Read west central oromo Macaafa Isaayaas Raajichaa 24 Bible Online

Macaafa Isaayaas Raajichaa 24 - west central oromo bible

Macaafa Isaayaas Raajichaa 24

¹Waaqayyo, kunoo! Biyya lafaa onaa fi duwwaa in godha; Inni irra lafaa in geddara, warra isa irra jiraatanis in tamsaasa.

²Immata irratti kan ta'u, luboota irrattis in ta'a; isa namaaf hojjetu irratti kan ta'u, isa hojjechiifatu irrattis in ta'a; ishee namaaf hojjettu irratti kan ta'u, ishee hojjechiifattu irrattis in ta'a; isa bitu irratti kan ta'u, isa gurguru irrattis in ta'a; isa ergifatu irratti kan ta'u, isa ergisu irrattis in ta'a; isa liqeeffatu irratti kan ta'u, isa liqeessu irrattis in ta'a.

³Waaqayyo dubbii kana waan dubbateef, lafti guutummaatti duwwaa in ta'a, raawwatees saamamee in ona.

⁴Lafti gaddaan in coollaga, biyyi lafaa gogee in bada, gurguddoonni saba lafaa in mudhuku*.

⁵Warri lafa irra jiraatan abboommii fi seerrata Waaqayyoo irra daddarbanii, kakuu bara baraas cabsuu isaaniitiin lafa in xureessan.

⁶Kanaaf abaarsi lafa in balleessa, namoonni isa irra jiraatan yakka oofii isaanii in baatu; kana irraa kan ka'es namoonni lafa irra jiraatan in gubatu, isaan keessaa immoo muraasi in hafa.

⁷Dameen muka waynii in coollaga, mukti wayniis ija in dhaba; warri dur garaan isaanii gammadu amma in gaddu*;

⁸sagaleen dibbee inni nama gammachiisu, waci warra quufanii iyyaniis gab in jedha; sagaleen kiraaraas in hafa;

⁹namni akka durii daadhii waynii dhugee geeraru hin jiru, dhugaatii cimaan warra dhugutti in hadhaa'a*;

¹⁰mandarattiin ontee in diigamti, homtinuu akka ol itti hin galleefis manneetiin warri hafan hundinuu in cufamu.

¹¹Karaa irra dhaabatanii daadhii wayniitiif in iyyu; gammachuun hundinuu gadda in ta'e, ililleenis biyya keessaa in bade;

¹²mandarattiin akkuma ontetti in hafti, karri ishees in caccabdi;

¹³yommus biyyi lafaa fi saboonni lafa irraa, muka ejersaa isa iji isaa irraa hurgufamuu fi muka waynii isa iji isaa irraa ciramee, coraan isaa irratti hafee in fakkaatu*.[110]

¹⁴Warri hafan immoo sagalee isaanii ol fudhatanii, gammachuudhaanis ulfina Waaqayyoo in faarfatu, gara lixa-biiftuuttiis guddina isaa in odeessu.

¹⁵Egaa warri gara ba'a-biiftuu galata isaaf galchaa, warri galaana qarqaraas maqaa Waaqayyo gooftaa isa kan Israa'el galateeffadhaa!

¹⁶Gara qarqara lafaatii faarfannaa, ?Isa qajeelaadhaaf ulfina kennaa!? jedhu in dhageenya; ani garuu deebisee, ?Ani nama gad deebi'aa dha, ani nama gad deebi'aa dha, anaaf wayyoo! Gantoonni hin amanaman, gantoonni hin amanaman? nan jedhe*.[111]

¹⁷Yaa warra lafa irra jiraattanii! Na'uun, kiyyoon diriirfamaan, boolla keessatti kufuunis isin in eeggata.

¹⁸Inni sagalee iyyaa sodaatee jalaa fiigu, boolla keessatti in kufa; isa boolla keessaa ol ba'u immoo kiyyoon in qaba; yommus ittifni duraa fuudhamee bishaan bantii waaqaa keessaa gad in dhiifama, hundeen lafaas in socho'a*;

¹⁹lafti in dho'a, caccabees in hurraa'a, guddaas in socho'a*;

²⁰lafti akka nama machaa'ee gatantaruu in godhatti, akka godoo qilleensi raasuus in raafamti, irra-dadarbaan ishee isheetti in ulfaata, in kufti, deebitees hin kaatu*.[112]

²¹Yeroo sanatti Waaqayyo, humnoota bantii waaqaa keessa jiranii fi mootota warra lafa irra jiran in adaba*;

²²isaan akka namoota booji'amanii walitti qabamanii, boolla keessa in buufamu; mana hidhaatti in galfamu, bara baay'ee booddees isaanitti in faradama[113];

²³Waaqayyo gooftaan maccaa tulluu Xiyoon irratti, Yerusaalem keessattis yommuu mo'u, jiini in dimimmifti, biiftuunis akka nama qaana'ee fuula fokkisutti ibsuu in dadhabdi; maanguddoonni isaaniis ulfina isaa in argu*.[114]