Read west central oromo Faaruu Ermiyaas 3 Bible Online

Faaruu Ermiyaas 3 - west central oromo bible

Faaruu Ermiyaas 3

¹Ani nama ulee dheekkamsa isaatiin adabamee rakkina argee dha;

²inni na ari'ee iddoo ifni hin jirre dukkana keessa akkan jiraadhu in godhe.

³Dhugumaan anatti gara galee, guyyaa hundumaa harka isaatiin na rukuta.

⁴Inni foon koo fi gogaa koo in kukkute, lafee koos in caccabse.

⁵Karaa hundumaa na naannessee, rakkinaan jireenya koo anatti in hadheesse;

⁶akka warra dur du'anii awwaalamanii, dukkana keessa na jiraachise*.[12]

⁷Akkan jalaa hin baaneef naannessee dallaa anatti in ijaare, funyoo sibiilaa isa ulfaataadhaanis na hidhe;

⁸hamma fedhe illee gara isaatti yoon iyyadhe, gargaarsaafis yoon isa kadhadhe, inni kadhata koo hin dhaga'u*.

⁹Inni dallaa dhagaa soofamaadhaan ijaarameen karaa anatti in cufe; karaa jireenya kootiis in jajali'se.[13]

¹⁰Inni akka amaaketa nama gaaduu fi akka leenca dhokatee waa eeggatuu waan anatti ta'eef*,

¹¹karaa koo irraa na kaachisee reebee na bulleesse, bakkeettis na gatee adeeme;

¹²iddaa isaa dhifatee, booddee isaas anatti in qajeelfate*.[14]

¹³Inni xiyya mann'ee isaa keessaa luqqisee ittiin kalee koo waraane*;

¹⁴ani saba koo hundumaaf nama kolfaa nan ta'e, guyyaa hundumaas isaan waa'ee koo in weeddisu*;

¹⁵inni nyaata hadhaa'aa na quubse, dhugaatii hadhaa qabuunis na macheesse*.[15]

¹⁶Inni cirrachaan ilkaan koo caccabsee, awwaara keessa na gangalche;

¹⁷lubbuu koo nagaa in dhabsiise, jireenyi gaariinis maal akka ta'e nan wallaale;

¹⁸kana irratti, ?Ulfinni koo, wanti ani Waaqayyo biraa abdadhe hundinuus in sokke? nan jedhe.

¹⁹Rakkina koo fi joora koo, nyaata hadhaa'aa quufuu koo fi, dhugaatii hadhaa qabuun machaa'uu koo nan yaadadha;

²⁰ani kana yeroon yaadadhu hundumaatti, lubbuun koo na keessatti in xinnaatti;

²¹kana hundumaa yaadu keessaa immoo ani abdii qaba.

²²Araarri Waaqayyoo dhuma waan hin qabneef, gaarummaa isaa irraa kan ka'e badiisa keessaa baraaramne*.

²³Araarri isaa ganama ganama in haareffama, amanamummaan isaas baay'ee dha;

²⁴egaa ani, ?Waaqayyo qooda koo ti, kanaafis isa nan abdadha? nan jedha*.[16]

²⁵Waaqayyo warra isa abdataniif, warra isa barbaaddataniifis gaarii dha;

²⁶cal jedhanii fayyisuu Waaqayyoo eeggachuun gaarii dha*;

²⁷namni bara dargagummaa isaatti waanjoo ittiin barsiifamu baachuun isaaf gaarii dha.[17]

²⁸Yeroo Waaqayyo waanjicha isa irra kaa'us kophaa isaa calluma jedhee taa'ee haa eeggatu*!

²⁹Tarii abdii qaba ta'a, kanaaf afaan isaa qabatee haa taa'u!

³⁰Maddii isaa warra isa kabalanitti haa qabu, ceephoos obsaan haa baatu*![18]

³¹Waaqayyo bara baraan isa hin gatu;

³²Waaqayyo gadda yoo namatti fide iyyuu, akka baay'ina gaarummaa isaatti deebi'ee immoo in araarama*;

³³inni namoota rakkisuutti yookiis dhiphisuutti hin gammadu.[19]

³⁴Warri aboo qaban, warra biyya lafaa keessatti hidhaman hundumaa miilla isaanii jalatti yommuu dhidhiitan,

³⁵aabba isa hundumaa gara irraa duratti firdii yommuu nama dhowwatan,

³⁶firdii qajeelaas nama duraa yommuu jal'isan, Waaqayyo kana hundumaa in arga mitii ree?

³⁷Utuu Waaqayyo hin abboomin, eenyutu waa dubbatee taasisuu danda'a ree*?

³⁸Wanti hamaan yookiis wanti gaariin akkuma aabba inni waan hundumaa gara irraa jiru dubbatutti in ta'a mitii ree*?

³⁹Namni utuu hin du'in sababii cubbuu isaatiif yommuu adabamu maaliif guunguma ree?[20]

⁴⁰Egaa kottaa karaa keenya qorree in ilaallaa, gara Waaqayyoottis in deebina!

⁴¹Kottaa yaada keenyaa fi harka keenya gara Waaqayyo isa waaqa irra jiruutti ol qabnee,

⁴²?Nuyi abboommii kee irra daddarbineerra, siif abboomamuus dinneerra, atis immoo cubbuu keenya nuuf hin dhiifne*.[21]

⁴³?Ati nutti aartee, nu ariitee, nu gogorraate, oo'as akka ati nutti hin argisiifneef aariitu si golboobe;

⁴⁴kadhanni keenya si bira akka hin geenyetti, duumessa ofitti in golgite;

⁴⁵saba warra kaan keessatti kosii haramee gatame nu goote.

⁴⁶?Diinonni keenya hundinuu afaan isaanii bal'isanii nutti bananiiru;

⁴⁷naasuunii fi boolla keessatti kufuun nu irra in ga'e, diigamuunii fi baduunis nu argate? in jenna.

⁴⁸Mandarri saba kootii waan diigamteef, imimmaan koo akka bishaanii in dhangala'a.

⁴⁹Imimmaan koo utuu gargar hin citin in dhangala'a, iji koos boqonnaa hin qabu;

⁵⁰kunis hamma Waaqayyo waaqa irraa gad ilaalee na argutti itti in fufa;

⁵¹iji koo wanta durboota mandara kootii irra ga'e arguun isaa ana in gaddisiisa*.[22]

⁵²Diinonni koo sababii malee, akka nama gogorrii adamsuutti na adamsan;

⁵³isaan na awwaalanii dhagaa na irratti gara galchuu in yaalan*;

⁵⁴yommuu bishaan mataa koo irra gara gale, kan koo kanumaan citeen se'e*.[23]

⁵⁵Yaa Waaqayyo! Ani boolla gad fagoo keessaa maqaa kee nan waammadhe;

⁵⁶ati sagalee koo dhageesseetta, yommuu ani gargaarsaaf sitti iyyadhu, ati gurra kee ana irraa achi hin qabin!

⁵⁷Yommuun si waammadhe, ati immoo anatti dhi'aattee, ?Hin sodaatin!? naan jette.

⁵⁸Yaa gooftaa! Ati dhimma koo anaaf ilaaltee, jireenya koos in furte.

⁵⁹Yaa Waaqayyo! Ati hammina ana irratti hojjetame argiteetta, kanaaf ati anaaf faradi!

⁶⁰Ijaa baafachuudhaaf waan isaan hojjetan hundumaa, wanta hamaa isaan ana irratti koratan hundumaas argiteetta.

⁶¹Yaa Waaqayyo! Ga'oo isaan anatti ga'isan, wanta hamaa isaan anatti koratan hundumaas dhageesseetta;

⁶²dubbii warri ana irratti ka'an dubbataniif, yaada isaan guyyaa hundaa ana irratti yaadan beekta.

⁶³Kunoo! Isaan yommuu taa'anii fi yommuu ka'an weedduudhaan anatti in ga'isu*.[24]

⁶⁴Yaa Waaqayyo! Ati akka hojii isaaniitti wanta isaaniif ta'u in kennitaaf*;

⁶⁵abaarsi kee akka isaanitti dhufutti, boqu-jaboota isaan godhi!

⁶⁶Aariidhaan isaan ari'ii, bantiiwwan waaqaa kee jalaa isaan balleessi![25]