Read west central oromo Macaafa Hisqi'el Raajichaa 19 Bible Online

Macaafa Hisqi'el Raajichaa 19 - west central oromo bible

Macaafa Hisqi'el Raajichaa 19

¹Amma ati gurguddoota Israa'eliif wawwaadhu!

²?Haati kee leencota keessaa, leenca dhalaa attamii turte! Isheen leencota warra saafela gidduu ciiftee, ilmoolee ishee in guddifatti turte*;

³isheen ilmoolee ishee keessaa isa tokko in guddifte, innis leenca saafela ta'ee, adamsee qabachuu in bare, namas in nyaate;

⁴sabni lafa irraa waa'ee isaa in dhaga'an; inni boolla isaanii keessatti in qabame, isaanis hidhanii biyya Gibxiitti isa geessan*.[80]

⁵?Isheenis eegdee abdii akka hin qabne yommuu argite, ilmoolee ishee keessaa tokko fuutee guddifattee, leenca saafela isa goote;

⁶innis leencotaa wajjin asii fi achi in adeeme, leenca saafelas in ta'e; adamsee qabachuu in bare, namas in nyaate.

⁷Inni manneetii mootummaa isaanii[81] in caccabse, mandaroota isaaniis in onse; biyyichii fi warri biyyicha keessa jiran hundinuu, sagalee aadnaa isaa dhaga'anii in golgolaa'an.

⁸Sabni lafa irraa karaa jiru isa irratti in ka'an, kiyyoo isaanii isa duratti in diriirsan, innis boolla isaanii keessatti in qabame;

⁹isaanis isa hidhanii godoo sibiilaa keessa kaa'anii, mootii Baabilonitti isa geessan; sagaleen isaa tulloota Israa'el irratti deebi'ee akka hin dhaga'amnettis, iddoo inni itti hidhamee eegamu keessa isa buusan*.[82]

¹⁰?Haati kee akka muka waynii isa iddoo dhaabaa keessaa, akka isa bishaan qarqara dhaabatee, bishaan baay'ee waan argatuufis, akka isa damee baay'ee fi ija baay'ee godhatu turte*;

¹¹dameen ishee jabaatee, ulee mootummaatiif in ta'e; hojjaan ishee baala gobbuu gidduudhaan ol dheeratee, baay'ina damee ishee wajjin fagootti mul'ate.

¹²Garuu isheen aariidhaan buqqifamtee, lafatti in darbatamte; qilleensi ba'a-biiftuu inni gubaan ija ishee in gogse, dameen ishee warri jajjaboonni in coollagan, ibiddis isaan in fixe;

¹³ammas isheen lafa onaa keessa, lafa gogaa bishaan hin qabne keessa in dhaabamti;

¹⁴ibiddis damee ishee keessaa ba'ee, ija ishee in fixe; dameen jabaan ulee mootummaa ta'us ishee irratti hin hafne? jedhi! Kun boo'icha, wawwaannaas in ta'e.[83]