Read west central oromo Macaafa Fakkeenyaa 3 Bible Online

Macaafa Fakkeenyaa 3 - west central oromo bible

Macaafa Fakkeenyaa 3

¹Yaa ilma ko, gorsa koo hin irraanfatin, abboommota koos yaadatti qabadhu!

²Isaan guyyoota baay'ee fi waggoota baay'ee, nagaatti jiraachuus siif in dabalu*.[9]

³Gaarummaa fi amanamummaan sittii hin fagaatin! Morma keetti isaan hidhadhu, gabatee garaa keettis isaan caaffadhu*!

⁴Yommus ati Waaqayyo duratti, nama durattis maqaa gaarii in argatta, faara tolaadhaanis in ilaalamta*.[10]

⁵Garaa kee guutuu Waaqayyoon amanadhu, hubannaa ofii keetiitti hin hirkatin!

⁶Karaa kee hundumaatti isa yaadi, innis daandii kee siif in qajeelcha.

⁷Ani ogummaa qaba ofiin hin jedhin; Waaqayyoon sodaadhu, wanta hamaattiis fagaadhu*!

⁸Kun fayyaa dhagna keetiif, cimina lafee keetiifis in ta'a.[11]

⁹Qabeenya keetiin, ija midhaan keetii hundumaa keessaa isa duraatiinis, Waaqayyoof ulfina kenni*!

¹⁰Yommus midhaan gombisaa kee in guuta, daadhiin waynii kee inni haaraanis guutee iddoo cuunfaa waynii kee irra in dhangala'a.[12]

¹¹Yaa ilma ko, adaba Waaqayyoo hin tuffatin, ifata isaas hin jibbin*!

¹²Abbaan ilma isaa isa jaallatu akkuma adabu, Waaqayyo nama jaallatu in adaba*.[13]

¹³Namni ogummaa argatu, namni hubataanis haa gammadu!

¹⁴Ogummaan meetii caalaa bu'aa qabdi, iji isheen godhattus kan warqee irra in wayya;

¹⁵isheen calleewwan caalaa gati-jabeettii dha, wanta ati caalaatti hawwitu keessaa kan isheedhaan qixxaatu hin jiru*.

¹⁶Gara harka ishee mirgaa jireenya dheeraatu jira, gara harka ishee bitaas soorumaa fi ulfinatu jira;

¹⁷karaan ishee karaa namatti toluu dha, daandiin ishees daandii nagaa ti;

¹⁸isheen warra jabeessanii ishee qabataniif muka jireenyaa ti, warri jabeessanii ishee qabatan haa gammadan*![14]

¹⁹Waaqayyo ogummaadhaan hundee lafaa jabeessee uume, hubannaadhaanis bantiiwwan waaqaa jabeessee in dhaabe.

²⁰Beekumsa isaatiin burqituuwwan callabboo in futta'an, duumessoonnis fixeensa in coccophsan*.[15]

²¹Yaa ilma ko, ogummaa fi dubbii gargar baasanii hubachuutti jabaadhu, ija kee duraa akka dhabaman hin godhin!

²²Isaan siif jireenya, morma keetiifis miidhagina in ta'u.

²³Yommus ati nagaadhaan karaa kee irra in adeemta, miilli kees hin gufatu.

²⁴Yommuu ciiftu hin sodaattu, yommuu raftus hirribni kee miyaa'aa in ta'a*;

²⁵naasuun dingataa, badiisi jal'oota qabatus yommuu dhufu hin sodaatin!

²⁶Waaqayyo amanannaa kee in ta'a, miilli kee kiyyoodhaan akka hin qabamneef in eega*.[16]

²⁷Gochuudhaaf utuu dandeessuu, warra wanta gaarii argachuun ta'uuf duraa hin hambisin!

²⁸Utuu of harkaa qabduu, ?Bor siif nan kennaatii deebi'ii kottu!? namaan hin jedhin!

²⁹Nama si amanatee si bira taa'utti wanta hamaa hin yaadin!

³⁰Utuu namni si hin miidhin, akkasumaan nama hin lolin.

³¹Nama humna isaa namatti argisiifatutti hin hinaafin, karaa isaa keessaas tokko illee hin fo'atin*;

³²namni micciiramaan Waaqayyo duratti in ciigga'ama, warri yaada qajeelaa qaban garuu in amanamu*.[17]

³³Abaarsi Waaqayyoo mana warra jal'ootaa irra jira, mana warra qajeelotaa garuu Waaqayyo in eebbisa*!

³⁴Dhugumaan inni warra ga'iftuutti in ga'isa, warra gara-laafotaaf garuu ayyaana isaa in kenna*.

³⁵Ogeessonni ulfina in argatu, warri gowwoonni garuu salphina irra in bu'u.[18]