Read west central oromo Seera Lakkoobsaa 10 Bible Online

Seera Lakkoobsaa 10 - west central oromo bible

Seera Lakkoobsaa 10

¹Waaqayyo yommus Museedhaan,

²?Meetii tumame irraa fiingee lama tolfadhu! Fiingeen kunis waldaa ittiin walitti waamuudhaaf akkasumas buufanni buqqifatee akka ka'u gochuudhaaf siif haa ta'u!

³Yommuu fiingeewwan sun lamaan afuufaman guutummaan waldaa balbala dunkaana itti wal ga'an sanatti si duratti walitti haa qabaman!

⁴Fiingeen tokko duwwaan yommuu afuufamu, warri geggeessitoonni, dura-buutonni kumaatama Israa'elis si duratti walitti haa qabaman!

⁵Yommuu sagaleen fiingee inni dammaqsu si'a tokko afuufamu, warri gara ba'a-biiftuutiin buufatan haa ka'an!

⁶Yommuu sagaleen fiingee inni dammaqsu si'a lammaffaa afuufamu immoo warri gara mirgaatiin buufatan haa ka'an! Egaa sagaleen fiingee kanaa milikkita jarri ittiin ka'anii dha.

⁷Waldaa walitti qabuudhaaf yommuu afuufamu immoo sagaleen isaa akka milikkita isa dammaqsu sanaa hin ta'in!

⁸?Ilmaan Aaron warri luboonni fiingeewwan sana haa afuufan! Kunis isiniif, dhaloota dhufuufis seerrata dhaabataa haa ta'u!

⁹Yommuu diinota biyya keessan keessatti isin jibban loluudhaaf kaatan, fiingeewwan kanaan sagalee nama dammaqsu dhageessisaa! Yommus Waaqayyo gooftaa keessan duratti in yaadatamtu, diinota keessan jalaas in baafamtu*.

¹⁰Akkasumas yeroo gammaddanitti, yeroo ayyaana beekamaa ayyaaneffattanitti, baatii ji'aatti, fiingeewwan kana qalma gubamu irratti, qalma araaraattis afuufaa! Kun wanta isin ana Waaqayyo duratti ittiin yaadatamtanii dha; ani Waaqayyo gooftaa keessan? jedhe*.[27]

¹¹Waggaa lammaffaa keessaa ji'a lammaffaatti, ji'ichattiis guyyaa digdammaffaatti duumessichi godoo dhuga-baatuu sana irraa in ka'e.

¹²Achumaanis Israa'eloonni Siinaa lafa onaadhaa ka'anii, karaa isaanii itti in fufan; duumessichis Phaaraan lafa onaa irra ga'ee in dhaabate.

¹³Kun adeemsa isaanii isa jalqabaa isa akka Waaqayyo Musee abboometti adeemanii dha.

¹⁴Duraan dursa kutanni buufata gosa Yihudaa loltoota isaa wajjin faajjii isaa qabatee dura bu'e; Nahishoon ilmi Aminaadaab immoo ajajjuu isaanii ture.

¹⁵Loltuu namoota gosa Yisaakor irratti immoo Nataani'el ilma Zuwaartu ajajjuu ture.

¹⁶Loltuu gosa Zebuloon irratti immoo Eliiyaab ilma Helontu ajajjuu ture.

¹⁷Erga godoon buqqa'ee immoo ilmaan Gershoonii fi ilmaan Meraarii godicha baatanii in ka'an.

¹⁸Itti fufees buufanni gosa Ruuben loltoota isaa wajjin faajjii isaa qabatee in ka'e; Eliizur ilmi Shiide'ur immoo ajajjuu isaanii ture.

¹⁹Loltuu namoota gosa Shimi'oon irratti immoo Shiilumii'el ilma Zuriishadaayitu ajajjuu ture.

²⁰Loltuu namoota gosa Gaadi irratti immoo Elii'aasaaf ilma Deu'eltu ajajjuu ture.

²¹Itti fufee immoo warri Qehaatotaa warri mi'a qulqullaa'aa sana baatan in ka'an; utuu isaan buufata itti aanu hin ga'in warri kaan godicha dhaabanii isaan in eegan.

²²Itti fufee immoo kutanni buufata namoota Efreem loltoota isaa wajjin faajjii isaa qabatee in ka'e; Eliishaamaa ilmi Amiihud immoo ajajjuu isaanii ture.

²³Loltuu namoota gosa Minaasee irratti immoo Gamaali'el ilma Phedaazurtu ajajjuu ture.

²⁴Loltuu namoota gosa Benyaamiin irratti immoo Abiidaan ilma Gidewooniitu ajajjuu ture.

²⁵Gara dhumaattis kutanni buufata namoota Daan inni karaa booddeetiin buufata hundumaaf eegduu ta'e loltuu isaa wajjin faajjii isaa qabatee in ka'e; Ahii'ezer ilmi Amiishadaayi immoo ajajjuu isaanii ture.

²⁶Loltuu namoota gosa Asheer irratti immoo Fagi'el ilma Okraantu ajajjuu ture.

²⁷Loltuu namoota gosa Niftaalem irratti immoo Ahiiraa ilma Enaantu ajajjuu ture.

²⁸Toorri Israa'eloonni akka kutata kutata isaaniitti ka'anii adeeman akka kana ture.

²⁹Museen yommus Hobaab ilma abbiyyuu isaa Reu'el isa ?Yetroo? jedhamu Miidiyaantichatti, ?Nuyi biyya isa Waaqayyo, ?Ani isa isiniif nan kenna? jedhe sanatti galuudhaaf kaaneerra, atis nu wajjin dhaqi! Waaqayyo Israa'elin waan gaarii waan abdachiiseef nus immoo waan gaarii siif in goona? jedhee in dubbate.

³⁰Inni garuu deebisee, ?Lakkii! Ani gara biyya koo fi gara lammii koottan deebi'a malee, isinii wajjin hin dhaqu!? jedhe.

³¹Museen immoo, ?Maaloo nu biraa hin deebi'in! Lafa onaa keessaa iddoo nuyi buufachuun ta'u ati in beekta, akka ija keenyaas nuuf in taata.

³²Ati nuu wajjin yoo dhaqxe, nus wanta gaarii Waaqayyo nuuf godhu siif in hirra? jedhe.

³³Ergasii isaan ?Siinaa? tulluu Waaqayyoo irraa ka'anii guyyaa sadii in adeeman; sanduuqi kakuu Waaqayyoos guyyaa sadan kana iddoo buufataa isaaniif barbaaduudhaaf isaan dura bu'ee in adeeme.

³⁴Yommuma isaan iddoo buufataatii ka'an duumessi Waaqayyoo guyyaa mataa isaanii gara irraa in adeema ture.

³⁵Yommuu sanduuqichi ka'u, Museen, ?Yaa Waaqayyo ka'i! Diinonni kee haa bittimmaa'an! Warri si jibbanis fuula kee duraa haa baqatan!? in jedha ture*.

³⁶Yommuma sanduuqichi buufatu immoo, Museen, ?Yaa Waaqayyo! Gara kumaatama Israa'elitti deebi'i!? in jedha ture.[28]