Read west central oromo Macaafa Lallabaa 1 Bible Online

Macaafa Lallabaa 1 - west central oromo bible

Macaafa Lallabaa 1

¹Dubbiin kanatti aanee jiru kan ilma Daawit mootii Yerusaalem isa lallabichaa ti*.

²Lallabichi, ?Wanti hundinuu kan waa'ee hin baafnee dha, waa'ee hin baasu! Dhuguma waa'ee hin baasu!? jedhe*.[1]

³Namni hojii isaa isa aduu jalatti itti dadhabu hundumaaf, bu'aa maalii argata*?

⁴Dhaloonni tokko in darba, dhaloonni biraas in dhufa; lafti garuu yeroo hundumaaf dhaabatee in hafa*;

⁵biiftuun in baati, in lixxi, iddoo dhufteettis in ariifatti, deebitees in baati;

⁶qilleensi gara mirgaatti in qilleensa'a, gara bitaattis in naanna'a; naanna'ees gara dur dhufetti in deebi'a.

⁷Lagoonni hundinuus gara galaanaatti in yaa'u, galaanichi garuu hin guutu; lagoonni sunis gara dhufanitti in deebi'u, achiis deebi'anii in yaa'u.[2]

⁸Wanti hundinuu hamma namni isa dubbachuu dadhabutti, nama dadhabsiisa; iji argu hin quufu; gurris dhaga'uudhaan hin guutu*;

⁹wanti dur ta'ee ture ammas ta'uuf jira; wanti dur godhamee ture, ammas godhamuuf jira; wanta aduu jala jiru keessaa wanti haaraan tokko illee hin jiru.

¹⁰Wanti namni, ?Ilaa! Wanta haaraa kana? jechuu danda'u jiraa? Wanti kun baroota warra bara keenya dura turan keessa kan ta'ee dha;

¹¹wanti darbe hin yaadatamu, warri si'achi dhufanis wanta ta'uuf jiru hin yaadatan.[3]

¹²Ani lallabichi Yerusaalemitti mootii Israa'elin ture*;

¹³ani wanta waaqa jalatti hojjetame hundumaa ogummaadhaan qoree ilaaluudhaaf itti nan yaade; ilmaan namootaa akka itti dhama'aniif Waaqayyo hojii rakkisaa kana kenneef*.

¹⁴Ani wanta aduu jalatti hojjetame hundumaa argeera, kunoo, wanti hundinuu waa'ee hin baasu, akka nama qilleensa ari'uu tis*.

¹⁵Wanti micciiramaan qajeeluu hin danda'u, wanti hin jirres lakkaa'amuu hin danda'u*.[4]

¹⁶Ani, ?Kunoo, ani warra ana dura Yerusaalem irratti mootii turan hundumaa caalaa, nama guddaa ta'eera, ogummaas baay'ifadheera? jedhee garaa kootti nan yaade*.

¹⁷Ogummaa, maraatummaa, gowwummaas gargar baasee beekuudhaaf itti nan yaade, kunis immoo akka nama qilleensa ari'uu akka ta'e nan hubadhe*;

¹⁸ogummaa baay'ee keessa aarii guddaatu jira, kan beekumsa dabalatus mataa dhukkubbii dabalata.[5]