Read west central oromo Macaafa Fakkeenyaa 10 Bible Online

Macaafa Fakkeenyaa 10 - west central oromo bible

Macaafa Fakkeenyaa 10

¹Fakkeenyonni Solomoon kanatti aananii jiru; ilmi ogeessi abbaa isaa in gammachiisa, ilmi gowwaan garuu haadha isaa gaddisiisa*.

²Badhaadhummaan jal'inaan argame bu'aa hin qabu, qajeelinni garuu du'a nama in oolcha*.[39]

³Waaqayyo, warri qajeelonni akka beela'an hin godhu, kajeellaa warra jal'ootaa garuu lafatti in dabala*.

⁴Namni dhibaa'ummaadhaan hojjetu in hiyyooma, namni cimsee hojjetu garuu in sooroma;

⁵inni bona midhaan isaa walitti qabatu ilma hubataa dha, inni yeroo makariitti rafu garuu salphina in harkisa;

⁶eebbi mataa qajeelotaa irra jira, humnaan nama irratti ka'uun garuu, afaan jal'ootaa in cufa.

⁷Seenaan nama qajeelaa eebbaaf, maqaan nama jal'aa immoo abaarsaaf in ta'a;

⁸namni yaada hubataa qabu abboommii in dhaga'a, gowwaan dubbii midhaan hin qabne dubbatu garuu in kufa.

⁹Namni balleessaa hin qabne, sodaa malee in deddeebi'a, namni karaa isaa micciiru garuu in qabama.

¹⁰Namni ijaan hawwatu rakkina in fida, gowwaan dubbii midhaan hin qabne dubbatu garuu in kufa*.

¹¹Afaan nama qajeelaa burqaa jireenyaa ti, humnaan nama irratti ka'uun garuu, afaan jal'ootaa in cufa.[40]

¹²Jibbi lola in kaasa, jaalalli garuu, irra-daddarbaan hundinuu deebi'ee akka hin mul'anne in godha*;

¹³ogummaan afaan nama hubannaa qabu keessaa in argamti; uleen garuu dugda nama qalbii hin qabneetiif in ta'a*.

¹⁴Ogeessonni beekumsa walitti in qabatu, dubbiin nama gowwaa inni midhaan hin qabne garuu badiisa in waama*;

¹⁵qabeenyi warra sooreyyii isaaniif mandara da'oo qabuu dha, badiisi hiyyeessotaa immoo hiyyuma isaanii ti*;

¹⁶gatiin dadhabbii qajeelotaa jireenya, bu'aan warra jal'ootaa immoo du'a;

¹⁷namni gorsa yaadatti fudhatu karaa jireenyaa irra in bu'a, namni ifata tuffatu garuu karaa irraa in kaata.

¹⁸Namni jibba isaa dhoksu, soba in dubbata; namni hama odeessu gowwaa dha.[41]

¹⁹Yommuu dubbiin baay'atu cubbuun hin hafu, namni arraba isaa eeggatu garuu hubataa dha*;

²⁰arrabni nama qajeelaa akka meetii fo'amaa ti, yaadni nama jal'aa garuu gatii hin qabu*;

²¹arrabni nama qajeelaa nama baay'ee in soora, warri gowwoonni garuu qalbii dhabuu isaaniitiif in du'u*.

²²Eebbi Waaqayyoo nama in badhaasa, badhaadhummaattis inni rakkina hin dabalu*;

²³namni gowwaan hamaa hojjechuutti in gammada, namni hubataan garuu ogummaatti in gammada.[42]

²⁴Nama jal'aa wanta inni sodaatutu itti dhufa, nama qajeelaaf garuu wanti inni hawwu in kennamaaf*;

²⁵akkuma bubbeen bubbisee darbu, jal'oonni akkasuma deebi'anii hin argaman; warri qajeelonni garuu, bara baraan jabaatanii in dhaabatu*.

²⁶Wanti dhangaggaa'aan ilkaan, aarris ija akkuma rakkisu, namni dhibaa'aan, warra isa ergatan in rakkisa.

²⁷Waaqayyoon sodaachuun bara jireenyaa in dheeressa, barri warra jal'ootaa garuu in gabaabbata*.

²⁸Wanti namni qajeelaan eeggatu gammachiisaa dha, abdiin nama jal'aa garuu in bada*.[43]

²⁹Karaan Waaqayyo warra balleessaa hin qabneef da'oo ol ka'aa dha, warra hamaa godhanitti garuu badiisa*;

³⁰namni qajeelaan bara baraan hin mittiqu, namni jal'aan garuu lafa irra hin jiraatu*;

³¹afaan nama qajeelaa keessaa ogummaatu ba'a, arrabni wanta jal'aa dubbatu garuu, in kutama*;

³²arrabni nama qajeelaa dubbii namatti tolu in dubbata, afaan nama jal'aa garuu, wanta micciiramaa duwwaa beeka.[44]