Read west central oromo Macaafa Hisqi'el Raajichaa 23 Bible Online

Macaafa Hisqi'el Raajichaa 23 - west central oromo bible

Macaafa Hisqi'el Raajichaa 23

¹Ammas dubbiin Waaqayyoo gara koo dhufee,

²?Yaa mucaa namaa! Dubartoonni haadha tokko irraa dhalatan lama turan;

³isaan biyya Gibxiitti in ejjan; isaan ijoollummaa isaaniitti ejjuu jalqaban; achitti harmi isaanii in qaqqabame, mataan harma durbummaa isaaniis in sukkuumame*.

⁴Maqaan dubartoota kanaa kan ishee angafaa ?Aholaa?, kan obboleettii ishee immoo ?Aholiibaa? ture; isaan kan koo turan, ilmaanii fi intaloota in godhatan; ?Aholaa? isheen jedhamtu Samaariyaa dha, ?Aholiibaa? isheen jedhamtu immoo Yerusaalem.[97]

⁵?Aholaan utuma kan koo taatee jirtuu in ejjite; warra Asor warra loltuu ollaa ishee jiran baay'ee in hawwite;

⁶isaan warra uffata dhiilgee uffatan, warra biyya bulchanii fi warra ajajjuu waraanaa ti; hundumti isaanii dargaggoota bifa toleeyyii dha, fardeeniinis in adeemu turan.

⁷Isheen namoota Asor warra fo'amoo sanaa wajjin ejjuudhaaf of in kennite; waaqayyolii tolfamoo warra hawwite sana hundumaanis of in xureessite.

⁸Ejjummaa ishee isa biyya Gibxiitti jalqabde hin dhiifne; namoonni yeroo ijoollummaa isheetti ishee wajjin ciisanii mataa harma durbummaa isheetii sukkuuman, hawwa ejjummaa isaanii ishee irra in dhangalaasan.

⁹Kanaafan harka michoota ishee warra Asor warra isheen hawwitu keessa ishee buuse.

¹⁰Isaan uffannaa ishee irraa fuudhanii, qullaa ishee mul'isan; ilmaan ishee fi intaloota ishee jalaa fudhatanii, ishee immoo billaadhaan in ajjeesan; isheen dubartoota keessaa nama kolfaa in taate, firdiinis ishee irratti in raawwatame.

¹¹?Obboleettiin ishee Aholiibaanis kana argiteetti; garuu kanuma keessaa immoo hawwa isheetiin obboleettii ishee caalaa mancaatee turte; ejjummaan ishees isa kan obboleettii ishee in caala ture*.

¹²Isheenis immoo dargaggoota warra Asor bifa toleeyyii sana hundumaa, warra biyya bulchan, warra ajajjuu waraanaa, warra loltoota mi'a waraanaa guutummaatti hidhatanii fardeeniin adeeman, in hawwite.

¹³Egaa isheen akka of xureessite ani nan arge; lachuun isaaniis karaadhuma tokkicha irra in adeeman*.

¹⁴Isheen ejjummaa ishee ittuma in dabalte; fakkeenya namoota warra akka bifa Kaldootaatti keenyan irratti qalamii diimaadhaan tolfaman in argite;

¹⁵isaan sabbataan mudhii isaanii hidhatanii, mataa isaaniittis marata gad rarra'u in kaa'atu turan; hundumti isaanii ajajjuu warra Baabilon warra konkolaataadhaan duulan, warra biyya Kaldootaatti dhalatan in fakkaatu.

¹⁶Isheen akkuma isaan argiteen isaan hawwitee, biyya Kaldootaatti namoota isaanitti in ergite.

¹⁷Dargaggoonni warra Baabilonis dhufanii siree ishee irratti ishee bira ga'anii, ejja isaaniitiin ishee in xureessan; erga isaan ishee xureessaniis isaan jibbitee isaan irraa gara in galte.

¹⁸Yommuu isheen mul'inatti ejja ishee itti fuftee qullaa ishee mul'ifte, anis akkuman obboleettii ishee jibbee irraa gara gale, akkasuma ishees jibbee irraa gara nan gale*.

¹⁹Isheen garuu isa bara ijoollummaa isheetii biyya Gibxiitti ejjaa turte sana yaadattee, ejjummaa ishee ittuma in baay'ifte.

²⁰Isheen biyya sanatti michoota ishee warra dhagni isaanii dhagna harree fakkaatu, sanyiin dhagna isaanii keessaa ba'us sanyii isa kan fardaa fakkaatu in hawwite.

²¹Ati hammeenya yeroo ijoollummaa keetii isa warri Gibxii harma kee qaqqabanii, mataa harma durbummaa keetii sukkuuman in dharraate? jedhe*.[98]

²²Kanaafis yaa Aholiibaa! Waaqayyo gooftaan, ?Kunoo! Ani michoota kee warra ati jibbitee irraa gara galte si irratti kaasee, karaa hundumaan sitti nan fida;

²³warra Baabilon, warra Kaldootaa hundumaa, warra Pheqod, warra Sho'aa, warra Qo'aa, warra Asor hundumaas isaanii wajjin, dargaggoota bifa toleeyyii, warra biyya bulchan, warra ajajjuu waraanaa, ajajjuu loltuu warra konkolaataadhaan adeemanii, gurguddoota biyyaa, warra fardeeniin adeeman hundumaas sitti nan fida.

²⁴Isaan mi'a waraanaa konkolaataa, konkolaataa mi'aa fi namoota baay'ee wajjin sitti in dhufu; gaachana guddaa fi xinnaadhaan, gonfoo sibiilaatiinis karaa hundumaa si marsu; ani firdii isaanitti nan kenna, isaanis akka seera isaaniitti sitti in faradu.

²⁵Isaan aariidhaan akka si adabaniif ani dheekkamsa hinaaffaa kootiin sitti nan erga; isaan gurra kee fi funyaan kee si irraa in kutu; ilmaan kee fi intaloota kee si duraa in fudhatu; si keessatti warri hafan billaadhaan in ajjeefamu; kaan immoo ibiddaan in dhumu*.

²⁶Akkasuma immoo isaan uffata kee si irraa in baafatu; mi'a miidhaginaa kees si irraa in fudhatu.

²⁷Ani hammeenya kee fi ejjummaa kee isa ati biyya Gibxiitti jalqabde sana nan hambisa; ati si'achi gara wanta akkasii hin ilaaltu, biyya Gibxiis deebitee hin yaadattu? jedhe.[99]

²⁸Waaqayyo gooftaan, ?Kunoo! Ani harka warra ati jibbitutti harka warra ati jibbitee irraa gara galtetti sin kenna.

²⁹Isaan jibbaan si irratti ka'anii wanta ati itti dadhabde hundumaa si irraa in fudhatu, akka gaafa dhalatteettis qullaatti si dhiisu; qullaan ejjummaa keetii fi hammeenyi halalummaa keetii bakkeetti in ba'a.

³⁰Kunis sababii ati saba lafa irraa wajjin ejjitee, waaqayyolii tolfamoo isaaniitiin of xureessiteef si irra in ga'e.

³¹Ati karaa obboleettiin kee irra adeemte irra adeemteetta, kanaafis ani xoofoo adaba isheetii harka kee keessa nan kaa'a? jedhe.

³²Waaqayyo gooftaan, ?Xoofoo adabaa isa kan obboleettii keetii, isa bal'aa fi isa gad fagoo, isa baay'ee baatu keessaa in dhugda; nama kolfaa fi nama ga'oos in taata.

³³Xoofoon obboleettii kee Samaariyaa, xoofoo diigamuu fi xoofoo onuu ti; ati machiidhaan, gaddaanis in guutamta*.

³⁴Ani kana dubbadheera, ati isa keessaa in dhugda, in xuruurfattas; isa in caccabsita, harma kees of irraa in cirta? jedhe; Waaqayyo gooftaan kana dubbateera.

³⁵Kanaafis Waaqayyo gooftaan, ?Erga ana irraanfattee of duubatti na gatte, wanta hammeenyi kee fi ejjummaan kee sitti fidu immoo in baatta? jedhe*.[100]

³⁶Ammas Waaqayyo anatti dubbatee, ?Yaa mucaa namaa! Aholaa fi Aholiibaa firdiitti in dhi'eessitaa ree? Egaa hojii isaanii isa ciiggaasisaa isaanitti argisiisi!

³⁷Isaan ejjaniiru, dhiignis harka isaanii keessa jira; waaqayyolii tolfamoo isaanii waaqessuu isaaniitiin ejjanii, ilmaan anaaf da'an iyyuu akka isaan nyaataniif dabarsanii isaaniif in kennan*.

³⁸Kanuma irratti iyyuu dabalanii immoo gaafuma iddoo qulqullaa'aa isa kan kootii xureessan Sanbata koos immoo in cabsan*.

³⁹Isaan gaafuma ijoollee isaanii waaqayyolii tolfamoo isaaniif qalanii aarsaa dhi'eessan sana, iddoo qulqullaa'aa isa kan kootii xureessuudhaaf ol lixan; kunoo wanti isaan mana koo keessatti hojjetan isa kana.[101]

⁴⁰?Kana malees, isaan biyya fagootti erganii namoota in waamsisan; yommuu jarri dhufan immoo kunoo dubartoonni sun isaaniif jedhanii dhiqatanii, ija isaanii kuulii dibatanii, mi'a miidhaginaas in kaa'atan.

⁴¹Isaan siree ulfina-qabeessa irra in taa'an; isa duras gabatee dhaabanii, ixaana koo fi dhadhaa ejersaa koo irra in kaa'an.

⁴²Sagaleen tuuta of irraa-bu'ee haasa'uu isaan biraa in dhaga'ama ture; namoonni garaa garaas warri lafa onaadhaa dhufan isaanii wajjin turan; jarri immoo harka dubartoota sanaatti bitawoo in naqan, mataa isaanii irras gonfoo miidhagaa in kaa'an.

⁴³Anis kana irrattan waa'ee ishee ejjaan dulloomte sanaa, ?Amma isaan isheedhaa wajjin in ejjuu ree? Isheenis isaanii wajjin in ejjitii ree?? jedhe.

⁴⁴Isaan akka namni dubartii ejjituu bira dhaqu ishee bira dhaqan; isaan akkasitti Aholaa fi Aholiibaa dubartoota hamoota sana bira dhaqan.

⁴⁵Isaan ejjitootaa fi warra dhiigni harka isaanii keessa jiru waan ta'aniif, namoonni qajeelonni firdii isa ittiin dubartoota ejjitootaa fi warra dhiigni harka isaanii keessa jirutti faradaniin isaanitti in faradu? jedhe*.[102]

⁴⁶Waaqayyo gooftaan, ?Yaa'ii sabaa isaanitti fidi! Naasuu fi saamichatti isaan kenni!

⁴⁷Yaa'iin sabaas dhagaadhaan isaan in rukuta, billaa isaaniitiinis isaan in kukkuta; ilmaan isaanii fi intaloota isaanii in ajjeesa, manneetii isaaniis ibiddaan in guba.

⁴⁸Ani akkasittan dubartoonni hundinuu hammeenya isin hojjettan dhiisanii akka of eeggatan gochuudhaan, biyyicha keessaa hammeenyi akka badu godha.

⁴⁹Sababii hammeenya keessaniifis isin in adabu; cubbuu isa waaqayyolii tolfamoo keessan duukaa bu'uudhaan hojjettanis in baattu; yommus ani Waaqayyo gooftaa akkan ta'e isin in beektu? jedhe*.[103]