Read west central oromo Yoonaas Raajichaa 1 Bible Online

Yoonaas Raajichaa 1 - west central oromo bible

Yoonaas Raajichaa 1

¹Gaaf tokko dubbiin Waaqayyoo gara Yoonaas ilma Amiitaayi dhufee*,

²?Ka'i, gara Nanawwee mandara guddittii dhaqi! Hamminni namoota ishee guddatee na bira waan ga'eef, irratti labsi!? jedhe.

³Yoonaas garuu isa dhiisee, fuula Waaqayyoo duraa mandara Tarshiishitti baqachuudhaaf ka'e; mandara Yopheetti gad bu'ee markaba Tarshiish dhaqu argate; inni warra markabichaa wajjin adeemuudhaaf gatii isaa baafatee, fuula Waaqayyoo duraa gara Tarshiishitti sokkuudhaaf keessa in lixe*.[1]

⁴Yommus Waaqayyo qilleensa jabaa galaanichatti kaase; bubbeen humna-qabeessis galaanichatti waan ka'eef markabichi caccabuu bira ga'e*.

⁵Yeroo sanatti warri markaba oofan in sodaatan; namnis adduma addaan gara Waaqayyo isaatti iyye; akka itti salphatuuf mi'a markabicha irraa galaanatti gad daddarbatan; Yoonaas garuu kutaa markabichaa keessa lixee ciisee, rafees of gatee ture*.

⁶Ajajjuun markabichaa immoo isatti dhi'aatee, ?Attamitti akkas of gattee rafta? Ka'i, Waaqayyo kee waammadhu! Tarii Waaqayyo kun akka nuyi hin badneef nu yaadata ta'a!? jedhe*.[2]

⁷Kana booddees warri markabaa adduma addaan, ?Wanti hamaan kun sababii eenyuutiif akka nu irra ga'e beekuudhaaf, kottaa muka buufannaa!? waliin jedhan; kanaaf isaan muka buufannaan, mukti Yoonaas irra bu'e*.

⁸Kana irratti isaan, ?Wanti hamaan kun sababii eenyuuf nu irra ga'e? Hojiin kee maali? Eessaa dhufte? Biyyi kee eessa? Sanyiin kee maali? Nutti himi!? ittiin jedhan.

⁹Inni immoo, ?Ani Ibricha; Waaqayyoon isa gooftaa ta'ee waaqa irra jiraatu, isa galaanaa fi lafa uume nan waaqeffadha? jedhee, isaaniif deebise*.

¹⁰Inni waa'ee ofii isaa waan isaanitti himeef, jarri fuula Waaqayyoo duraa baqachaa akka inni jiru in hubatan; kanaaf isaan guddaa sodaatanii, ?Maali, ati attamitti akkas goote?? ittiin jedhan.

¹¹Galaanichi ittuma dabalee hunkuramaa waan adeemeef isaan, ?Galaanichi nu irraa akka gab jedhuuf attam si goonu ree?? jedhanii isa in gaafatan.

¹²Kana irratti Yoonaas, ?Fuudhaatii galaanicha keessa na buusaa! Yoos galaanichi isin irraa gab in jedha; bubbeen humna-qabeessi isinitti ka'e kunis sababii kootiif ta'uu isaa anoo beekeera? isaaniin jedhe.[3]

¹³Jarri immoo markabicha deebisanii gara lafaatti baasuudhaaf jabeessanii in mooqan; garuu hunkuramuun galaanichaa isaanitti dabalaa waan adeemeef, kana gochuu hin dandeenye.

¹⁴Yommus isaan Waaqayyoon isa galaanaa fi lafa uume waammatanii, ?Hadaraa yaa Waaqayyo! Lubbuu namicha kanaa nu harkaa barbaaddee nu hin balleessin! Akka warra dhiiga nama balleessaa hin qabne dhangalaasaniittis nu hin lakkaa'in! Yaa Waaqayyo, kana akka sitti tolutti situ hojjete? jedhan.

¹⁵Yoonaasin immoo fuudhanii galaanicha keessa buusan; galaanichis hunkuramuu isaa isa sodaachisaa in dhaabe.

¹⁶Jarri ittumaa guddisanii Waaqayyoon sodaatan; Waaqayyoof aarsaa in dhi'eessan, wareegas in wareegan.