Read west central oromo Macaafa Fakkeenyaa 31 Bible Online

Macaafa Fakkeenyaa 31 - west central oromo bible

Macaafa Fakkeenyaa 31

¹Jechi kanatti fufee jiru, isa haati Lemu'el mootii Maasaa ittiin isa gorsitee dha*;

²yaa ilma ko, yaa dhala dhabaa, yaa ilma ani wareegaan godhadhe! Maaluma sitti himu ree?

³Ati humna kee dubartootatti hin dhangalaasin! Jireenya kees dubartoota mootota balleessanitti gad hin dhiisin*![186]

⁴Moototaaf hin ta'u! Yaa Lemu'el, mootonni daadhii waynii dhuguutti of gad-dhiisuun hin ta'u! Gurguddoonni biyyaas dhugaatii nama macheessu hawwuun gaarii miti*.

⁵Isaan yoo dhugan, wanta seerri jedhu in irraanfatu; firdii ijoollee hiyyeessaas in jal'isu.

⁶Dhugaatiin nama macheessu nama badiisatti dhi'aateef, daadhiin wayniis nama jireenyi itti hadhaa'eef kennama.

⁷Namni akkasii dhugee hiyyuma isaa haa irraanfatu, gadadama isaas deebi'ee hin yaadatin![187]

⁸Ati warra ofii isaaniitiif dubbachuu hin dandeenyeef dubbadhu! Warra abbaan irra hin jirreefis dhugaa isaanii eegiif*!

⁹Isaaniif dubbadhu, firdii qajeelaas isaaniif kenni! Warra hiyyeessotaa fi warra wanta barbaachisaa dhabaniif falmi![188]

¹⁰Haadha manaa mana ishee qabuu dandeessu, eenyutu argachuu danda'a ree? Isheen callee gati-jabeessa hundumaa irra guddaa in caalti*;

¹¹abbaan manaa ishee ishee in amanata; qabeenyis isatti hin hir'atu.

¹²Bara jireenya ishee hundumaatti, wanta gaarii gootiif malee, wanta hamaa isa irratti hin hojjettu;

¹³isheen rifeensaa fi quncee talbaa barbaaddee, dhimmitees uffata in dhoofti.

¹⁴Markaboonni naggaadotaa, biyya fagoo dhaqanii akkuma mi'a fidan, isheenis biyya fagootii nyaata ishee in fidatti.[189]

¹⁵Isheen ganama utuu lafti hin bari'in kaatee, maatii isheetiif nyaata in kenniti, xomboreewwan isheettis hojii hojii isaanii in argisiifti.

¹⁶Isheen qortee ilaaltee lafa in bitatti; horii itti dadhabdee argatteenis biqiltuu waynii in dhaabbatti.

¹⁷Mudhii ishee jabeessitee in hidhatti, irree ishee cimsattees in hojjetatti.

¹⁸Hojiin ishee bu'aa akka qabu in ilaalti, ibsaan ishees halkan hin dhaamu;

¹⁹muka itti jirbii maran harka isheetti in baatti, qubeettii isheetiin immoo calii in qabatti.

²⁰Isheen hiyyeessaaf in arjoomti, dhabaadhaafis garaa in laafti;

²¹maatiin ishee uffannaa dhaamocha nama irraa ittisu waan qabaniif, yommuu alaa cabbii buusee roobu maatii isheetiif hin yaaddoftu;

²²isheen uffata siree in dha'atti, uffata calaqqisaa, quncee talbaa ba'eessa irraa dha'ames in uffatti.

²³Abbaan manaa ishee jaarsolii biyyaa wajjin, yaa'ii karra mandaraa keessa yommuu taa'u ulfina qaba;

²⁴isheen quncee talbaa irraa uffata dhooftee in gurgurti, naggaadotattis sabbata in gurgurti;

²⁵humnaa fi ulfina akka uffataatti in uffatti; yeroodhuma dhufuttis in gammaddi.

²⁶Ogummaadhaan in dubbatti, barsiifni gaariinis afaan ishee keessaa in ba'a.

²⁷Isheen yeroo hundumaa jireenya maatii isheetii in eegdi, utuu hin hojjetinis akkasumaan buddeena hin nyaattu.

²⁸Ijoolleen ishee lafaa ka'anii ?Eebbifamtuu!? jedhanii ishee in waamu, abbaan manaa ishee immoo ishee jajatee,

²⁹?Dubartoota baay'eetu wanta ba'eessa hojjeta, ati garuu hunduma isaanii in caalta? isheedhaan in jedha.

³⁰Simboon nama irraa in darbiti miidhaginnis nama in gowwoomsiti, dubartiin Waaqayyoon sodaattu garuu in jajamti.

³¹Gatii ija hojii isheetii isheedhaaf kennaa! Hojiin ishee yaa'ii karra mandaraa keessatti ishee haa jaju!