Read west central oromo Macaafa Isaayaas Raajichaa 2 Bible Online

Macaafa Isaayaas Raajichaa 2 - west central oromo bible

Macaafa Isaayaas Raajichaa 2

¹Isaayaas ilmi Amoz waa'ee Yihudaa fi waa'ee Yerusaalemiif wanta kanatti fufee jiru in arge;

²bara booddeetti tulluun manni qulqullummaa inni kan Waaqayyoo irra jiru, tulloota hundumaa keessaa akka isa caaluutti jabaatee in dhaabata, gaarota hundumaa gara irraattis ol in ka'a; sabni lafa irraa hundinuus gara isaatti in yaa'u.

³Sabni lafa irraas baay'atanii in dhufu, Xiyoon keessaa seerri, Yerusaalem keessaas dubbiin Waaqayyoo waan ba'uuf, ?Karaa isaa akka inni nu barsiisuuf, nus daandii isaa irra akka adeemnuuf, kottaa gara tulluu mana Waaqayyootti, gara mana Waaqayyoo isa kan Yaaqoobitti ol in baanaa!? in jedhu*.[11]

⁴Inni saba gidduutti firdii in kenna, saba baay'eedhaafis murtoo in godha; isaan billaa isaanii maarasaa, eeboo isaaniis isa ittiin muka qeexxa'an in tumsiifatu; egaa sabni sabatti billaa hin luqqifatu, isaan deebi'aniis lola hin baran*;

⁵isin yaa mana Yaaqoob kottaa, ifa Waaqayyoo keessa in deddeebinaa*![12]

⁶Ati saba kee sanyii Yaaqoob in gatte, namoonni gara ba'a-biiftuu warri hooda dubbatan dhufanii isaan keessa in guutan; isaan akka warra Filiisxiyaa qoricha namatti in godhu, walii-galtee jabeessuudhaaf ormaa wajjin harka wal in rukutu*;

⁷biyya isaanii keessa meetii fi warqeen guutuu dha, badhaadhummaan isaaniis dhuma hin qabu; biyya isaanii keessa fardeen guutuu dha, konkolaataan isaaniis dhuma hin qabu;

⁸biyyi isaanii waaqayyolii tolfamoodhaan guutuu dha; isaan hojii harka isaaniitti in sagadu, isa quba isaaniitiin tolchanis in waaqeffatu*;

⁹sanyiin namaa yoo gugguufe iyyuu, namni hundinuus yoo gad deebi'e iyyuu, ati garuu isaaniif hin dhiiftu![13]

¹⁰Naasisuu Waaqayyoo duraa kattaa keessa lixi, surraa isaa duraas lafa keessa dhokadhu*!

¹¹Iji nama mataa irra-keessa qabatuu lafa in ilaala, warri of gurguddisanis gad in qabamu; guyyaa sanatti Waaqayyo duwwaatu ol ol jedha*.[14]

¹²Guyyaan Waaqayyo gooftaa maccaa warra of bokoksanii, mataa irra-keessa qabatanii fi warra ol ol qabaman hundumaa irratti in dhufa; gadis isaan in qaba;

¹³inni gaattiraa Liibaanon isa dheeraa fi ol jedhaa irratti, qilxuu Baashaan hundumaa irrattis in ka'a;

¹⁴tulloota dhedheeroo hundumaa irratti, gaarota ol ka'oo hundumaa irrattis in ka'a;

¹⁵riqaa dhedheeraa hundumaa irratti, dallaa dhagaa dhedheeroo hundumaa irrattis in ka'a;

¹⁶markaboota Tarshiish hundumaa irratti, markaboota baay'ee mimmiidhagoo hundumaa irrattis in ka'a;

¹⁷yommus of bokoksuun namaa gad in qabama, mataa irra-keessa qabachuun namootaas gad in deebi'a; guyyaa sanatti Waaqayyo duwwaatu ol ol jedha;

¹⁸gaafas waaqayyolii tolfamoonni raawwatanii in badu*.[15]

¹⁹Waaqayyo sodaachisuu isaatii fi surraa ulfina isaatiin biyya lafaa rom'isiisuudhaaf yommuu ka'u, namoonni isa duraa gara holqa kattaa fi boolla lafaatti in baqatu;

²⁰yeroo sanatti namoonni hundinuu waaqayyolii meetiidhaa fi warqee irraa itti sagaduudhaaf hojjechiifatan hundumaa tuqaadhaa fi simbira-halkanii dura in buusu;

²¹kana booddees Waaqayyo lafa rom'isiisuudhaaf surraa ulfina isaatiin yommuu ka'u, namoonni na'anii gara holqa kattaa fi holqa dhagaatti in baqatu*;

²²namni hammuma hafuurri isaa keessa jirtutti malee waa'ee hin baasu; kanaafis waa'ee isaa ittuma dhiisaa*![16]