Read west central oromo Macaafa Yo'el Raajichaa 1 Bible Online

Macaafa Yo'el Raajichaa 1 - west central oromo bible

Macaafa Yo'el Raajichaa 1

¹Dubbiin Waaqayyoo inni gara Yo'el ilma Phetu'el dhufe kanatti fufee kan jiruu dha.

²Isin maanguddoota nana kana dhaga'aa! Sabni biyya kana keessa jiraattan hundinuus mee dhaggeeffadhaa! Wanti akkasii kun bara isin jiraattan keessatti, bara abboonni keessan jiraatan keessattis takkaa ta'ee beekaa ree?

³Waa'ee kanaa ijoollee keessanitti himaa! Ijoolleen keessanis ijoollee isaaniitti haa himan! Ijoolleen isaaniis dhaloota dhufutti haa himan!

⁴Isa gurmuu hawaannisaa isa duraa irraa hafe, gurmuu hawaannisaa isa lammaffaatu nyaate; isa gurmuu hawaannisaa isa lammaffaa irraa hafe, ilmaan hawaannisaatu nyaate; isa ilmaan hawaannisaa irraa hafe immoo geerii hawaanisaatu nyaate*.[1]

⁵Isin warri machooftuun dammaqaatii boo'aa! Daadhiin waynii isin irraa waan citeef, isin warri daadhii waynii dhugdan hundinuu, cuunfaa wayniitiif boo'aa!

⁶Sabni jabaanii fi lakkoobsi isaa dhuma hin qabne biyya koo irratti dhufeera; ilkaan isaa akka ilkaan leencaa ti, qarrifaan isaas akka qarrifaa leenca dhalaa ti*;

⁷inni dhaabaa waynii koo in onse, muka harbuu koos gad in cire; qola isaanii irraa quncisee gate, dameen isaaniis addaatee hafe;[2]

⁸akka misirroo uffata gaddaa uffatee, dhirsa qaree isheetiif gaddituutti, gaddaa!

⁹Kennaan nyaataa fi dhugaatii mana Waaqayyoo irraa in cite, kanaaf luboonni warri Waaqayyo gooftaadhaaf hojjetan gaddanii in boo'u*.

¹⁰Maasiin in one, midhaan waan badeef lafti in gadde; mukti waynii inni haaraan in goge, dhadhaan ejersaas hin jiru.[3]

¹¹Isin warri qottuun abdii kutadhaa! Warri waynii dhaabdanii guddiftanis gaddaa! Wanti laficha irraa galfamu waan badeef, qamadiidhaaf, garbuudhaafis gaddaa*!

¹²Mukti waynii in goga, mukti harbuus in coollaga; mukti rumaanii, mukti meexxii, mukti hudhaa fi mukkeetiin maasii keessaa hundinuu in gogu; gammachuun ilmaan namootaas in bada.[4]

¹³Yaa lubootaa! Uffata gaddaa uffadhaa, boo'aas! Kennaan midhaanii fi kennaan dhugaatii, mana Waaqayyo keessanii irraa waan ittifameef, isin warri iddoo aarsaatii hojjettan, hojjetonni Waaqayyo kootii mana qulqullummaatti ol galaa! Uffata gaddaa uffadhaatii halkan guutuu gaddaa bulaa!

¹⁴Soomii qulqulluu labsaa! Wal ga'ii qulqullaa'aas waamaa! Jaarsoliidhaaf warra biyyicha keessa jiraatan hundumaa, mana Waaqayyo gooftaa keessaniitti walitti qabaa! Gara Waaqayyoottis iyyaa*!

¹⁵Wayyoo! Guyyaan Waaqayyoo dhi'aateera! Maal guyyaan sodaachisaan akkasii! Inni isa hundumaa danda'u biraa akka balleessiitti in dhufa*.[5]

¹⁶Utuma nuyi ilaalluu nyaati akkuma dhibe, akkasuma gammachuunii fi ililleen mana Waaqayyo keenyaatii dhibeera mitii ree*?

¹⁷Sanyiin kaboota jalatti tortoree, midhaan waan badeef, gombisaan in one, gumbiin in caccabe.

¹⁸Saawwan waan dheedan waan dhabaniif, in mar'atu! Bushaayeen in joonja'u; hoolonni karri baay'eenis in dhiphatu*.[6]

¹⁹Yaa Waaqayyo! Ibiddi iddoo dheedumsa horii waan fixeef, arrabni ibiddaas muka bakkee keessaa waan gubeef, ani gara keetti nan iyya;

²⁰burqaan bishaanii waan gogeef, ibiddis iddoo dheedumsa horii waan fixeef, bineensonni caakkaa illee gara keetti in iyyu*.[7]