Read west central oromo Macaafa Fakkeenyaa 6 Bible Online

Macaafa Fakkeenyaa 6 - west central oromo bible

Macaafa Fakkeenyaa 6

¹Yaa ilma ko, namaaf wabii yoo darbite, akkasumas waliigaltee jabeessuudhaaf nama biraa wajjin yoo harka wal rukuttan,

²wanti ati dubbatte futtaasaa sitti ta'ee, dubbiin afaan keetiis kiyyootti yoo si galche,

³ati harka fira kee keessa yommuu buutu, gara fira kee sanaa dhaqiitii gad of deebisii, akka si irraa buusuuf isa kadhadhu, yaa ilma ko, kana gochuu keetiin of in oolchita;

⁴utuu kana hin godhin hin rafin, baallee ija keetiis wal irra hin buusin!

⁵Akka kuruphee harka adamsituu jalaa, akka simbirroo warra ishee qaban jalaa baatuuttis of oolchi*![25]

⁶Ati namicha dhibaa'aa nana, mee dhaqii mixii ilaali, akka isheen itti jiraattu yaadaan qabi, ogeessas ta'i*!

⁷Isheen geggeessituu, eegduu, mootiis hin qabdu;

⁸kana keessaa immoo waan ishee barbaachisu bona in tuullatti, nyaata ishees yeroo makarii walitti in qabatti.

⁹Ati dhibaa'aa nana, hamma yoomiitti ciifta? Hirriba keessaas yoom kaata?

¹⁰Ciisuudhaaf harka kee wal irra in qaxxaamursita, yeroo muraasa in mugda, yeroo muraasa in rafta;

¹¹hiyyumni akka saamtuutti, dhabinnis akka nama mi'a lolaa hidhateetti sitti in dhufa*.[26]

¹²Namni waa'ee hin baafne, namni jal'aan arraba isaa isa micciiramaa fudhatee, asii fi achi in adeema*;

¹³ija isaatiin in hawwata, miilla isaa in raasa, quba isaatiin in argisiisa*;

¹⁴micciiramummaan garaa isaa keessa jira, yeroo hundumaa hammina in korata, gargar ba'uu nama gidduu in facaasa;

¹⁵kanaafis badiifni dingata isatti in dhufa; caba fayya-hin qabne in caba.[27]

¹⁶Waaqayyo wanta ja'a in jibba, isa torbaffaa immoo in ciigga'a;

¹⁷isaanis kanatti fufanii jiru, nama waan guddaatti of ilaalu, arraba sobu, harka dhiiga nama balleessaa hin qabnee dhangalaasu,

¹⁸garaa akeeka hamaa yaadee qopheessu, miilla waan hamaa gochuuf ariifatee fiigu,

¹⁹nama sobaan nama irratti dhugaa ba'u, isa soba gad jijjigsu, nama gargar ba'uu obboloota gidduutti facaasuu dha*.[28]

²⁰Yaa ilma ko, abboommii abbaa keetii eegi, barsiisa haadha keetiis hin tuffatin*!

²¹Garaa kee keessa kaa'adhu, morma keettis hidhadhu!

²²Yommuu ati adeemtu karaa si argisiisa, yommuu raftu si eega, yommuu dammaqxu si haasofsiisa.

²³Abboommiin kun ibsaa dha, barsiifni kunis ifa, ifanni adabaa karaa jireenyaa ti.

²⁴Inni dubartii hamtuu irraa, dubartii ejjituu ishee afaaniin namatti kuultu irraas si eega*.

²⁵Garaan kee miidhagummaa ishee hin hawwin, iji ishees si hin booji'in!

²⁶Dubartii halaleen buddeena tokkoon qacaramti, isheen abbaa manaa qabdu garuu nama qabeenya qabu in adamsiti.[29]

²⁷Namni dachaasaa wayyaa isaatii keessa ibidda in kaa'ataa ree? Wayyaan isaas utuu hin gubatin hafuu danda'aa ree?

²⁸Yookiis namni barbadaa giimii irra yoo ejjete, miilli isaa utuu hin gubatin hafuu danda'aa ree?

²⁹Namni haadha manaa namaa bira dhaqu akkasuma ta'a, namni ishee bira ga'es utuu hin adabamin hin hafu*.

³⁰Hattuun yommuu beeloftu beela ba'uudhaaf yoo hatte, namoonni ishee in tuffatu laataa?

³¹Yoo qabamte garuu, wanta isheen manaa qabdu hundumaa yoo gaaga'e iyyuu, dachaa torba baasuutu isheedhaaf ta'a mitii ree?

³²Namni ejju qalbii hin qabu, namni kana godhu of in balleessa;

³³madaa'uunii fi salphachuun isa in argata, ga'oonis raawwatee isa irraa hin badu;

³⁴hinaaffaan abbaa manaa in aarsa, gaafa ijaa baafatus hin oo'uuf;

³⁵fureen tokko illee isatti hin tolu, gabbarri hammamii iyyuu isa hin gammachiisu.[30]