Read west central oromo Seera Lewwootaa 11 Bible Online

Seera Lewwootaa 11 - west central oromo bible

Seera Lewwootaa 11

¹Waaqayyo ergasii Museedhaa fi Aaroniin,

²?Isin namoota Israa'eliin, ?Bineensota lafa irra jiraatan hundumaa keessaa warra kanatti fufanii jiran nyaachuu in dandeessu*;

³isa kotteen isaa baqaqee lamatti hiramuu fi isa alaala guuru hundumaa nyaachuu in dandeessu;

⁴garuu warra alaala guuranii kotteen isaanii gargar hin hiramin yookiis kotteen isaanii gargar hiramee alaala hin guurre hin nyaatinaa! Gaalli alaala yoo guure iyyuu kotteen isaa gargar hin hiramne; kanaaf inni isin duratti xuraa'aa haa ta'u!

⁵Osoleen yoo alaala guurte iyyuu kotteen ishee gargar hin hiramne; kanaaf isheen isin duratti xurooftu haa taatu!

⁶Illeettiinis alaala yoo guurte iyyuu kotteen ishee gargar hin hiramne; kanaaf isheen isin duratti xurooftu haa taatu!

⁷Boyyeen immoo kotteen isaa baqaqee lamatti hiramaa yoo ta'e iyyuu inni alaala hin guuru; kanaaf inni isin duratti xuraa'aa haa ta'u*!

⁸Isaan kun isin duratti xuraa'oo waan ta'aniif, foon isaanii hin nyaatinaa, raqa isaaniittis hin bu'inaa![22]

⁹? ?Warra bishaanitti, galaanatti, lagattis galan hundumaa keessaa immoo waanuma waan akka baal'ee fi qola qabu nyaadhaa!

¹⁰Garuu galaana keessaa, laga keessaas waanuma lubbuu qabu keessaa, warri bishaan keessa jiraatanii bishaan keessa munyuuqan hundinuu isin duratti ciigga'amoo haa ta'an!

¹¹Isaan isin duratti ciigga'amoo waan ta'aniif, foon isaanii hin nyaatinaa! Raqa isaanii ciigga'aa!

¹²Wanta bishaanitti galu keessaa kan waan akka baal'ee fi qola hin qabne, isin duratti ciigga'amaa haa ta'u!

¹³? ?Simbirroonnii fi allaattonni warri xuraa'oonni ciigga'amoo waan ta'aniif hin nyaataman; isaanis kanatti aananii jiru; joobira, domboo, gogocoro,

¹⁴rumicha, foggi akka qomoo qomoo isaatti,

¹⁵qurruus akka qomoo qomoo isaatti,

¹⁶guchii, simbira ekeraa, allaattii bishaanii, corofees akka qomoo qomoo isaatti,

¹⁷haadha onaa, haadha quufoo, hurunguu guddaa,

¹⁸indaanqoo bishaanii, haadha waaqoo, allaattii raqaa,

¹⁹allaattii hawaannisaa, hummoo akka qomoo qomoo isaatti, haadha gaayyee, simbira halkaniis.

²⁰? ?Munyuuqaan baal'ee qaban, miilla afuriinis kan adeeman hundinuu isin biratti xuraa'oo haa ta'an!

²¹Haa ta'u iyyuu malee, uumama baal'ee qaban, warra miilla afuriinis adeeman keessaa warra ittiin utaaluudhaaf hojjaan miilla isaanii dachaafattuu qabu nyaadhaa!

²²Isaan kana keessaa kan akka hawaannisaa akka qomoo qomoo isaatti, hawaannisa isa barbadeessu akka qomoo qomoo isaatti, farda Waaqayyoo akka qomoo qomoo isaatti, qorophisas akka qomoo qomoo isaatti nyaachuu in dandeessu*.

²³Uumamni munyuuqaan baal'ee qaban miilla afuris kan qaban hundinuu isin duratti xuraa'oo haa ta'an!

²⁴Isaan kun isin in xureessu; namni raqa isaaniitti bu'e hundinuus hamma galgalaatti xuraa'aa in ta'a*;

²⁵namni raqa isaanii lafaa fuudhe hundinuus uffata isaa haa miiccatu, hamma galgalaattis xuraa'aa haa ta'u![23]

²⁶? ?Horiin kotteen isaanii baqaqaa ta'ee lamatti immoo hin hiramne, kan alaala hin guurre hundinuus isin duratti xuraa'oo haa ta'an! Namni raqa isaaniitti bu'e hundinuus xuraa'aa haa ta'u!

²⁷Uumama lubbuu qaban miilla afuriin adeeman hundumaa keessaa warri bar'uudhaan ejjetan hundinuu isin duratti xuraa'oo haa ta'an! Raqa isaaniitti kan bu'es hamma galgalaatti xuraa'aa haa ta'u!

²⁸Isaan isin duratti xaraa'oo waan ta'aniif, namni raqa isaanii lafaa fuudhe uffata isaa haa miiccatu, hamma galgalaattis xuraa'aa haa ta'u!

²⁹? ?Bineensota warra lafa irra munyuuqan keessaa immoo warri kanatti fufanii jiran isin duratti xuraa'oo haa ta'an! Tuqaan, hantuunni, loccuunis akka qomoo qomoo isaaniitti*;

³⁰fuliyoon, loccuun daggalaa, lootuun, qarcabboon, gaararaan,

³¹bineensota munyuuqan keessaa isaan kun isin duratti xuraa'oo haa ta'an! Namni raqa isaaniitti bu'es hamma galgalaatti xuraa'aa in ta'a;

³²raqni bineensota kanaa mi'a muka irraa, uffata irraa, gogaa irraa, keeshaa irraas hojjetame irra yoo bu'e, isaan in xureessa; mi'a sanas bishaan keessa kaa'aa! Haa ta'u iyyuu malee, isaan hamma galgalaatti xuraa'oo in ta'u; isa booddee garuu qulqullaa'oo in ta'u.

³³Inni qodaa suphee keessa yoo bu'e, wanti qodaa sana keessa jiru hundinuu xuraa'aa in ta'a; isin immoo qodicha cabsaa!

³⁴Nyaanni nyaatamu hundinuu bishaan qodaa akkasii keessa jiru keessa yoo bu'e, xuraa'aa in ta'a; dhugaatiin qodaa akkasii keessaa dhugamu hundinuus xuraa'aa dha;

³⁵wanti raqni isaanii itti bu'e hundinuu xuraa'oo in ta'u; iddoo waa itti tolchan, iddoon ibiddaas sababii isaaniitiif yoo xuraa'an isin duratti xuraa'ootti haa ilaalaman, haa diigamanis!

³⁶Bishaan raqa bineensota sanaatti bu'e duwwaatu xuraa'aa dha malee, burqaan bishaanii fi boolli bishaan itti walitti kuufamu qullaa'aa in ta'a.

³⁷Raqichi sanyii facaafamuuf jedhu irra yoo bu'e garuu, sanyichi qullaa'aadhuma ta'ee in hafa.

³⁸Garuu bishaan sanyichatti naqamee utuu jiruu raqichi yoo isa irra bu'e, sanyichi isin duratti xuraa'aa haa ta'u![24]

³⁹? ?Horii nyaataaf isiniif kennaman keessaa tokko yoo du'e, namnis raqa isaatti yoo bu'e, namichi hamma galgalaatti xuraa'aa haa ta'u!

⁴⁰Namni raqa horii sanaa nyaates uffata isaa haa miiccatu, hamma galgalaatti immoo xuraa'aa haa ta'u! Namni raqa sana lafaa fuudhes uffata isaa haa miiccatu, hamma galgalaatti immoo xuraa'aa haa ta'u!

⁴¹? ?Uumamni lafa irra munyuuqan hundinuu ciigga'amoo dha; kanaafis nyaatamuun isaan irra hin jiru;

⁴²uumamni lafa irra munyuuqan hundinuu, warri garaadhaan lo'an, warri miilla afuriin adeeman, warri miilla baay'ee qabanis ciigga'amoo waan ta'aniif, isaan hin nyaatinaa!

⁴³Uumamni munyuuqan kun ciigga'amoo akka isin hin goonetti isaaniin of hin xureessinaa!

⁴⁴Ani Waaqayyo gooftaa keessan; ani qulqulluu waanan ta'eef, isinis of qulleessaa, qulqullootas ta'aa! Uumama lafa irra munyuuqan kanaan namummaa keessan hin xureessinaa!

⁴⁵Ani Waaqayyo isa gooftaa isiniif ta'uudhaaf biyya Gibxii isin baasee dha; kanaaf ani qulqulluu akkuman ta'e, isinis immoo qulqulloota ta'aa*![25]

⁴⁶? ?Kun seera waa'ee horii qe'eef, waa'ee allaattotaaf, waa'ee simbirrootaaf, waa'ee uumama lubbuu qaban bishaan keessa jiraataniif, uumama lafa irra munyuuqan hundumaafis kennamee dha.

⁴⁷Akkasitti isin warra qullaa'oo fi warra qullaa'oo hin ta'in, uumama warra nyaatamanii fi warra hin nyaatamne gargar in baaftu? jedhaa!? jedhe.