Read west central oromo Macaafa Fakkeenyaa 14 Bible Online

Macaafa Fakkeenyaa 14 - west central oromo bible

Macaafa Fakkeenyaa 14

¹Dubartoonni ogeeyyiin hundinuu mana isaanii in ijaaru, warri gowwoonni garuu, harka isaaniitiin mana ofii isaanii in diigu*.

²Namni yaada qajeelaadhaan jiraatu Waaqayyoon in sodaata, inni jireenya isaatti micciiramaa ta'e garuu, isa in tuffata.

³Namni gowwaan dubbii afaan isaa keessaa ba'uun of gurguddisuu isaatiin ulee ofitti in fida, dubbiin afaan ogeessotaa keessaa ba'u garuu, isaanuma in eega.[62]

⁴Lafa qotiyyoon hin jirretti gombisaan duwwaa in ta'a, humna qotiyyootiin garuu, midhaan baay'een in argama;

⁵dhuga-baatuun amanamaan hin sobu, namni sobaan dhugaa ba'u garuu soba in dubbata*;

⁶namni ga'isaan ogummaa in barbaada, hin argatus; nama hubataa garuu beekumsa argachuun hin dhibu.[63]

⁷Wanta afaan gowwaa keessaa ba'u keessaa beekumsa waan hin arganneef, isattii fagaadhu!

⁸Ogummaan nama of eeggataa karaa isaa gargar baasee akka hubatuufii dha; gowwummaan nama gowwaa garuu nama wallaalchisuu dha.

⁹Warri gowwoonni, warra sababii cubbuu isaaniitiif aarsaa dhi'eessanitti in ga'isu, yaadni gaariin garuu qajeelota gidduutti in argama.

¹⁰Namni hundinuu adduma addaan jireenya isatti hadhaa'u ofii isaatii in beeka, gammachuu jireenya isaatti argatus ormi biraan hin hirmaatu.

¹¹Manni jal'ootaa in jiga, godoon qajeelotaa garuu in eebbifama*.

¹²Karaan qajeelaa namatti fakkaatu jira, dhumni isaa garuu karaa du'aa ti*;

¹³kolfa keessa iyyuu garaan in gadda, dhumni gammachuus boo'icha.

¹⁴Namni gara gaggalaan gatii hojii isaa isa hamaa, namni gaariin garuu gatii hojii isaa isa gaarii in argata.[64]

¹⁵Namni wallaalaan dubbii hundumaa amana, namni hubataan garuu lafa dhaqu in ilaallata;

¹⁶namni ogeessi wanta hamaa in sodaata, irraas in deebi'a; namni gowwaan garuu ija in jabaata, ofis in amanata.

¹⁷Namni dafee aaru waan hojjetu hin beeku, namni hubataan garuu in obsa*;

¹⁸wallaalaan gowwuma in dhaala, hubataan garuu beekumaan in gonfama;

¹⁹warri hamoonni warra gaggaarii duratti, warri jal'oonnis karra kellaa qajeelotaa duratti in gugguufu.[65]

²⁰Hiyyeessi ollaa isaa biratti iyyuu in jibbama, sooressi garuu firoota baay'ee qaba*;

²¹namni nama tuffatu cubbamaa dha, namni hiyyeessaaf garaa laafu garuu haa gammadu*!

²²Warri wanta hamaa koratan karaa irraa in kaatu mitii ree? Warri wanta gaarii yaadan garuu, gaarummaa fi amanamummaa in argatu.

²³Hojiin itti dadhaban hundinuu bu'aa qaba, haasaa duwwaan garuu deegatti nama geessa;

²⁴gonfoon afchaalotaa ogummaa isaanii ti, gonfoon gowwootaa garuu dhibaa'ummaa isaanii ti.[66]

²⁵Dhuga-baatuun amanamaan jireenya in oolcha, dhuga-baatuu sobduun garuu soba in dubbata;

²⁶Waaqayyoon sodaachuu keessa amanannaa cimaatu jira; ijoolleen nama isa sodaatuu da'oo in argatu*;

²⁷Waaqayyoon sodaachuun burqaa jireenyaa ti, namas futtaasaa du'aa irraa in deebisa*.

²⁸Ulfinni mootii baay'ina sabaa ti, muraasachuun sabaa garuu guddaa biyyaa in balleessa;

²⁹namni dheekkamsatti suuta-jedhu, hubannaa guddaa qaba; namni dheekkamsatti ariifatu garuu, gowwuma bakkeetti in baasa*.

³⁰Yaadni nagaa qabu namummaa namaatiif jireenya in kenna; hinaaffaan garuu lafee in bosossiisa.[67]

³¹Namni hiyyeessa cunqursu uumaa isaa in arrabsa, namni dhabaadhaaf garaa laafu garuu uumaa isaatiif ulfina in kenna*;

³²namni jal'aan hammina isaatiif gad in darbatama, namni qajeelaan garuu, yeroo du'utti illee abdii in qabaata*;

³³ogummaan yaada nama hubataa keessa in boqotti, kun gowwoota gidduutti iyyuu beekamaa dha;

³⁴qajeelummaan saba ol in kaasa, cubbuun garuu saba hundumaaf yeelloo dha;

³⁵mootiin hojjetaa isaa isa ogeessatti faara in tola, hojjetaa isa nama yeellaasisu irratti garuu dheekkamsi isaa in dhufa*.[68]