Read west central oromo Seera Lewwootaa 9 Bible Online

Seera Lewwootaa 9 - west central oromo bible

Seera Lewwootaa 9

¹Museen guyyaa saddeettaffaatti Aaronii fi ilmaan isaa, jaarsolii Israa'elis waamee,

²Aaroniin, ?Aarsaa sababii cubbuutiif dhi'aatuuf sa'a keessaa tuntunoo tokko, qalma gubamuuf immoo korbeessa hoolaa tokko, lamaanuu warra mudaa hin qabne fuudhiitii fuula Waaqayyoo duratti dhi'eessi!

³Namoota Israa'elin immoo, ?Aarsaa sababii cubbuutiif dhi'aatuuf korbeessa reettii tokko, qalma gubamuuf immoo dibicha waggaa tokkoo fi xobbaallaa waggaa tokkoo mudaa kan hin qabne fuudhaa!

⁴Har'a Waaqayyo waan isinitti mul'atuuf, korma, korbeessa hoolaa qalma araaraaf akkasumas kennaa midhaanii isa dhadhaa ejersaatiin sukkuumame fuula Waaqayyoo duratti aarsuudhaaf dhi'eessaa!? jedhi!? jedhe.

⁵Isaan yommus wanta Museen abboome hundumaa gara balbala dunkaana itti wal ga'aniitti in fidan; waldichis guutummaatti dhi'aatee fuula Waaqayyoo dura in ijaajje.

⁶Museen ergasii, ?Wanta Waaqayyo akka hojjettaniif isin abboome kana hojjedhaa! Ulfinni Waaqayyoo isinitti in mul'ata? jedhe*.[15]

⁷Museen ammas Aaroniin, ?Iddoo aarsaatti dhi'aadhu! Akkuma Waaqayyo abboome waa'ee aarsaa kee isa sababii cubbuutiif dhi'aatuuf qalma kee isa gubamu dhi'eessi! Ofii keetiif, jaraafis araara buusi! Aarsaa jaraa dhi'eessi, isaaniifis araara buusi? jedhe*.

⁸Aaronis gara iddoo aarsaatti dhi'aatee, dibicha isa aarsaa sababii cubbuu isaatiif dhi'aate sana in gorra'e.

⁹Ilmaan isaa dhiiga dibichichaa isatti in dhi'eessan; inni immoo quba isaa dhiigicha cuuphee, gaanfota iddoo aarsaatti in dibe; dhiiga isa hafe immoo miiloo iddoo aarsaa irratti in dhangalaase.

¹⁰Moora, kalee lamaanii fi moora tiruu dibicha isa aarsaa sababii cubbuutiif dhi'aate sanaa garuu akkuma Waaqayyo Musee abboometti, iddoo aarsaa irratti gubee in aarse.

¹¹Foon dibichichaa fi gogaa isaa iddoo buufataa keessaa ala baasee ibiddaan in gube.

¹²Aaron horii qalma gubamuuf dhi'aate sana in gorra'e; ilmaan isaa dhiiga dibichichaa isatti in fidan; inni immoo dhiigicha iddoo aarsaatti naannessee in facaase.

¹³Ilmaan isaa qalma gubamu isa bu'aa bu'aatti kukkutame sana mataa isaa wajjin isatti in fidan; innis iddoo aarsaa irratti gubee in aarse.

¹⁴Many'eewwan isaa fi mi'a garaa isaa miicee qalma gubamuu sanaa wajjin iddoo aarsaa irratti gubee in aarse.[16]

¹⁵Aaron aarsaa jaraa in dhi'eesse; korbeessa reettii isa aarsaa sababii cubbuu jaraatiif dhi'aatu sana fuudhee gorra'ee, akkuma isa duraatti aarsaa sababii cubbuutiif dhi'aatu godhee in dhi'eesse.

¹⁶Qalma gubamu fidee, akka seera isaatiitti isa in dhi'eesse.

¹⁷Kennaa midhaaniis immoo dhi'eessee, isa irraa kaballaa tokko fuudhee, qalma isa ganama ganama gubamu bukkeetti iddoo aarsaa irratti gubee in aarse.

¹⁸Aaron qalma araaraa jara sanaatiif dibichichaa fi korbeessicha hoolaa in gorra'e; ilmaan isaa dhiiga horii sanaa isatti in fidan; inni immoo dhiigicha iddoo aarsaatti naannessee in facaase.

¹⁹Ilmaan Aaron immoo moora dibichichaa fi korbeessichaa, cooma duboo, moora mi'a garaatti uffisu, kaleewwan, moora tiruu fuudhanii,

²⁰moora sana hundumaa handaraafota irra in kaa'an; Aaronis moora sana iddoo aarsaa irratti gubee in aarse.

²¹Akkuma Waaqayyo Musee abboometti handaraafaa fi luka mirgaa, aarsaa sosochoofamu godhee fuula Waaqayyoo duratti in sosochoose*.[17]

²²Yommus Aaron harka isaa jara irra qabee isaan in eebbise; aarsaa sababii cubbuutiif dhi'aatu, qalma gubamu, qalma araaraas erga dhi'eessee booddee immoo gad in bu'e*.

²³Kana booddee Museenii fi Aaron gara dunkaanicha keessaatti ol in lixan; isaan achii gad ba'anii jara yommuu eebbisan, ulfinni Waaqayyoo saba sanatti in mul'ate.

²⁴Ibiddis Waaqayyo biraa gad bu'ee qalma gubamuu fi moora iddoo aarsaa irra jiru sana in fixe; jarri hundinuu kana arganii adda isaaniitiin gombifamanii guddisanii sagalee gammachuu in dhageessisan*.[18]