Read west central oromo Macaafa Hisqi'el Raajichaa 45 Bible Online

Macaafa Hisqi'el Raajichaa 45 - west central oromo bible

Macaafa Hisqi'el Raajichaa 45

¹Isin laficha muka buuftanii dhaalaaf yeroo hirtan, isa irraa kutaa tokko qooda qulqullaa'aa Waaqayyoof addaan baasaatii kennaa! Innis dheerinni isaa dhundhuma kuma digdamii shan, bal'inni isaas dhundhuma kuma digdama haa ta'u! Karaa hundumaas naanna'ee qulqullaa'aa haa ta'u*!

²Kana keessaa immoo iddoon hojjaan isaa fi garaan isaa dhundhuma dhibba shan shan ta'e karaa arfanuu wal qixxeen iddoo qulqullaa'aadhaaf haa ta'u! Naannoo isaatti immoo iddoo duwwaan bal'inni isaa dhundhuma shantama ta'u haa hafu!

³Kutaa qulqullaa'aa sana irraa lafa dheerinni isaa dhundhuma kuma digdamii shanii, bal'inni isaas dhundhuma kuma kudhanii safari! Kunis iddoo qulqullaa'aa fi iddoo hundumaa irra caalaa qulqullaa'aadhaaf haa ta'u!

⁴Inni biyyicha keessaa kutaa isa qulqullaa'aa haa ta'u! Inni luboota warra iddoo qulqullaa'aa keessaa hojjetaniif, warra Waaqayyoof hojjechuudhaaf isatti dhi'aataniif, akkasumas manneettii isaaniitiif iddoo isa qulqullaa'aadhaafis in ta'a.

⁵Inni hafe immoo dheerinni isaa dhundhuma kuma digdamii shan, bal'inni isaas dhundhuma kuma kudhan; inni immoo Lewwoota warra mana qulqullummaa keessaa hojjetaniif araddaa isaan mandaroota keessatti ijaarratanii keessa taa'an in ta'a*.[214]

⁶Qooda qulqullaa'aa isa kennaa addaan dhi'eessitan sana bukkeetti immoo iddoo bal'inni isaa dhundhuma kuma shan, dheerinni isaa dhundhuma kuma digdamii shan ta'u qabeenya mandara sanaa godhaa kennaa; inni immoo kan guutummaa namoota Israa'el haa ta'u*!

⁷Qooda qulqullaa'aa isa kennaa addaan dhi'eessitan sanaaf qabeenya mandarattii garasii fi garanaan immoo, inni gara lixa-biiftuu karuma lixa-biiftuutiin, inni gara ba'a-biiftuu immoo karuma ba'a-biiftuutiin guddaa biyyaatiif haa ta'u! Dheerinni isaas daarii isa gara lixa-biiftuutii kaasee hamma daarii isa gara ba'a-biiftuutti hirmaata gosa tokkoo duukaa safarama*!

⁸Inni kun Israa'el keessatti qabeenya guddaa biyyaa sanaa haa ta'u! Gurguddoonni warri kan kootii si'achi saba koo hin cunqursin! Isaan namoota Israa'eliif akka gosa gosa isaaniitti laficha haa hiran*![215]

⁹Egaa Waaqayyo gooftaan, ?Yaa gurguddoota Israa'el, humnaan nama irratti ka'uu fi cunqursaa isa baay'ate sana dhiisaa! Firdii qajeelaa fi qajeelummaa godhaa! Qabeenya saba kootii irraa fudhachuu dhiisaa! Kana ana Waaqayyo gooftaatu dubbate*.

¹⁰Isin madaalii qajeelaa, eefaa akkasumas baatihii qajeelaa qabaadhaa*!

¹¹Eefaan sunii fi baatihiin sun safarri isaanii tokko haa ta'u! Safarri baatihii sanaa oomer harka kurnaffaa keessaa tokko akkasumas safarri eefaa sanaa oomer harka kurnaffaa keessaa tokko haa ta'u!

¹²Isin biratti sheeqeliin tokko ?Geraa? digdama, sheeqeliin digdamni, sheeqeliin digdamii shaniif sheeqeliin kudha shan walumatti ?Miinaa? tokko haa ta'u!? jedha.[216]

¹³Itti fufees, ?Kennaan isin addaan kennitan akka kanatti aanee jirutti haa ta'u! Qamadii oomerii tokko keessaa eefaa harka ja'affaa akkasumas garbuu oomerii tokko keessaa eefaa harka ja'affaa,

¹⁴dhadhaan ejersaa immoo ?Korii? isa akkuma oomerii tokkoo baatihii kudhan baasu keessaa baatihii harka kurnaffaa haa ta'u!

¹⁵Karra biyya Israa'el iddoo bishaan ba'eessa qabu keessaa immoo bushaayeen dhibbi lama keessatti kan argaman keessaa hoolaa tokko haa ta'u! Isaan kun namootaaf kennaa midhaanii, qalma gubamu, qalma araaraas haa ta'an! Kana ana Waaqayyo gooftaatu dubbate.

¹⁶Sabni biyya sanaa hundinuu kennaa addaa guddaa biyyaa isa Israa'el keessaaf haa kennan!

¹⁷Guyyoota ayyaanaa, mana Israa'elitti ayyaaneffaman hundumaatti, qalmi gubamu, kennaan midhaanii, kennaan dhugaatii guyyaa ayyaanaatti, guyyaa baatii ji'aatti, guyyaa Sanbataatti akka argaman gochuun guddaa biyyaa irra jira; mana Israa'eliif araarsuudhaaf inni aarsaan sababii cubbuutiif dhi'aatu, kennaan midhaanii, qalmi gubamu, qalmi araaraas akka qophaa'u haa godhu!? jedhe*.[217]

¹⁸Waaqayyo gooftaan, ?Ji'a isa duraatti, ji'ichattiis guyyaa isa duraatti sa'a keessaa tuntunoo mudaa hin qabne tokko fuudhiitii aarsaa dhi'eessii, iddoo isa qulqullaa'aa sana ittiin qulleessi!

¹⁹Lubichis dhiiga aarsaa sababii cubbuutiif dhi'aatu sana irraa fuudhee michichila balbala mana qulqullummaatti, golee dhagaa tolfamaa iddoo aarsaa arfanuutti, michichila karra oobdii isa gara keessaattis haa dibu!

²⁰Ji'ichattii gaafa guyyaa torbaffaa nama karaa irraa kaachuudhaan yookiis wallaalummaadhaan cubbuu hojjetuuf akkas godhaa! Manicha qulqullummaafis araarsaa*![218]

²¹?Ji'a isa duraattii guyyaan kudha afuraffaan ayyaana Faasiikaa isa guyyaa torba ayyaaneffatan isiniif haa ta'u! Yeroo sanatti maxinootu nyaatama.

²²Gaafas guddaan biyyaa sun aarsaa sababii cubbuutiif dhi'aatu ofii isaatiif, namoota biyya sanaa hundumaafis tuntunoo tokko haa qopheessu!

²³Inni guyyoota ayyaanaa torban sanatti immoo, tuntunootaa fi korbeeyyii hoolaa mudaa hin qabne torba torba guyyuma guyyaan qalma gubamuuf ana Waaqayyoof haa qopheessu! Akkasumas aarsaa sababii cubbuutiif dhi'aatuuf guyyaa guyyaatti korbeessa reettii tokko haa qopheessu!

²⁴Kennaa midhaaniif immoo tuntunoo tokko tokkoo wajjin daakuu eefaa tokko, korbeessa hoolaa tokko tokkoo wajjinis daakuu eefaa tokko, daakuu eefaa tokko tokkoo sanaaf immoo dhadhaa ejersaa hiin tokko tokko haa qopheessu*![219]

²⁵?Ayyaana isa ji'a torbaffaatti, ji'ichattiis guyyaa kudha shanaffaatti guyyaa torba ayyaaneffamu irratti, aarsaa sababii cubbuutiif dhi'aatuuf, qalma gubamuuf, kennaa midhaaniifis dhadhaa ejersaa akkasumas wanta barbaachisu haa qopheessu!? jedhe*.[220]