaruu kees dhalootaa hamma dhalootaatti itti fuftaa ree?

⁶Sabni kee akka sitti gammadutti, deebitee lubbuu nutti hin deebiftuu ree?

⁷Gaarummaa kee nu argisiisi, yaa Waaqayyo, gargaarsa kee isa fayyisu nuuf kenni!

⁸Wanta Waaqayyo dubbatu dhaggeeffachuu nan barbaada; sabni isaa warri isaaf of kennan, gara gowwummaatti hin deebi'in malee, gooftichi nagaa isaanitti in dubbata*.

⁹Dhuguma iyyuu fayyisuun isaa warra isa sodaataniif dhi'oo dha; kanaaf ulfinni biyya keenya keessa in buufata.[296]

¹⁰Gaarummaanii fi amanamummaan wal in argu, qajeelummaa fi nagaan wal in dhungatu.

¹¹Amanamummaan lafa keessaa in biqila, qajeelummaan waaqa keessaa gad in ilaala*;

¹²dhugumaan Waaqayyo waan gaarii in kenna, lafti keenyas midhaan in baasa*;

¹³qajeelummaan fuula gooftichaa dura in adeema, faanni isaas isa duukaa in qajeela*.[297]