Read west central oromo Macaafa Isaayaas Raajichaa 42 Bible Online

Macaafa Isaayaas Raajichaa 42 - west central oromo bible

Macaafa Isaayaas Raajichaa 42

¹Waaqayyo itti fufee, ?Kunoo, garbichi koo inni ani ol ol qabu, inni ani fo'adhe, inni ani jaalladhu isa kana! Ani hafuura koo isaaf kenneera, inni firdii qajeelaa saba lafa irraatiif in baasa;

²inni hin iyyu, hin wacu, sagaleen isaas karaa irratti akka dhaga'amu hin godhu;

³inni jajjaba buruqfame hin cabsu, fo'aa ibsaa isa seequs hin dhaamsu; inni amanamummaadhaan firdii in kenna.

⁴Inni firdii qajeelaa lafa irratti hamma fidutti ittuma fufa malee, hin dadhabu, abdiis hin kutatu; warri biyya galaana gidduu keessa jiraatanis seera isaa abdiidhaan in eeggatu? jedhe*.[192]

⁵Waaqayyo gooftaan inni bantiiwwan waaqaa diriirse, inni biyya lafaa fi wanta isa irratti biqilu uume, inni lafa kana irratti namootaaf hafuura kenne, warra lafa irra jiraatan hundumaafis jireenya kenne*,

⁶?Ani Waaqayyoo dha, ani qajeelummaadhaan si waameera, ani harka sin qaba, sin eegas; saba ani kakuu galeefiif, saba lafa irraatiifis ifa akka taatuuf si kenneera*;

⁷ija warra jaamaa akka bantu, warra hidhaman akka hiiktu, warra dukkana mana hidhaa keessa jiranis akka baaftu sin godha*.[193]

⁸?Ani Waaqayyoo dha, maqaan koo isa kana; ani ulfina koo kan biraatiif hin kennu, maqaa koo isan ittiin galateeffamus waaqayyolii tolfamaniif hin dhiisu*.

⁹Kunoo! Wanti dur dubbatame ta'eera, amma immoo waan haaraa isinitti nan beeksisa, utuu isaan bakkeetti hin ba'inis isinitti nan hima? jedhe*.[194]

¹⁰Faarfannaa haaraadhaan Waaqayyoon faarfadhaa! Galata isaas hamma andaara lafaatti himaa! Warri galaana irra adeemtanii fi warri isa keessa jiraattan hundinuu, biyyi galaana gidduu fi warri achi keessa jiraattan hundinuu isa galateeffadhaa!

¹¹Lafti onaa fi mandaroonni achi keessa jiran, warri Qedaar keessa jiraatanis sagalee isaanii ol haa fudhatan! Warri mandara Selaa keessa jiraatan gammadanii haa faarfatan, warri gubbee tulluu irra jiraatanis haa ililchan!

¹²Isaan Waaqayyoof ulfina haa kennan, galata isaas warra biyya galaana gidduu keessa jiraatanitti haa himan*!

¹³Waaqayyo akka loltuu jabaatti gad in ba'a, akka gootaas hinaaffaan isaa isa keessaa in dammaqa; inni dhaadannaa lolaa in dhaadata, sagalee guddaadhaanis in dubbata, aangoo isaas diinota isaatti in argisiisa*.[195]

¹⁴Yommus Waaqayyo, ?Ani yeroo dheeraan calluma jedhee, gab jedhee, of qabees ture, amma garuu akka dubartii ciniinsfattuu tokkichumaan nan aada, nan argana, nan iyyas;

¹⁵ani tullootaa fi gaarota nan onsa, biqila achi irra jiru hundumaas nan gogsa; lagoota bishaan keessa yaa'anis gogsee akka biyya galaana gidduu nan godha, burqootas nan gogsa.

¹⁶Warra jaamota garuu karaa isaan hin beekne irra, daandii dur irra ba'anii hin beekne irras isaan nan geessa; dukkana ifatti isaaniif nan diddiira, iddoo jajal'aas wal nan qixxeessaaf; ani kana isaaniif nan godha, deebi'ees isaan hin gatu*;

¹⁷warri waaqayyolii tolfamoo amanatanii, ?Isin waaqayyolii keenya? isaaniin jedhan, deebi'anii in yeella'u*.[196]

¹⁸?Isin warri duudaan dhaga'aa! Isin warri jaamaanis argaa*!

¹⁹Garbichuma koo malee jaamaan eenyu? Ergamaadhuma koo isa ani erge malee, duudaan eenyu? Akka isuma guutummaatti kan koo ta'uun isaa beekame, akka garbicha kootiis eenyutu jaamaa dha*?

²⁰Wanta baay'ee argitaniittu, garuu isa hin eegdan; gurri keessan banamaa dha, garuu wanta tokko illee hin dhageessan? jedhe*.

²¹Waaqayyo qajeelummaa isaatiif jedhee seera isaa guddaadhaa fi ulfina-qabeessa gochuu in jaallate.

²²Sabni kun garuu in saamaman, in booji'amanis; hundumti isaanii qabamanii mana hidhaa keessa in buufaman; yommuu isaan saamaman namni isaan oolchu hin turre, warra booji'eenis, ?Deebisaa!? kan jedhu hin turre.[197]

²³Isin keessaa eenyutu kana dhaga'uu jaallata? Isa si'achi dhufuuf jirus eenyutu dhaga'ee qalbifata?

²⁴Yaaqoobin eenyutu warra isa saamutti dabarsee kenne? Yookiis Israa'elin eenyutu warra aatutti dabarsee kenne? Waaqayyo isa nuyi fuula isaa duratti cubbuu hojjenne sana mitii ree? Nuyi karaa isaa irra adeemuu hin jaallanne, abboommii isaas hin eegne;

²⁵kanaaf inni dheekkamsa isaa isa akka barbadaa ibiddaa nu irratti in dhangalaase, lola cimaas nutti in fide; inni naannessee ibidda nutti in qabsiise, nuyi garuu amma iyyuu isa hin hubanne; inni nu in gube, nuyi garuu kana garaatti hin qabanne*.[198]