Read west central oromo MACAAFA FAARFANNAA 90 Bible Online

MACAAFA FAARFANNAA 90 - west central oromo bible

MACAAFA FAARFANNAA 90

¹Yaa gooftaa, ati dhalootaa hamma dhalootaatti, iddoo kooluu itti gallu nuuf taateetta.

²Tulloonni utuu iddoo isaaniitti hin dhalatin lafti, guutummaan biyya lafaas utuu hin argamin, bara baraa jalqabee hamma bara baraatti ati Waaqayyoo dha.

³Ati, ?Yaa ijoollee namootaa, achitti deebi'aa? in jetta, namas deebiftee biyyoo isa in goota*.

⁴Waggaan kumni tokko, siif akkuma guyyaa kaleessa darbee ti, akkuma darabee dammaqa halkanii tis*.

⁵Ati namoota hartee in dabarsita, isaan akka hirriba ganama nama irraa darbuu ti; isaan akka marga iddoo isaatii baduu ti;

⁶Margi ganama lalisee in daraara, galgala mataa buusee in coollaga*.[313]

⁷Nuyi dheekkamsa keetiin naasifamnee, aarii keetiinis dhumneerra.

⁸Ati irra-daddarbaa keenya of dura, cubbuu keenya isa dhoksaatti hojjennes ifa fuula kee dura keesseetta*.

⁹Guyyoonni keenya hundinuu nuyi dheekkamsa kee jala utuu jirruu darban, akkuma isa yeroo hafuura dheeraa baafannuttis, waggoota keenya in fixna.

¹⁰Barri jireenya keenyaa waggaa torbaatama, yoo baay'ates waggaa saddeetama; wanti isaan keessaa guddaatti lakkaa'amus dadhabbii fi rakkina, isaan dafanii in darbu nuyis baallee baafnee in sokkina.[314]

¹¹Humni aarii keetii eenyutti dhaga'ama? Akka ulfina guddaa isa siif ta'utti, dheekkamsa kee isa guddaa eenyutu hubata ree?

¹²Nuyi ogummaa garaatti akka galfannutti, ati guyyoota jireenya keenyaa lakkaa'uu nu barsiisi*![315]

¹³Hamma yoomiitti dheekkamta? Deebi'i, yaa gooftaa! Garboota keetiif oo'i*!

¹⁴Bara keenya guutuu gammannee akka ililchinutti, ati ganama gaarummaa keetiin nu quufsi!

¹⁵Akkuma guyyoota baay'ee nu gaddisiifte, akkuma waggoota baay'ee itti hamaa argines, amma immoo nu gammachiisi!

¹⁶Hojiin kee garboota keetti, guddinni kees ijoollee isaaniitti akka mul'atu godhi!

¹⁷Waaqayyo keenya gooftichi faara nutti haa tolu, inni hojii harka keenyaas cimsee nuuf haa dhaabu! Eyyee hojii harka keenyaa cimsii dhaabi![316]