Read west central oromo Faaruu Ermiyaas 5 Bible Online

Faaruu Ermiyaas 5 - west central oromo bible

Faaruu Ermiyaas 5

¹Yaa Waaqayyo wanta nu irra ga'e yaadadhu! Kunoo, yeellaasifamuu keenyas ilaali!

²Dhaalli keenya kan ormaa ta'e, manneen keenyas alagaatu fudhate.

³Nuyi ijoollee hiyyeeyyii abbaan irra hin jirre taane, haadhotiin keenyas haadha hiyyeessaa ta'an;

⁴bishaan horiidhaan bitannee dhugna, qoraanis horii malee hin argannu.

⁵Warri nu ari'an faana keenya irra bu'anii nu qaqqabu, nuyi dadhabneerra isaan garuu boqonnaa nuuf hin kennan.

⁶Buddeena quufuudhaaf jennee, warra Gibxii fi warra Asoritti of in kennine*.

⁷Abboonni keenya warri dur cubbuu hojjetan, har'a hin jiran; nuyi garuu amma iddoo isaanii adabamaa jirra*.

⁸Garboonni nu irratti in mo'an, namni isaan jalaa nu baasu garuu hin jiru.

⁹Lafa onaa keessa warri nama ajjeesan waan jiraniif, nuyi buddeena keenya illee lubbuu keenya gannee arganna;

¹⁰beela irraa kan ka'e gogaan dhagna keenyaa illee gugubatee, akka giimii ibiddaa in ta'e.[29]

¹¹Dubartoonni Xiyoon keessatti, durboonnis mandaroota Yihudaa keessatti in yeellaasifaman;

¹²angafoota biyyaa harka isaaniitiin in fannisan, jaarsoliidhaaf ulfina hin kennine*;

¹³dargaggoota daakuu in daaksifatan, ijoollota immoo qoraan guursifatanii, ba'aa ulfaataa jalatti akka kukkufan in godhan;

¹⁴jaarsoliin, yaa'ii karra mandarichaa dhiisanii in adeeman, dargaggoonnis sagalee faarfannaa dhageessisuu in dhiisan.

¹⁵Garaan keenya gammachuu in dhabe, sirbi keenyas gaddatti in diddiirame;

¹⁶nuyi cubbuu waan hojjenneef, ulfinni keenya nu irraa godaaneera'o, nuuf wayyoo!

¹⁷Onneen keenya dhukkubsatee, iji keenyas dimimmisaa'uun,

¹⁸sababii tulluun Xiyoon onee, waangonni achi irra yaa'aniif ture.[30]

¹⁹Ati garuu yaa Waaqayyo, bara baraan in moota, teessoon kees dhalootaa hamma dhalootaatti in jiraata*;

²⁰ati maaliif bara kana hundumaa nu irraanfatte? maaliifis yeroo dheeraa hammana ga'uuf nu gatte?

²¹Yaa Waaqayyo, gara kee akka dhufnutti ati ofii keetii nu deebisi! Ulfina keenya duriis nuuf deebisi*!

²²Yoo kanaa achii baay'ee nutti aaruu kee ti, raawwattees nu gatuu kee ti.[31]