Read west central oromo Seera Lewwootaa 14 Bible Online

Seera Lewwootaa 14 - west central oromo bible

Seera Lewwootaa 14

²?Seerri nama dhukkuba lamxii qabu tokkoof kenname kanatti fufee jira; namichi guyyaa itti qulleeffamu sanatti gara lubichaatti in geeffama*.

³Lubichi iddoo buufataa keessaa ala ba'ee namichi dhukkuba lamxii sanattii fayyee fi hin fayyinee isaa qoree haa ilaalu!

⁴Kana booddee lubichi simbirroota qullaa'oo lama fayyaatti, muka gaatirraa, fo'aa dhiilgee, hisoophiis namicha isa qulleeffamu sanaaf akka fidan haa ajaju*!

⁵Itti fufees, lubichi simbirroota sana keessaa tokko qodaa suphee keessatti bishaan yaa'u irratti akka gorra'amtu haa abboomu!

⁶Simbira ishee fayyaatti jirtu sana immoo fuudhee muka gaatirraa, fo'aa dhiilgee fi hisoophii wajjin dhiiga simbira ishee qodaa suphee keessatti bishaan yaa'u irratti gorra'amte sana keessa haa cuuphu!

⁷Namicha isa lamxiittii qulleeffamu sanattis si'a torba facaasee qullaa'aa ta'uu isaa haa beeksisu! Kana booddee simbira ishee fayyaa jirtu sana bakkeetti gad haa dhiisu*![30]

⁸?Namichi inni qulleeffamu sun uffata isaa haa miiccatu! Rifeensa isaa hundumaa haa haaddatu, dhagna isaas bishaaniin haa dhiqatu! Yommus inni akka seeraatti qullaa'aa in ta'a; kana booddee gara iddoo buufataatti haa deebi'u, guyyaa torba godoo isaatti utuu hin galin ala haa turu*!

⁹Guyyaa torbaffaattis akkasuma rifeensa isaa hundumaa haa haaddatu! Mataa isaa, areeda isaa, nyaara isaa hundumaa haa haaddatu! Uffata isaa haa miiccatu, dhagna isaas bishaaniin haa dhiqatu! Egaa inni qullaa'aa in ta'a.[31]

¹⁰?Guyyaa saddeettaffaatti immoo korbeeyyii hoolaa mudaa hin qabne lamaa fi hoolaa dhaltuu waggaa tokkoo mudaa kan hin qabne tokko akkasumas kennaa midhaaniitiif daakuu ba'eessa harka kurnan eefaa tokko keessaa harka sadii isa dhadhaa ejersaatiin sukkuumame, dhadhaa ejersaa safarri isaa akka harka sadan liitrii tokko keessaa harka tokko baasuu wajjin haa geessu!

¹¹Lubichi inni seera qulleessuu sana raawwatu namicha isa qulleeffamu sana kennaa inni dhi'eessee wajjin balbala dunkaana wal ga'iitti fuula koo duratti haa dhi'eessu!

¹²?Lubichis korbeeyyii hoolaa sana keessaa tokko fuudhee dhadhaa ejersaa safarri isaa harka sadan liitrii tokko keessaa akka harka tokko baasu sanaa wajjin aarsaa sababii yakkaatiif dhi'aatu godhee akka aarsaa sochoofamutti fuula koo duratti haa sosochoosu!

¹³Korbeessichas iddoo qulqullaa'aa aarsaa sababii cubbuutiif dhi'aatuuf qalma gubamu itti gorra'e sanatti haa gorra'u! Akkuma aarsaan sababii cubbuutiif dhi'aatu kan lubichaa ta'e akkasuma aarsaan sababii yakkaatiif dhi'aatus kan isaa ti; innis waan hundumaa irra qulqulluu dha*.

¹⁴Lubichis dhiiga isa aarsaa sababii yakkaatiif dhi'aate sana fuudhee, fiixee gurra mirgaa namicha isa qulleeffamu sanaatti, abgudduu harka isaa isa mirgaatti, abgudduu miilla isaa isa mirgaattis haa dibu*!

¹⁵Lubichi dhadhaa ejersaa safarri isaa harka sadan liitrii tokko keessaa akka harka tokko baasu sanas irraa fuudhee bar'uu harka ofii isaa isa bitaa irratti haa naqu!

¹⁶Quba harka isaa isa mirgaa dhadhaa ejersaa isa bar'uu harka isaa isa bitaa keessa jiru sana cuuphee, dhadhaa sana quba isaatiin si'a torba fuula ana Waaqayyo duratti haa facaasu*!

¹⁷Dhadhaa ejersaa isa bar'uu isaa keessatti hafe sana irraa immoo fiixee gurra mirgaa namicha qulleeffamuutti, abgudduu harka isaa isa mirgaatti, abgudduu miilla isaa isa mirgaatti, lafa isuma dhiigni aarsaa sababii yakkaatiif dhi'aatu irratti dibame sana irratti dabalee haa dibu!

¹⁸Dhadhaa ejersaa isa bar'uu isaa keessatti hafe immoo mataa namicha isa qulleeffamu sanaatti dibee, ana Waaqayyo duratti araara isaaf haa buusu!

¹⁹Lubichi aarsaa sababii cubbuutiif dhi'aatu sana dhi'eesse namicha isa xuraa'ummaaa isaatti qulleeffamu sanaaf araara haa buusu! Kana booddee inni horii qalma gubamu sana haa gorra'u!

²⁰Lubichi qalma gubamu sanaaf kennaa midhaanii iddoo aarsaa irratti dhi'eessee namichaaf araara haa buusu! Yommus namichi qullaa'aa in ta'a.[32]

²¹?Namichi sun garuu harka-qal'eessa ta'ee, isaan kana dhi'eessuu yoo dadhabe, isumaaf araara buusuudhaaf xobbaallaa hoolaa tokko akka aarsaa sababii yakkaatiif dhi'aatuutti aarsaa sochoofamuuf akkasumas kennaa midhaaniitiif daakuu dhadhaa ejersaatiin sukkuumamee harka kurnaffaa eefaa tokko keessaa harka tokkoof dhadhaa ejersaa safarri isaa harka sadan liitrii tokko keessaa akka harka tokko baasu haa fidu!

²²Gugee horaa lama yookiis gugee sosookkee lama keessaa kan danda'u fidee, tokko aarsaa sababii cubbuutiif, tokko immoo qalma gubamuuf haa dhi'eessu*[33]

²³?Isaan kanas guyyaa saddeettaffaatti seera qulleeffamuu isaatiif balbala dunkaana wal ga'iitti fuula koo duratti lubichatti haa fidu!

²⁴Lubichis xobbaallicha aarsaa sababii yakkaatiif dhi'aatu, dhadhaa ejersaa safarri isaa harka sadan liitrii tokko keessaa akka harka tokko baasuu wajjin fuudhee, akka aarsaa sochoofamuutti ana Waaqayyo duratti haa sosochoosu!

²⁵Inni xobbaallaa aarsaa sababii yakkaatiif dhi'aate sana haa gorra'u! Lubichi dhiiga xobbaallichaa fuudhee fiixee gurra mirgaa namicha isa qulleeffamu sanaatti, abgudduu harka isaa isa mirgaatti, abgudduu miilla isaa isa mirgaattis haa dibu!

²⁶Akkasumas dhadhaa ejersaa sana irraa bar'uu harkaa ofii isaa isa bitaa irratti haa naqu!

²⁷Quba harka isaa isa mirgaatiinis dhadhaa ejersichaa isa bar'uu harka isaa isa bitaa irra jiru irraa fuudhee si'a torba fuula koo duratti haa facaasu!

²⁸Dhadhaa ejersaa isa bar'uu isaa keessaa sana irraa ammas fuudhee fiixee gurra mirgaa namicha isa qulleeffamuu sanaatti, abgudduu harka isaa isa mirgaatti, abgudduu miilla isaa isa mirgaattis lafa dhiigni aarsaa sababii yakkaatiif dhi'aatu irratti dibame sana irratti dabalee haa dibu!

²⁹Dhadhaa ejersaa isa bar'uu isaa keessatti hafe immoo mataa namicha isa qulleeffamu sanaatti dibee ana Waaqayyo duratti araara haa buusuuf!

³⁰Ergasii gugee horaa yookiis gugee ishee kaan sosookkee keessaa kanuma inni danda'e fidee in dhi'eessa;

³¹wanta danda'ee fide sana keessaas tokko aarsaa sababii cubbuutiif dhi'aatuuf, tokko immoo qalma gubamuuf kennaa midhaanii irratti dabalee in dhi'eessa; akkasitti lubichi namicha isa qulleeffamu sanaaf fuula koo duratti araara in buusa? jedhe.

³²Nama dhukkubni lamxii qabnaan harka-qal'eessa ta'ee qullaa'uu isaatiif wanta barbaachisu baafachuu dadhabeef immoo seera kanatu kenname.

³³Waaqayyo ergasii Musee fi Aaroniin,

³⁴?Isin biyya Kana'aan isa ani akka isin dhaaltaniif isiniif kennutti yommuu galtan, ani biyyicha keessaa mana tokkotti dhukkuba lamxii yommuun fidu,

³⁵abbaan manichaa gara lubichaa dhaqee, ?Wanti dhukkuba lamxii fakkaatu tokko mana koo keessatti argameera? haa jedhu!

³⁶Lubichi immoo dhukkuba sana qoree ilaaluudhaaf mana sanatti utuu ol hin lixin mi'i manicha keessa jiru hundinuu akka hin xuroofnetti akka gad baafamuuf haa abboomu! Kana booddee lubichi ol lixee manicha qoree haa ilaalu!

³⁷Qoree ilaaluu isaa kanaanis dhukkubichi keenyan manichaa irratti argame sun iddoo gad nyaatamaa bifa margaa yookiis diimaa ta'e keenyan keessaa gad dhooqee yoo argame,

³⁸lubichi manicha keessaa ba'ee manicha guyyaa torbaaf haa cufu!

³⁹Guyyaa torbaffaatti immoo deebi'ee dhufee haa ilaalu! Dhukkubichi keenyan manichaa irratti tamsa'aa yoo adeeme,

⁴⁰dhagaan dhukkubichi irratti argame achi keessaa baafamee iddoo xuraa'aa isa mandara duubaatti akka gatamuuf haa ajaju!

⁴¹Keenyan manichaas keessa isaa guutummaatti haa soofsisu! Inni irraa soofame sunis iddoo xuraa'aa isa mandara duubaatti haa gatamu!

⁴²Ergasiis dhagaa kan biraa fidanii iddoo dhagaa isa baafamee buusanii manicha suphee haaraadhaan cululuqsanii haa maragan!

⁴³Dhagichi keessaa baafamee keenyan isaas soofamee cululuqfamee erga maragamee booddee dhukkubichi deebi'ee manicha keessatti yoo argame,

⁴⁴lubichi ammas dhaqee manicha qoree haa ilaalu! Dhukkubichi achi keessatti yoo tamsa'e, manicha keessa dhukkubni hamaan jiraachuu isaa ti, manichis xuraa'uu isaa ti;

⁴⁵egaa manichi diigamee, dhagaan isaa, mukti isaa, maraggiin isaas hundinuu gara iddoo xuraa'aa isa mandara duubaatti haa geeffamu!

⁴⁶Namni yeroo manni sun cufamaa ture isa keessa lixu hundinuu hamma galgalaatti xuraa'aa in ta'a;

⁴⁷namni manicha keessa ciisu yookiis isa keessatti nyaatu uffata isaa miiccachuun irra jira.

⁴⁸?Garuu manichi cululuqfamee erga maragamee booddee lubichi dhufee qoree yommuu ilaalu, dhukkubichi manicha keessa hin tamsaane yoo ta'e, manichi dhukkuba isaatii waan fayyeef qullaa'aa ta'uu isaa haa beeksisu!

⁴⁹Manicha ittiin qulleessuudhaaf immoo simbirroota lama, muka gaatirraa, fo'aa dhiilgee, hisoophiis haa geessu!

⁵⁰Simbirroota sana keessaa tokko qodaa suphee bishaan burqituu keessa jiruu irratti haa gorra'u!

⁵¹Ergasii immoo muka gaatirraa, hisoophii, fo'aa dhiilgee, simbira ishee fayyaa jirtu sanas dhiiga simbira ishee gorra'amte sanaa keessaaf bishaan burqituu sana keessa cuuphee si'a torba manichatti haa facaasu!

⁵²Inni dhiiga simbira sanaatiin, bishaan yaa'uun, simbira ishee fayyaa jirtuun, muka gaatirraatiin, hisoophiidhaan, fo'aa dhiilgeedhaanis manicha in qulleessa.

⁵³Kana booddee simbira ishee fayyaa jirtu sana mandarattii duubatti bakkeetti gad haa dhiisu! Inni akkasitti manichaaf araara yommuu buusu, manichi qullaa'aa in ta'a? jedhe.

⁵⁴Seerri kun isa waa'ee dhukkuba gogaa namaatiif kennamee dha; dhukkubni kun lamxii, cittoo,

⁵⁵lamxii uffataa, lamxii manaa,

⁵⁶wanta dhagna namaa irratti iita'ee mul'atu, xof-xofii, roobbii, wanta dhagna irratti addaatee ba'ufai.

⁵⁷Wanti tokko qullaa'aa yookiis xuraa'aa ta'uun isaa isaan kanaan in ilaalama. Egaa seerri kun seera dhukkuba lamxii ittiin gargar baasuudhaaf kennamee dha.