Read west central oromo Macaafa Fakkeenyaa 5 Bible Online

Macaafa Fakkeenyaa 5 - west central oromo bible

Macaafa Fakkeenyaa 5

¹Yaa ilma ko, dubbii ogummaa kootii dhaggeeffadhu, gurra kees gara wanta ani hubannaadhaan dubbadhutti qabi!

²Yommus dubbii gargar baasuu in dandeessa, dubbiin afaan kees beekumsaan in ta'a;

³hidhiin dubartii ejjituu damma coccophsa, haasaan afaan isheetii akkuma dhadhaa ti, namas hin quuqu;

⁴dhuma irratti garuu akka hadhooftuu, akka billaa gara lamaan qaramees in taati.

⁵Miilli ishee gara du'aatti gad in bu'a, ejjennaan ishees gara iddoo lafa jalaatti in geessa;

⁶ati waa'ee karaa jireenyaa akka hin yaadnetti, daandiin ishee gegeddaramaa dha; ati garuu isa hin beektu*.[23]

⁷Egaa yaa ilmaan ko, mee na dhaga'aa! Wantan afaan kootiin dubbadhu irraa hin jal'atinaa!

⁸Karaa kee ishee irraa fageessi, balbala mana isheetti iyyuu hin dhi'aatin!

⁹Yoo kana eeggachuu dhabaatte, ulfina kee namoota biraatiif, bara jireenya kees nama gara-jabeessaaf kennuu kee ti;

¹⁰qabeenya kee ormatu nyaata, dadhabbiin kees mana alagaa in sooromsa;

¹¹dhuma bara jireenya keetti, foon kee fi dhagni kee yommuu gad dhumu in aadda.

¹²Ati, ?Ani attamittan gorsa jibbe, garaan koos attamitti adabamuu tuffate!

¹³Ani barsiisota kootiif hin abboomamne, gurra koos gara warra na gorsaniitti hin qabne;

¹⁴guutummaa walga'ii waldaa keessatti, hamma xinnoofan waan hamaa hundumaa keessa lixee oole? in jetta.

¹⁵Boolla bishaanii kee keessaa bishaan boollaa, ija bishaanii kee keessaas bishaan yaa'u akka dhugdu, [haadha manaa kee ishee jaalala siif burqisiiftutti gammadi!]

¹⁶Burqituun kee bakkee keessa, bishaan lagaa kees karaa keessa haa tamsa'anii ree?

¹⁷Isaan si duwwaadhaaf malee, orma warra sii wajjin jiraniif hin ta'in!

¹⁸Burqaan kee eebbifamaa haa ta'u, haadha manaa qeerummaa keetii wajjin gammadi*!

¹⁹Isheen jaallatamtuu akka borofaa, simbo-qabeettii akka kurupheettis, harmi ishee yeroo hundumaa si haa gammachiisu, jaalalli ishees laphee si haa coru*!

²⁰Yaa ilma ko, maaliif dubartiin ormaa laphee si corti? Maaliifis haadha manaa namaa ammatta?

²¹Karaan namaa guutummaatti Waaqayyo dura jira, inni daandii nama hundumaa in ilaala.

²²Namni jal'aan hojii hamaa hojjetetti in gala, funyoo cubbuu isaatiinis in qabama;

²³inni gorsa waan dhabeef in du'a, guddinni gowwummaa isaatiis karaa irraa isa in kaachisa.[24]