Read west central oromo Seera Lewwootaa 4 Bible Online

Seera Lewwootaa 4 - west central oromo bible

Seera Lewwootaa 4

¹Waaqayyo yommus Museedhaan,

²?Namoota Israa'eliin, ?Eenyu illee utuu hin beekin abboommota koo keessaa tokko irra darbee wanta dhowwame yoo hojjete,

³inni ofii isaatii yakkee, jaras yakka hojjechiisu luba isa dibame yoo ta'e, cubbuu isa hojjete sanaaf aarsaa sababii cubbuutiif dhi'aatuuf tuntunoo mudaa hin qabne ana Waaqayyoof haa dhi'eessu!

⁴Tuntunoo sana balbala dunkaana itti wal ga'aniitti ana Waaqayyo duratti haa dhi'eessu! Harka isaa mataa tuntunichaa irra haa kaa'u, fuula koo durattis isa haa gorra'u!

⁵Lubichi inni dibame sun dhiiga tuntunichaa irraa fuudhee, dunkaana itti wal ga'an sanatti ol haa galu!

⁶Quba isaa dhiigicha cuuphee, dhiigicha irraa gar tokko golgaa isa iddoo hundumaa caalaa qulqullaa'aadhaa fi isa qulqullaa'aa gargar hiru sana gara duraatiin si'a torba ana Waaqayyo duratti haa facaasu!

⁷Lubichi dhiigicha irraa gaanfota iddoo aarsaa isa dunkaana itti wal ga'an keessaa, ana Waaqayyo duratti ixaana urgaa'aa irratti aarsan sanaatti haa dibu! Dhiigicha isa hafe hundumaa immoo miiloo iddoo aarsaa qalmaa isa balbala dunkaana itti wal ga'anii dura jiru irratti haa dhangalaasu*!

⁸Moora tuntunoo sababii cubbuutiif aarsaa dhi'aate sanaa hundumaa, moora mi'a garaatti uffisu, moora mi'a garaa irra jiru hundumaa,

⁹kalee lamaan, moora isaan irra jiru isa mudhii irraa, moora tiruu isa kalee wajjin ba'us irraa haa baasu!

¹⁰Akkuma isa dibicha qalma araaraaf dhi'aate irraa fuudhame sanaatti lubichi iddoo aarsaa qalma gubamuu irratti gubee haa aarsu!

¹¹Inni gogaa tuntunichaa, foon isaa hundumaa, mataa isaa fi miilla isaa, mi'a garaa isaa fi cumaa isaa,

¹²guutummaa isaa iddoo buufataa duubaa lafa daaraan itti nam'u iddoo isa akka seeraatti qullaa'aa jedhamutti geessee, tuullaa daaraa irratti ibidda qoraaniitiin haa gubu*![6]

¹³? ?Guutummaan waldaa Israa'el cubbuu hojjetee, abboommota koo keessaa tokko irra iyyuu darbe, waan gochuun isaaf hin taane yoo godhe, dubbichi yaa'ii sana duratti beekamaa yoo ta'uu dhabaate iyyuu yakkeera.

¹⁴Cubbuun waldaan hojjete sun yommuu beekamu, yaa'ichi aarsaa sababii cubbuutiif dhi'aatuuf tuntunoo tokko haa dhi'eessu! Isa balbala dunkaana itti wal ga'anitti haa fidu!

¹⁵Jaarsoliin waldaa sanaas fuula koo duratti harka isaanii mataa tuntunichaa irra haa kaa'an, fuula ana Waaqayyo duratti isa haa qalan!

¹⁶Lubichi inni dibame sun dhiiga tuntunicha irraa fuudhee, dunkaana itti wal ga'an sanatti haa galchu!

¹⁷Lubichi quba isaa dhiigicha cuuphee, golgicha gara duraatiin si'a torba ana Waaqayyo duratti haa facaasu!

¹⁸Lubichi gaanfota iddoo aarsaa, isa dunkaana itti wal ga'an keessa ana Waaqayyo dura jirutti haa dibu! Dhiigicha isa hafe hundumaa immoo miiloo iddoo aarsaa qalmaa isa balbala dunkaana itti wal ga'anii dura jiruu irratti haa dhangalaasu!

¹⁹Moora tuntunichaa hundumaa baasee, iddoo aarsaa irratti gubee haa aarsu!

²⁰Tuntunoo kana akkuma tuntunoo isa aarsaa sababii cubbuutiif dhi'eeffame sanaa haa godhu! Akkasittis lubichi jaraaf haa araarsu! Cubbuun isaaniis in dhiifamaaf.

²¹Kun aarsaa sababii cubbuu waldaatiif dhi'aatu waan ta'eef, tuntunicha iddoo buufataa keessaa gad haa baasu! Akkuma tuntunoo isa duraa sana gubettis haa gubu!

²²? ?Guddaan biyyaa tokko utuu hin beekin cubbuu hojjetee, abboommota ana Waaqayyo gooftaa isaa keessaa tokko irra iyyuu darbe, waan gochuun isaaf hin taane godhee yoo yakke,

²³cubbuun inni hojjete yommuu isatti beeksifamu, re'oota keessaa korbeessa mudaa hin qabne aarsaa haa dhi'eessu!

²⁴Kun aarsaa sababii cubbuutiif dhi'aatu waan ta'eef, namichi harka isaa mataa korbeessichaa irra haa kaa'u! Fuula koo duratti iddoo itti qalmi gubamu qalamuttis isa haa gorra'u!

²⁵Lubichi dhiiga korbeessa aarsaa sababii cubbuutiif dhi'aate sanaa irraa quba isaatiin fuudhee, gaanfota iddoo aarsaa isa qalmi irratti gubamutti haa dibu! Dhiiga isa hafe immoo miiloo iddoo aarsaa qalmaa irratti haa dhangalaasu!

²⁶Moora korbeessichaa hundumaa immoo akkuma moora isa kan aarsaa qalma araaraaf dhi'aatetti iddoo aarsaa irratti gubee haa aarsu! Akkasitti lubichi isaaf haa araarsu, namichaafis cubbuun isaa in dhiifama.

²⁷? ?Saba biyya sanaa keessaa namni tokko utuu hin beekin abboommota koo keessaa tokko irra iyyuu darbe, waan gochuun isaaf hin taane godhee yoo yakke,

²⁸cubbuun inni hojjete yommuu isatti beeksifamu, cubbuu isa hojjete sanaaf reettii dhaltuu mudaa hin qabne aarsaa haa dhi'eessu!

²⁹Harka isaa mataa reettii aarsaa sababii cubbuutiif dhi'aate sanaa irra haa kaa'u! Aarsaa sababii cubbuutiif dhi'aatu kana iddoo itti qalmi gubamu qalamutti haa gorra'u!

³⁰Lubichi dhiiga reettii sanaa irraa quba isaatiin fuudhee, gaanfota iddoo aarsaa isa qalmi irratti gubamutti haa dibu! Dhiiga isa hafe hundumaa immoo miiloo iddoo aarsaa sana irratti haa dhangalaasu!

³¹Akkuma moorri aarsaa qalma araaraaf dhi'aate sanaa ba'etti, moora ishee haa baasu! Lubichi aarsaa urgaan fooliin isaa garaa ciibsu godhee iddoo aarsaa irratti ana Waaqayyoof gubee haa aarsu! Akkasitti lubichi isaaf haa araarsu! Namichaafis cubbuun isaa in dhiifama.

³²? ?Inni aarsaa sababii cubbuutiif dhi'aatuuf xobbaallaa hoolaa yoo dhi'eesse, hoolaa dhaltuu mudaa hin qabne haa fidu!

³³Harka isaas mataa hoolaa aarsaa sababii cubbuutiif dhi'aate sanaa irra haa kaa'u! Aarsaa sababii cubbuutiif dhi'aatu kana iddoo itti qalmi gubamu qalamutti haa gorra'u!

³⁴Lubichi dhiiga hoolaa aarsaa sababii cubbuutiif dhi'aate sanaa irraa quba isaatiin fuudhee gaanfota iddoo aarsaa isa qalmi irratti gubamutti haa dibu! Dhiiga isa hafe hundumaa immoo miiloo iddoo aarsaa sana irratti haa dhangalaasu!

³⁵Akka moorri hoolaa aarsaa qalma araaraaf dhi'aate sanaa ba'etti, moora hoolattii haa baasu! Lubichi moora sana iddoo aarsaa qalmi itti ana Waaqayyoof gubamuu irratti anaaf gubee haa aarsu! Akkasitti lubichi namicha cubbuu hojjete sanaaf haa araarsu! Namichaafis cubbuun isaa in dhiifama.