Read west central oromo Macaafa Fakkeenyaa 7 Bible Online

Macaafa Fakkeenyaa 7 - west central oromo bible

Macaafa Fakkeenyaa 7

¹Yaa ilma ko, dubbii koo eegi, abboommii koos garaatti qabadhu,

²abboommii koo eegi, in jiraattas; barsiisa koos akka agartuu ija keetiitti eegi!

³Quba keetti isaan hidhadhu, gabatee garaa keetiittis isaan caaffadhu*!

⁴Ogummaadhaan, ?Ati obboleettii koo ti? jedhi, hubannaadhaanis, ?Aantii koo? jedhii waami!

⁵Isaan dubartii ormaa irraa, dubartii gaalamoota afaaniin namatti kuultu irraas si eegu.[31]

⁶Ani golgaa koo keessaa karaa qaawwa mana kootii ala ilaalee,

⁷wallaalota keessaa, dargaggoota gidduudhaa, gurbaa qalbii hin qabne tokko nan arge.

⁸Inni cinaacha karaa mana dubartii tokkoo dhaqu irra, gara mana isheetti fuula deebifatee, in adeema ture.

⁹Yeroon isaas aduun lixxee erga dukkanaa'e booddee, halkan walakkaa ture.

¹⁰Yommus dubartiin tokko haxxummaadhaan, uffata halalummaa uffatee gad isatti baate.

¹¹Isheen sagalee gad hin qabattu, mata-jabeettii dhas; isheen asii fi achi labdi malee, mana isheetti hin argamtu.

¹²Takka karaa irra, takka immoo walga'ii karaa keessa, takkas golee karaa keessa dhaabattee in eeggatti;

¹³isheen qabdee, isa in dhungatti, ija-jabinaanis isatti dubbattee,

¹⁴?Har'a wareega koo waanan raawwadheef, aarsaa galataa dhi'eessuun ana irra jira*;

¹⁵kanaafan si simachuudhaaf gad ba'e, dhimmee si barbaadee tureen si argadhe;

¹⁶ani uffata quncee talbaa isa biyya Gibxiitti bubburreeffamee hojjetame, siree koo irra afeera;

¹⁷siree kootti qumbii, sabiriidhaa fi qarafaa firfirseera;

¹⁸kottu hamma lafti bari'utti jaalala keenya iddoodhaan in ga'anna, halkan guutuus itti gammadaa in bulla;

¹⁹abbaan manaa koo mana hin jiru, biyya fagoo dhaqeera;

²⁰korojoo isaatti horii guuttatee fudhatee ka'eera, hamma ji'i gobbantutti deebi'ee manatti hin galu? in jetti.[32]

²¹Isheen haasaa baay'eedhaan karaa irraa isa in kaachifti, itti kuuluu isheetiinis isa in giddisiifti;

²²yommus inni tokkichumaan akka sangaa qalamuuf oofamuutti, akka bosonuu futtaasaatti adeemtuuttis, ishee duukaa in bu'a.

²³Hamma xiyyi mar'umaan ishee waraanutti, akkuma simbirri gara kiyyootti kaatutti, innis akkasuma wanti kun lubbuu isaatti akka adeemu utuu hin beekin itti in kaata.

²⁴Ammas yaa ilmaan ko dhaggeeffadhaa, wantan jedhus yaadaan duukaa bu'aa!

²⁵Garaan keessan gara karaa isheetti hin gorin, daandii ishee irra adeemuudhaafis karaa irraa hin kaatinaa!

²⁶Isheen akkasitti namoota baay'ee madeessitee kuffifteetti, macca baay'ees ajjeefteetti.

²⁷Karaan iddoo lafa jalaatti geessu mana ishee keessa in ba'a, gola mana du'aattis gad in buusa.