Read west central oromo Macaafa Fakkeenyaa 8 Bible Online

Macaafa Fakkeenyaa 8 - west central oromo bible

Macaafa Fakkeenyaa 8

¹Ogummaan in waamti mitii ree? Hubannaan sagalee ishee in dhageessifti mitii ree?

²Isheen iddoo ol ka'aa gubbaa bukkee karaa irra, daandii keessa in dhaabatti;

³karra balbala ittiin mandarichatti lixan bukkeedhaa, sagalee ishee ol fudhattee iyyitee*,

⁴?Yaa namootaa, ani isin nan waama, sagalee koos ilmaan namaa nan dhageessisa;

⁵isin warri wallaalonni of eeggannaa, isin warri gowwoonni hubannaa argadhaa!

⁶Ani wanta ta'u dubbachuufan jedha, mee dhaggeeffadhaa! Waan qajeelaas dubbachuudhaaf afaan koo nan saaqqadha;

⁷afaan koo dubbii dhugaa in dubbata, arrabni koos jal'ina dubbachuu in ciigga'a;

⁸dubbiin afaan kootii hundinuu qajeelaa dha, isaan keessa jal'aan yookiis micciiramaan hin jiru.

⁹Nama isa hubataadhaaf hundumti isaanii mul'atoo dha, isa beekumsa qabuufis qajeeloo dha;

¹⁰qooda meetii gorsa koo fudhadhaa, warqee caalaas beekumsa fo'adhaa!

¹¹Ogummaan elellaan diimaa irra in caalti, wanti ba'eessi ati hawwitu hundinuus isheedhaan hin qixxaatu*.[33]

¹²?Ani ogummaan, of eeggannaadhaa wajjin, walitti in taana; beekuma ani ittiin dubbii gargar baasus nan argadha.

¹³Waaqayyoon sodaachuun wanta hamaa jibbuu dha, ani of bokoksuu fi of gurguddisuu, karaa hamaadhaaf arraba dubbii micciiru nan jibba.

¹⁴Gorsii fi firdii gargar baasuun kan koo ti, ani hubannaa dha, humnas anatu qaba.

¹⁵Mootonni anaan mo'u, gurguddoonni biyyaas anaan seera qajeelaa baasu;

¹⁶abboonni biyyaa, gurguddoonni biyyaa, warri firdii qajeelaa kennanis hundinuu anaan biyya bulchu.

¹⁷Ani warra na jaallatan nan jaalladha, warri na barbaaddatanis na argatu.

¹⁸Soorumaa fi ulfina, qabeenya hin darbinee fi qajeelummaa anatu kenna.

¹⁹Bu'aan ana irraa argamu warqee irra, warqee qullaa'aa irra iyyuu in wayya, barakanni ani kennus meetii qullaa'aa irra fo'amaa dha;

²⁰ani karaa qajeelummaa irra, daandii dhugaa irras nan adeema;

²¹warra na jaallataniif qabeenya nan kenna, gombisaa isaaniis nan guuta.

²²Waaqayyo jalqaba hojii isaatiitti, hojii isaa isa bara durii sana hundumaa dura na uume;

²³Ani jalqaba bara durii duriitti, utuu biyyi lafaa hin uumaminan aboo irra kaa'ame;

²⁴callabboo duran dhaladhe, yommus burqituun bishaan guddaan keessaa yaa'u iyyuu hin turre;

²⁵tulloonni, gaaronnis utuu hin uumaminan dhaladhe.

²⁶Waaqayyo, lafa wanta isa irra jiruu wajjin, biyya lafaa isa bal'aa kana keessaa gar tokko illee utuu hin tolchin na uume.

²⁷Yommuu inni bantiiwwan waaqaa iddoo iddoo isaanii kaa'ee, waaqas callabboo irra diriirse, ani achin ture;

²⁸yommuu inni waaqa keessa duumessoota kaa'ee, burqituuwwan callabbootti yommuu tolche,

²⁹bishaanonni abboommii isaa irra akka hin darbinetti, yommuu inni galaanatti daarii godhe, yommuu inni hundeewwan lafaatti milikkita godhes,

³⁰ani yommus ijaartuu isa gaarii sana biran ture, yeroo hundumaa fuula isaa duratti gammadaa, har'aa bor isa nan gammachiisan ture.

³¹Guutummaa biyya lafaa isa kan isaatiitti nan gammada, nama hundumaattis nan gammadan ture*.[34]

³²?Egaa yaa ilmaan ko, mee na dhaga'aa, warri karaa koo irra bu'an haa gammadan!

³³Ogeessota ta'aa, gorsa koo dhaga'aa malee hin tuffatinaa!

³⁴Namni na dhaga'u, guyyuma guyyaatti karra kellaa koo dammaqee kan eegu, michichila balbala kootti hirkatee kan eeggatus haa gammadu!

³⁵Namni ana argatu jireenya argachuu isaa ti, Waaqayyo biraas ayyaana in argata.

³⁶Namni na yakku garuu ofii isaa in miidha, namni na jibbu hundinuu immoo du'a in jaallata? in jetti.