Read west central oromo Macaafa Isaayaas Raajichaa 29 Bible Online

Macaafa Isaayaas Raajichaa 29 - west central oromo bible

Macaafa Isaayaas Raajichaa 29

¹Yaa Yerusaalem! Yaa iddoo aarsaa ishee kan Waaqayyoo! Yaa mandara Daawit ishee inni keessa jiraatee, siif wayyoo! Cidha kee wagguma waggaatti ittuma dabali!

²Yaa iddoo aarsaa ishee kan Waaqayyoo, ani garuu sin rakkisa, boo'ichii fi gaddi in ta'a; kana booddees ati anaaf akka iddoo aarsaa lafa ibiddi irratti boba'uu in taata;

³ani ofii kootii karaa hundumaa sitti nan marsa, riqaa sitti nan naannessa, kobiis si irratti ol nan kaasa*;

⁴yommus ati gad in deebita, lafa itti gad deebite sanaas in dubbatta; dubbiin kee awwaara keessaa in dhaga'ama, sagaleen kees akka sagalee ekeraa boolla keessaa in ba'a; akka kan warra lafa keessaa hasaasaniis in ta'a.[131]

⁵Hamajaajiin kee warri baay'eenis akka awwaaraa in ta'u, loltoonni warra nama sodaachisaniis akka habaqii in tamsa'u; kunis kan ta'u battala liphsuu ijaa ti.

⁶Waaqayyo gooftaan maccaa bakakkaadhaan, socho'a lafaatii fi sagalee guddaadhaan, bubbeedhaa fi kakawweedhaan, arraba ibiddaa isa nama fixuunis isin in adaba.

⁷Loltoonni saba lafa irraa hundinuu warri Yerusaalem iddoo aarsaa ishee kan Waaqayyoo lolan, warri ishee tuqanii ishee rakkisan, warri iddoo baqaa ishee dhiphisan, amma ishee irraa in ka'u, akka abjuu halkaniis in ta'u*;

⁸akka nama beela'ee abjuudhaan buddeena nyaatuu, hirribaa yommuu ka'u immoo garaan isaa duwwaa ta'uu, akka nama dheebotee abjuudhaan bishaan dhuguu, hirribaa yommuu dammaqu immoo bishaan dharra'ee gaggabuu, sabni baay'een warri saba Yerusaalemitti duulan, kunoo, akkasuma in ta'u.[132]

⁹Mee akkasumatti itti fufaa! Amma naasuun isinitti dhufa! Dununfadhaa, jaamaas ta'aa! Machaa'aa! Garuu daadhii wayniitiin miti. Gatantaraas! Garuu dhugaatii cimaadhaan miti.

¹⁰Waaqayyo hafuurri hirriba cimaa akka isinitti dhufu godheera, ija raajota keessanii cufeera, mataa dura-butoota keessaniittis haguugeera;

¹¹Mul'anni kun hundinuu isiniif akka macaafa mallattoodhaan cufamee ti; macaafa akkasii nama macaafa dubbisuu beekutti ?Dubbisi!? jettanii yoo itti kennitan, inni immoo, ?Mallattoodhaan waan cufameef, ani kana danda'ee hin dubbisu? in jedha;

¹²Nama macaafa dubbisuu hin beeknetti immoo ?Dubbisi!? jettanii yoo itti kennitan, inni immoo, ?Ani macaafa dubbisuu hin danda'u? in jedha.

¹³Waaqayyo, ?Sabni kun dubbii afaan isaatiitiin anatti in dhi'aata, ulfinas anaaf in kenna, garaan isaa garuu anattii fagoo dha; akka abboommii namaatiin barsiifamanitti ana in sodaatu*

¹⁴kanaaf ani saba kana irratti dabalee dinqii nan godha, ogummaa ogeessota isaanii nan balleessa; afchaalummaa afchaalota isaaniis nan dhoksa? jedhee dubbateera*.

¹⁵Warra akeeka isaanii Waaqayyo duraa fageessanii dhoksuu yaalaniif, warra dhoksaatti waa hojjettaniif wayyoo! Isaan yaada isaanii keessatti ?Eenyutu nu arga? Eenyutus nu beeka?? in jedhu*.

¹⁶Isin mataa miilla gootanii, miilla mataa gootan; supheen isa suphee dha'u ta'uu danda'aa ree? Wanti harka namaatiin hojjetame tokko isa isa hojjeteen, ?Ati ana hin hojjenne? jechuu danda'aa ree? Wanti namni tokko tolche, isa isa tolcheen, ?Inni hubachuu hin danda'u? jechuu danda'aa ree*?[133]

¹⁷Yeroo muraasa booddee Liibaanon iddoo dhaabaa isa muka ija godhatu baasuu in ta'a, iddoon dhaabaa muka ija godhatuu immoo caakkaa in ta'a*;

¹⁸bara sanatti warri duudan, isa macaafa keessatti caafamee jiru in dhaga'u; iji warra jaamotaas, dukkana limixii keessatti illee in arga*;

¹⁹ammas warri gadadamoonni, warri hiyyeessonnis, Waaqayyo isa qulqulluu kan Israa'elitti in gammadu.

²⁰Warri nama cunqursan in badu, warri ga'iftuun in dhumu! Warri nama irratti hamaa yaadan hundinuus lafa irraa in balleeffamu;

²¹warri dubbii sobaatiin maqaa namaa balleessan, warri balbala kellaa duratti nama dhugaadhaaf falmu dura kiyyoo kaa'an, warri sobaan dhugaa ba'anii firdii nama duraa jal'isiisanis in dhumu*.[134]

²²Kanaaf Waaqayyo inni Abrahaamin fure, sanyii Yaaqoobiin, ?Yaaqoob si'achi hin yeella'u, qaanna'ees fuula hin badu;

²³ijoollonni isaa hojii ani isaan gidduutti hojjedhe yommuu argan, isaan maqaa koo qulqullinatti in eegu, ana isa qulqulluu kan Yaaqoobiif ulfina in kennu, ana Waaqayyo isa kan Israa'el in sodaatu;

²⁴warri yaadni isaanii karaa irraa kaate deebi'anii in hubatu, warri gungumtuunis barumsa in fudhatu? jedhe.