Read west central oromo Macaafa Isaayaas Raajichaa 34 Bible Online

Macaafa Isaayaas Raajichaa 34 - west central oromo bible

Macaafa Isaayaas Raajichaa 34

¹Isin yaa saba lafa irraa dhaga'uudhaaf as dhi'aadhaa, isin yaa namoota nana dhaggeeffadhaa! Laftii fi wanti isa irra jiru, biyyi lafaa fi wanti isa keessatti argamu hundinuus haa dhaga'u!

²Waaqayyo saba hundumaatti aareera, loltuu isaanii hundumaattis dheekkameera; ajjeefamuutti dabarfamanii akka kennaman abboomeera; raawwatanii akka isaan badanis godheera*.

³Warri dhuman bakkeetti in gatamu, reeffi isaanii in ajaa'a, dhiigni isaaniis tulloota in mancaasa;

⁴urjoonni bantiiwwan waaqaa hundinuu in baqu, waaqnis akka macaafa maramuu in marama; macci bantiiwwan waaqaa keessatti argaman hundinuus akka baalli muka wayniittii harca'u, gad in harca'u; akka ija muka harbuu isa coollagee harcaa'uus in ta'u*.[159]

⁵Billaan Waaqayyoo waaqa irraa mul'ateera. Kunoo! Warra Edoom saba inni itti faraduudhaaf jedhu irratti gad in bu'a;

⁶billaan Waaqayyoo dhiiga namaa duwwaa ta'eera, akkuma yeroo ilmooleen re'ootaa fi hoolotaa qalamanii, akka cooma kalee korbeeyyii hoolotaattis cooma namaatiin laaqameera; Waaqayyo mandara Bozraatti akka wanta aarsaadhaaf dhi'aate isaan in godha, biyya Edoomittis dhumiisa guddaa isaanitti in fida;

⁷namoonni akkuma gafarsaa fi jibootaa, akka korommiis achitti in dhumu, dhiigni biyya isaanii irra in ciisa, biyyoon isaas coomaan in gabbata*.[160]

⁸Waaqayyo guyyaa itti ijaa baafatu, bara itti Xiyooniif gatii ishee baasus qaba*;

⁹yommus lagni Edoom leeleetti, biyyoon isaa dhagaa boba'utti, biyyi isaas leelee nama gubutti in diddiirama;

¹⁰bara baraanis namni achi keessa hin adeemu, halkanii fi guyyaa ibiddi isaa hin dhaamu, aarri isaa utuu wal irraa hin citin ol in ka'a, dhalootaa hamma dhalootaattis lafa duwwaa in ta'a*;

¹¹hurunguu fi dhaddeen isa in dhaalu, hurunguu guddaa fi qurruunis achi keessa in jiraatu; gooftichi isa onsee akka inni bifa dhabu in godha, biyya isa diigames tuullaa dhagaa in godha;

¹²namni waamanii moosisan gurguddoota isaanii keessa hin jiru, angafoonni isaaniis homaafuu waa'ee hin baasan.[161]

¹³Manneen mootummaa isaanii keessatti qoraattiin in biqila, da'oo isaanii keessatti kosorruunii fi baalaanwaraanteen wal horu, waangoon, guchiin goromtiinis biyyichatti in galu;

¹⁴bineensonni lafa onaa keessa jiraatanii fi waraabessoonni achitti walitti in qabamu, korbeessonni, re'oonni diidaas achitti walitti in mari'atu, seexanni halkaniis achi in buufatti, iddoo boqonnaas isa in godhatti.

¹⁵Bofni akka xiyyaa darbatamu achitti mann'ee in tolfata, achittis hanqaaqee ilmaan isaa in yaafata; foggis akka qomoo qomoo isaatti achitti walitti in qabama*.[162]

¹⁶Macaafa Waaqayyoo keessa barbaadaatii dubbisaa! Wanta kana keessaa tokko illee kan hafu hin jiru, kan achi keessaa qomoo isaa dhabus hin jiru, Waaqayyo ofii isaatii kana dubbateera, hafuura isaatiinis walitti isaan qabeera;

¹⁷Inni ofuma isaatii muka isaaniif buuseera, lafichas harka isaatiin safaree isaaniif hireera; isaan hamma bara baraatti qabeenya isaanii isa in godhatu, dhalootaa hamma dhalootaattis achi in jiraatu.